Read Cuvok Ebəre hay 10 Bible Online

Ebəre hay 10 - Cuvok bible

Ebəre hay 10

¹Ma majawa ta Muyiz sə, aŋga meezeŋ te jə metehwe ana masa maayaŋ kad fəma, bəna aŋga sə, aŋga jə metehwe ana bay. Aŋga ava gədaŋ te metərec ndah maŋgucafa vaw Zlavay ka ndah masa ec ke husec pe memeɗ te jene hay fakwan cay sə, aabay. Ma majawa ana a da zlafa sə, meemey, ava maŋgə kwakwas ana hay ara aŋga ana cəɗem cəɗem, masa aca viya fa mavay fa mavay kwa kwakumakw ana aabay?

²Anjəkar daha ka zlafa mepenec avəda ara nesey, efes ac ka gərda mavə jene hay dəga zleezle, afa ndah medə kad pe mekəɗek ha kad Zlavay sə, ec te peneceŋ pal dəɓa amta dapa mebər teceŋ aabay geyey? Mebərey ana hay ŋgesey sə, ec te ŋgedec hahar kad mawulak yaŋ ta rav tec ɓasabay.

³Eve metehwe ana, jaka pa maŋgə kwakwas ana hay ŋgesey, ndana hay aca sənafa mebər tec hay fa mavay fa mavay.

⁴Afa gədaŋ dapa kad bembez ta mar hay ta zla va bembez ta mazawal da zlafa makəsa mebər hay avəda.

⁵Mafay ana, Kəristi dapa masa mbala e te dek kad pa vavara sə, ka gwaɗa Zlav, gege: «Ka ka wal ndana da ŋgakaa kwakwas va mavakaa jene hay sə, aabay, amaa ka ke lemiyey vaw.

⁶Mafak gənaw hay va maŋgə kwakwas hay mafay te mebərey sə, ka wafakaa aabay.

⁷Ara nesey, ye ke gweɗey: “Ya kana, afa mavinda da yaŋ yey dapa Ma mavəna, ye ke dekey, awa Zlavay, ka ta ŋgə mezlər masa ka waya.”»

⁸Ke gweɗ ɗagay, gege: «Maŋgə kwakwas hay, mavə jene hay, mafak gənaw hay va maŋgə kwakwas ta mapal mebərey sə, ka ka walaw aabay, ac ka wafakaa aabay.» Anjəkar kwakwas ana hay nesey, ac maŋga ara ma majawa te gweɗey.

⁹Ka gwaɗa, gege: «Ya kana, ye dek sə, ka ta ŋgə mezlər masa ka ta waya.» Ka vavəsa kwakwas macaaca ana avəda ka ta pə kwakwas meecew ana.

¹⁰Dapa maŋgə jə masa Zlav ta waya ana ŋgesey, andə ka ŋgatakwa mepeney dapa mebərey jaka pa mavə jene ta vaw ta Yesu Kəristi masa aŋga ta viya pal dəɓa amta katar ka midakw.

¹¹Kwa ndaakwas wula wula sə, aŋga mazlaca cəɗem cəɗem ke te ŋgə mezlər tata, fa pas fa pas a ŋgə kwakwas amta ana ŋgesey, masa ac ta zlafa makəsa mebər kwa kusetke aabay.

¹²Kəristi sə, sesəker ava dəɓa ta mavə yaŋ tata ara jene ta kwakwas mafay te mebərey pal dəɓa amta sə, ka njahata katar ka midakw da ha ta zam ta Zlavay.

¹³Dərŋga sə, a ɓal pas masa maslagəra tata hay aca ra njahata a hwaɗ ta ha tata.

¹⁴Eve metehwe ana, jaka pa mavə jene pal amta, ke hwedeɗec ndah masa ke penecen mebər tec avəda kad pe memeɗ te jene hay fakwanay.

¹⁵Nesey masa Mesfen Mavəna ta tə yaw da yaŋ ana kad andakwa. Afa ava dəɓa ta masa e gweɗ, gege:

¹⁶«Bay Mazlakava, gege: “Mawala, jaka pa majaw ma masa ya ta jawiya eve eceŋ ava dəɓa ta pas ana hay ŋgesey: Ye te vec ma majawa aɗaw hay, ya ta vindaɗ pa rav teceŋ va pa mawulak yaŋ teceŋ.”»

¹⁷Mebər tec hay va mezlek tec hay sə, ya ta wulak yaŋ fec ɓasabay.

¹⁸Anjəkar daha mapəl mebər maŋgata sə, mavə jene mafay te mebər ɓasabay.

¹⁹Ara nesey, malama va dəma hay, mbalay jaka pe bembez te Yesu, andakwa ava zidaw te mesehw pa Way ta kwakwas sə, ɓasabay.

²⁰Dapa faŋga sə, andakwa eve cəv waya masa aŋga eve ndey, masa aŋga ta wuniya jaka pa magambargambar, ara megweɗey, jaka pa vaw tata.

