Read Cuvok Ebəre hay 11 Bible Online

Ebəre hay 11 - Cuvok bible

Ebəre hay 11

¹Makəsparav sə, maŋgat jə metehwe ana masa anda wulakakwa yaŋ da yaŋ ana te meŋgetey. Aŋga cəv ta masən jene hay metehwe ana masa ece wel bay.

²Jaka pa makəsparav ana ara nesey, Zlav ke pec ndah mezleezle ana ka ndah mambəla ana fa yam te ndey tata.

³Jaka pa makəsparav, anda cənakwaɗ Zlav ka lam jene hay fakwanay ava ma tata. Ara nesey, jə masa anda walakwaɗ nesey sə, e dek dapa jə masa anda walakwaɗ bay.

⁴Jaka pa makəsparav, Ebel ka vana jə mambəla ana te meŋgə kwakwas kad Zlavay ka fəna ta malamaŋ Kayen. Mbalay mafay ta makəsparav ana ŋgesey, Zlav ka paɗ ka nda maŋga mezlər ara aŋga ana fa yam te ndey tata, afa Zlav ava yaŋ tata ana ka tə yaw da yaŋ mavə jene tata. Kwa Ebel ana ka məcata, a gwaɗandakwa jaka pa makəsparav tata.

⁵Jaka pa makəsparav, Enakw ka ŋgəɗata kad a wudam, afa a da mbəlata fa maməcay. Ndana ka ŋgataw aabay, afa Zlav ka ŋgəɗa avəda kad baymaləvaŋ a cak tata. Eve metehwe ana, wagaa e te ŋgeɗ kad a wudam sə, ka ŋgat matə yaw fa yaŋ tata masa aŋga nda mambəla ana fa yam te ndey ta Zlavay.

⁶Daha ava makəsparav aabay, manjah ta ndana da wafa Zlavay sə, aabay. Eve metehwe ana, a lada nda masa a ŋgucafa vaw Zlavay sə, da kəsaw pa rav tata, Zlav ɓa eve metehwe ana va a pal meyəv ta ndah mayahiya.

⁷Jaka pa makəsparav, Nuwe ka ŋgat mamənak ta Zlavay da yaŋ jə masa e te ŋgə maayaŋ kad fəma kwa ka wala aabay heley. Ka sləkaɗ ma ta Zlavay pe leŋgesl tata, ka cacaɗ kaslkaslah mazlakava ana ta mambəl ndah da hwaɗ ta way tata fakwanay. Ara nesey, Nuwe ka jawa ndah dapa vavara avəda ava ma te metəɗec ma yaŋ, mbalay makəsparav tata, Zlav ka paɗ ka nda maŋga mezlər ara aŋga ana fa yam te ndey tata.

⁸Jaka pa makəsparav, Abəraham dapa masa Zlav a zala sə, ka cənan ma va ke dey kad pa vavara masa a da ŋgat macamiya. Ke dey, amaa kwa ka sən slam masa e də kad pa sə, aabay.

⁹Abəraham ka njah ara məlaŋ dapa vavara masa Zlav ta gwaɗa a ta vanay sə, ava makəsparav tata. Ka njah dapa mekerey ava wudiya hay Izak va Zakwab. Wude hey ana ŋgesey, Zlav ka gwaɗa ma tata daha kad eceŋ, masa e te vecen vavara ana ŋgesey ara aŋga ta gwaɗa papaŋ teceŋ a ta vanay.

¹⁰Abəraham sə, ka ɓal berne masa sek ana mapa daha cay mambəla ana. Maləmada berne ana de ŋgə ara nesey va malamiya sə, Zlavay ava yaŋ tata ana.

¹¹Jaka pa makəsparav, Sara ava yaŋ tata ana may, kwa aŋga marŋgwaz cay e heyə aabay, afa ka kəsaw eve metehwe ana, Zlav a ta ŋgana jə masa ka gwaɗan daha sə, avəda.

