Read Cuvok Ebəre hay 12 Bible Online

Ebəre hay 12 - Cuvok bible

Ebəre hay 12

¹Ara nesey, andakwa masa andakwa matulaka ava miya ta ndah mata yaw, makuyakwaɗ jene hay masa aca fənandakwa fa gədaŋ va mebər hay masa ac ka tulakandakwa, mahwakwa ava majah vaw fe mecek hay masa ac mapa kad andakwa,

²ava mapə ndey cəɗem cəɗem kad fa Yesu nda masasəraka nda da yaŋ makəsparav masa aŋga ana a hwadiya kasl pe memeɗey ana. Ka kəs mekəɗ ka macəhwandaw fa hap mazləlawa da yaŋ makəs meweslə masa mapa kad aŋga kwa ava hwar dapa ndey aabay. Təlam nesey, aŋga manjaha da ha ta zam ta gwadadakw ta bay ta Zlavay.

³Aŋga, mawulakaw da yaŋ Yesu nda maɓəsa marga ta ndah te mebər hay masa marga ana mapa kad aŋga bay, afa a da gərdakwar, akwar da məca vaw takwar bay.

⁴Dapa vəram takwar eve mebərey sə, akwar ka ŋgat majah vaw kasl pa makəɗ yaŋ takwar sə, aabay heley,

⁵Akwa sənafa ma ta mavə gədaŋ masa magwaɗa kad akwar ara Zlav ta gwaɗa wudeh tata sə, sabay geyey? Ma ana, gege: «Wat aɗaw, ka ta paɗ makət nda ta Bay Mazlakava ara jene taambəla bay, daha a payafakaa, ka ta məca vaw bay.

⁶Eve metehwe ana, Bay Mazlakava a kət sə, nda masa a waya, a kəlap sə, wat masa a piya ara wudiya.»

⁷Zlav a ŋgadakwar hahar sə, a ŋgə a kətakwar. Ara nesey, Zlav a pakwar sə, ara wudeh tata. Eve metehwe ana, wat masa papaŋ a kətiya aabay sə, aabay?

⁸Daha Zlav a kətakwar fakwanay ara wudeh tata aabay sə, ŋgesey, akwar wudeh tata metehwe ana bay, amaa akwar wudeh mehey meeceŋ.

⁹Mawulakakwa da yaŋ papaŋ tandakwa hay dapa vavara, aca kətandakwa, andakwa may, anda nahakwa yaŋ kad eceŋ. Naa anda nahakwa yaŋ kad Papaŋ tandakwa Zlavay ma ta vandakwa manjah eve ndey katar mafəna ana aabay sə, mafay te mey ŋgəɗemey?

¹⁰Aŋga, papaŋ tandakwa hay sə, aca kətandakwa ta manjah kusetke ara mawulak yaŋ tec ta waya. Amaa Zlav Papaŋ tandakwa da baymaləvaŋ a kətandakwa sə, ta maləmadandakwa, afa a wal anda da tərakwa ka ndah mavəna eve jene hay maləza ara yaŋ tata.

¹¹Eve metehwe ana, dapa mekət wula wula sə, anda cənakwaɗ sə, marga, bəna meweslə bay. Amaa ava dəɓa ana kusetke, ndah makəsa mekətey ana sə, ac ta ŋgat manjah mambəla ana masa e heyek metehey va meŋgə mezlər eve cəvey ana.

¹²Ara nesey, mapəla ha takwar hay mayiva, masasala ŋgwermec takwar hay mahahalɓa,

¹³madaɗay dapa cəv manduwak ana, afa sek ta ndah mahahalɓa de zleɓ dapa cəv bay, amaa aca ra mbəlaɗay.

¹⁴Mayah manjah dapa metehey ava ndana hay fakwanay va manjah masa mapana ana fa yam te ndey ta Zlavay, afa daha aabay sə, kwa ndana ma ta wala Bay Mazlakava aabay.

¹⁵Mep leŋgesl, afa kwa nda amta da ŋgwadafa dəɓa mambəla ana ta Zlav bay. Ndana de tər ara wudez masa aŋga ava lak dapa vaw masa a kəɗ nda bay, ara nesey a dadan ndana hay gaa.