²¹Andakwa ava mazlakava ta ndaakwas hay ɓa masa aŋga mapa da yaŋ way ta Zlavay.

²²Maŋgucakwa vaw kad vara Zlavay ava rav manduwak ana, ava makəsparav masa manəha, ava rav mapana dapa mebər hay fakwanay masa aca ŋgada hahar kad mawulak yaŋ ta rav va ava vaw tandakwa mapana ava yam masa magaɓa aabay.

²³Andə ta məcakwaɗ vaw bay, amcakwa fəma fəma ta maŋguzad mawulak yaŋ ta maŋgat jene tandakwa, afa Zlav a ŋgwad ma tata masa aŋga ta gwaɗandakwa daha sə, aabay.

²⁴Mapakwa leŋgesl fa vaw tandakwa amta va amta, afa anda da ŋgatakwa gədaŋ ta mawal vaw va meŋgə mezlər hay mambəla ana.

²⁵Andə ta gərakwaɗ macam yaŋ tandakwa ara ndah dərziya masa ac masasəraka ana ta maŋgiya sə, bay, amaa mavakwa gədaŋ fa vaw tandakwa, mahwalhwala ana saya sə, masa akwa wala pas ana e ŋgucek vaw cay.

²⁶Afa daha anda ŋgakwa mebər ava ha, ava dəɓa ta maŋgat mesen jene manəha da yaŋ metehwe ana, kwakwas mekele magəra te meŋgey mafay te mebərey sə, ɓasabay.

²⁷Amaa magəra sə, say maɓal matəɗ ma masa a lal nda mabay va matə nda ta kwakwaw masa a ta ndal ndah maŋgəra nda hay.

²⁸Daha ndana ka nah yaŋ kad pa ma majawa ta Muyiz aabay, daha ndah ecew kwa ndah mahkar ac ka tə yaw da yaŋ ana sə, nda ana ŋgesey, aca kəɗa avəda cukw cukw macəhwandaw, aca ŋgafa metekwen aabay.

²⁹Naa ta nda masa ka paɗ Wut ta Zlavay ara jene taambəla, ka paɗ bembez ta majaw ma masa a ŋgat madərazl ma ava Zlavay ava aŋga ara jene taambəla va malaf Mesfen Mavəna mavana mambəla ana ta Zlavay sə, a ta ŋgat matəɗ ma ta Zlavay ka fəna saya aabay ŋgəɗa geyey?

³⁰Eve metehwe ana, anda sənakwa nda masa e gweɗ, gege: «Ma ta vaha jə masa e teh bay kad ndana sə, yey! Ma ta pəla meyəv ta ndana fe mezlər tata sə, yey may!» Ke gweɗ saya, gege: «Bay Mazlakava e te təɗec ma a yaŋ ndah tata.»

³¹Metəɗ kad pa ha ta Zlav masa aŋga eve ndey sə, a lal nda mabay.

³²Amaa masənafa manjah takwar mezleezle ana. Dapa pas ana hay ŋgesey, ava dəɓa ta makəs slam mawaɗa ta Zlavay, akwar ka sə marga mabay va maŋgə vaw dapa vəram hay.

³³Dapa ŋgesey ana, ec ke lefec ndah dərziya deveŋ akwar, ec ke ŋgedec hahar mabay fa yam te ndey ta ndana hay gaa. Ndah dərziya deveŋ akwar ac ka ləmada vaw te metəkecen rav ta ndah masa ac malafa ana ŋgesey.

³⁴Eve metehwe ana, akwar ka sə marga fa slam ana ava ndah masa ec te kezleɗec pa daŋgay va akwar ka kəsaw masa ndana hay aca pəraslakwaɗ jene hay takwar avəda fa gədaŋ, afa akwa səniya akwar eve jene hay mekele mambəla ana mafəna ŋgesey ana ɓa masa ac ta njah katar ka midakw.

³⁵Ara nesey, akwar ta gərda mapə mawulak yaŋ ta maŋgat jene da vara Zlav bay. Ara nesey, a ta vakwar meyəv takwar mazlakava ana.

³⁶Akwa hwar maŋgat mepəsek dapa jene hay, afa akwar de ŋgə jə masa Zlav ta waya va maŋgat jə masa Zlav ke gweɗey a ta vakwar.

³⁷Eve metehwe ana, ma mavinda dapa Ɗelewer mavəna, gege: Dapa manjah kusetke, manjah kusetke fana, nda masa e te dekey sə, a dakata, e te njehek gaa ɓasabay.

³⁸Nda aɗaw maŋga mezlər ara aŋga ana sə, a ta njah eve ndey jaka pa makəsparav, amaa daha ka vahata ava dəɓa sə, ye te wesl da yaŋ ana ɓasabay.

³⁹Tandakwa sə, andakwa deveŋ ndah masa ec ke vehec kad ava dəɓa ka ta zay sə, aabay. Amaa andakwa ndah ta makəsparav, andakwa dapa cəv ta mambəl mesfen tandakwa.