¹²Mafay ana, jaka pa nda amta, Abəraham masa a ɓal maməcay sə, ke heyek wude hey, tərsam tata ke yeslə mabay ara menjewzle hay da baymaləvaŋ, ece ŋgef bay ara wurɓaɓay da wayam.

¹³Ndah ana na fakwanay aca məc sə, dapa makəsparav. Ac ka ŋgat jene hay masa Zlav ke gweɗey e te veceŋ sə, aabay, amaa ac ka wala dəga dəreŋ va ec ke wesl da yaŋ ana. Ec ke gweɗey eve metehwe ana, eceŋ sə, ac məlaŋ hay va ndah maŋgway dapa vavara nesey.

¹⁴Ndah megweɗ ara nesey sə, aca wal meŋguzdek eve metehwe ana, ac dapa mayah vavara teceŋ.

¹⁵Ac ka wulakaw da yaŋ vavara masa ece gərek ava dəɓa sə, aabay. Daha ac ka wulakaw sə, efes ac ta ŋgat ha te mevehec kad pa vavara ana saya.

¹⁶Eve metehwe ana, aca yah sə, vavara masa mambəla ana, ara megweɗey slam da baymaləvaŋ. Mafay ana, Zlav ka ŋgə hwar ta mazal yaŋ tata ka Zlav teceŋ sə, aabay. Eve metehwe ana, ke ləmedec berne.

¹⁷Jaka pa makəsparav Abəraham ka vana wudiya Izak avəda ka ta ŋgana kwakwas kad Zlavay dapa masa a cakiya. Ka van wudiya malay ka ta ŋgana kwakwas kwa dapa masa ka gwaɗa daha,

¹⁸Zlav ka gwaɗa, gege: «Jaka pa wudiyak Izak, ka ta ŋgat tərsam takaa hay masa ya ka gwaɗakaa daha.»

¹⁹Abəraham ka wulakaw, kwa nda maməca, Zlav aŋga ava gədaŋ te mepərekek avəda dapa maməcay. Mafay ana, ka ŋgata wudiya Izak avəda, ara nda masa e pərekek dapa maməcay.

²⁰Jaka pa makəsparav, Izak may, ke pəsefec ma wudiya hay: Zakwab va Isuwa da yaŋ jene hay masa ec te ŋgə maayaŋ kad fəma.

²¹Jaka pa makəsparav, Zakwab may, dapa masa mbala a ta məcay sə, ke pəsefec ma wudeh te Zezef. Ke kekəredey, ka ɓəraɗ yaŋ fa daŋgwar, ka ta hahəm Zlavay.

²²Jaka pa makəsparav, Zezef dapa masa mbala a ta məcay sə, ke gweɗec kad Isreyel hay, da yaŋ mevehek tec dapa vavara ta Misəra. Ke gweɗec ma da yaŋ jə masa ac ta ŋgiya ava slaslar tata hay fakwanay.

²³Jaka pa makəsparav, Muyiz, ava dəɓa te meheyek tata, papaŋ va mamaŋ ac ka raɓda kiya mahkar, afa ac ka wala meteh ta wat teceŋ, ec ke lel ta mambərasl ma majawa ta bay aabay.

²⁴Jaka pa makəsparav, Muyiz masa ka gəlata cay sə, ka gwam masa ndana hay aca ra zaliya wut te dəm ta Firawna sə, aabay.

²⁵A wal sə, zuwan aŋga ta ɓəs marga ava ndah ta Zlavay da yaŋ masa aŋga te weslə ta manjah dapa mebərey.

²⁶A wal sə, ndana hay da ŋgada hahar ara te Kəristi, da yaŋ masa aŋga ta ŋgat zleley gaa dapa vavara ta Misəra, afa ka paɗ ndey tata fe meyəv te mezlər tata.

²⁷Jaka pa makəsparav, Muyiz ka gərda vavara ta Misəra, kwa ke lel fe mezem ta rav ta bay aabay. Ka zlacata caŋw caŋw ara a wala Zlav masa e wel bay.