¹⁶Mep leŋgesl, akwar ta kəs vaw saw fa zaŋ ana va mapə jə masa e dek da vara Zlavay sə, ke jene taambəla bay. Akwar ta ŋgiya ara Isuwa ta ŋgiya, afa a da ŋgat jə ta mandə ta pas amta war bay. Aŋga sə, ka husamda slam tata masa aŋga wat cəvandaw.

¹⁷Akwa səniya ava dəɓa ana, dapa masa ka wal maŋgat mapəsma da vara papaŋ sə, ka ŋgataw ɓasabay, aŋga mavərzla avəda. Ka ŋgat wewer mekele ta maŋgwadiya sə, ɓasabay, kwa ka yahaw ava makuɗa tata hay.

¹⁸Akwar ka ŋgucafa vaw jə metehwe masa ndana ta pafa ha sə, aabay[3]. Eceŋ sə, ac ka wala masa kwakwaw megemgem ana, zlav ta yam masərata pas, ləvaŋ va bərgadaŋ mazlakava ana te ŋgə da yaŋ ana.

¹⁹Dapa wudam ana, dərem ke fətey, uway ke cənekey. Isreyel hay macəna sə, ac ka wal macak zləmay fa ma ana ɓasabay,

²⁰afa ma masa aca cəna sə, ke fənec fa gədaŋ. Zlav gege: «Nda mapafa ha wudam ana, kwa gənaw, ac da kalaw eve kekeŋ.»

²¹Jə masa ac ta wala sə, ke ŋgec zidaw mabay. Kwa Muyiz maa ke gweɗ, gege: «Ye ke kekesley, afa zidaw ke kəɗiyey.»

²²Amaa akwar sə, akwar ka ŋgucafa vaw wudam ta Siyawna dapa berne ta Zlav masa aŋga eve ndey, Zeruzelem masa aŋga da baymaləvaŋ va maskəla hay tata mabay, masa ac dapa macunam.

²³Asaya, akwar ka ŋgucafa vaw macam yaŋ te wudeh cəvandaw ta Zlavay masa mezel tec mavinda da baymaləvaŋ. Akwar ka ŋgucafa vaw Zlavay, nda me te təɗec ma yaŋ ndana hay fakwanay. Akwar ke ŋgucefec vaw mesfen ta ndah maŋga mezlər eve cəvey ana masa ac ka husata kasl pe memeɗey ana.

²⁴Akwar ka ŋgucafa vaw Yesu, maslamda tandakwa ava Zlavay ta majaw ma waya va mekwec bembez tata masa e hwedek labara mambəla ana ka fəna bembez te Ebel.

²⁵Ara nesey, map leŋgesl, akwar ta ŋgwadafa dəɓa nda masa a gwaɗakwar bay. Ndah masa ac ka gwam macəkafa zləmay nda masa aŋga ta wunakwaɗ zləmay dapa vavara na aabay sə, ec ke mbəl fe mekəlep aabay. Tandakwa sə, Zlav a gwaɗandakwa dəga da baymaləvaŋ, daha anda ŋgwadakwa dəɓa fətiya, andə ta ŋgatakwa mekəlep metehwe ana.

²⁶Aŋga masa zleezle uway tata ka ɓəla vavara, a gwaɗandakwa təlam na saya, gege: «Pal dəɓa amta, dapa mamaɗ yaŋ te jene hay, ya ta ɓəl sə, vavara aŋga amta sabay, amaa ya ta ɓal kwa slam da baymaləvaŋ hay fakwan may.»

²⁷Ma masa e gweɗey, «pal dəɓa amta dapa mamaɗ yaŋ te jene hay» e ŋguzdek jene hay fakwanay masa Zlav ta lamiya sə, ac ta ɓəla vaw, ec te zeceŋ, afa jene hay masa aca ɓəla vaw aabay sə, ac da njah katar.

²⁸Ara nesey, maŋgakwa wasay kad Zlavay, afa andə ta ŋgatakwa wunam ta bay masa a ta ɓəla vaw aabay. Jaka pa wasay ana, maŋgakwa mezlər kad Zlavay jaka pe cəv masa a da wafa, ava manah yaŋ kad aŋga va melel fətiya.

²⁹Eve metehwe ana, Zlav tandakwa sə, aŋga ara kwakwaw masa a ndə nda.