²⁸Jaka pa makəsparav, Muyiz ka ŋgə macunam ta Pak[2]. Ke gweɗec kad Isreyel hay aca ra kucaɗ bembez fa ma ta way tec hay, afa maskəla makəɗa nda ka macəhwandaw sə, e de kəɗec wudeh tec cəvandaw hay sabay.

²⁹Jaka pa makəsparav, Isreyel hay, ac ka zlaŋ yam mafayakfayak ana ta Maliya, ec ke də da yaŋ wurɓaɓay makula. Amaa dapa masa Misəra hay aca cak medə kad pa sə, yam ana ke həlec avəda.

³⁰Jaka pa makəsparav, Isreyel hay ac ka tulak galaŋ te berne te Zeriku manah tasəla, galaŋ ana ka mbəɗata.

³¹Jaka pa makəsparav, Rahab ŋgwaz makəsa vaw fa zaŋ ana ka məc ava ndah magəla yaŋ fa slam ana aabay, afa ke kəsec maslaŋ te Isreyel hay mambəla ana dapa masa ece dey ka ta wuzaɗ berne teceŋ.

³²Yaw, ye de gweɗ mesemey? Pas a ŋgiyey pahata te megweɗek jene hay da yaŋ Zedeyaŋw, Barak, Samsaŋw, Zeftey, Deevet, Semiyel va ndah mehwedek ma,

³³ac masa mbalay jaka makəsparav, ac ke teterec ndah dapa wunam ta bay hay mekele mekele dapa vəram. Ec ke ŋgə mezlər eve cəvey ana ara Zlav ta waya. Ac ka ŋgat jə masa Zlav ke gweɗec e te veceŋ. Ec ke ɓəzlecen ma ta mabar hay.

³⁴Ac ka məca kwakwaw masa e geɗ magamgam ana sə, avəda, ec ke mbəlec fe metew ava kafaya, ac ka ŋgat gədaŋ saya ava dəɓa te mehecey hay, ec ke leldec ndana hay mabay dapa vəram, ec ke teterec kafaraŋ hay ta wunam mekele avəda.

³⁵Jaka pa makəsparav, ŋgwazah ac ka ŋgata ndah tec maməca masa ec ke pərekec dapa maməcay sə, avəda, afa ac ka njah eve ndey saya. Anjəkar ndah mekele ec ke ŋgedec hahar mabay kasl pa maməcay, afa aca ra ŋgat mepərek dapa maməcay va maŋgat manjah eve ndey mafəna ana saya.

³⁶Ndah dərziya saya ac ka ɓəs marga te meseser feceŋ va mekəlepey, ndah ŋgeɗ hay saya, ec ke jeweceŋ ava jajarɓay va meɓəzleɗec pa daŋgay,

³⁷ŋgeɗ hay ec ke kelec avəda eve kekeŋ, dərziya hay ec ke ŋgəlecen vaw tec avəda dapa ecew. Ndah dərziya saya ec ke tewec avəda ava kafaya. Ndah dərziya aca ŋgway saw. Aca pə mbal ta təmak hay va mbal ta ɗakw hay fa vaw ka rəkwat teceŋ. Ac ke tərec maslamarga, ec ke ŋgedec marga, ec ke yehefec ma.

³⁸Anjəkar vavara ana a lada kad ndah ana ŋga bay. Aca ŋgway saw dapa yaŋ ta səɓak hay va dapa wudam hay, aca njahay dapa bədam hay va dapa veɗ hay.

³⁹Ac fakwanay, ac ka ŋgat matə yaw da yaŋ eceŋ mambəla ana mbalay makəsparav teceŋ, amaa ac ka ŋgat jə masa Zlav ke gweɗeceŋ, e te veceŋ sə, ɓasabay.

⁴⁰Eve metehwe ana, Zlav ka ləmadaɗ jə mazlakava ana ha kad andakwa. Zlav ka wal masa aca ra njah ka ndah masa ac ka husata pe memeɗ te jene hay fakwanay, ac babəla sə, aabay, say ac macama ava andakwa.