Read Cuvok Ebəre hay 13 Bible Online

Ebəre hay 13 - Cuvok bible

Ebəre hay 13

¹Madaɗay fəma fəma ava mawal vaw dapa taɓa takwar ara akwar malamaŋ va dəmaŋ hay.

²A ta pəsakwar dapa yaŋ ta makəs məlaŋ hay bay, afa mbalay jaka pe cəvey ana ara nesey, ndah dərziya ac ka kəs maskəla hay kad way teceŋ kwa eve mesənec aabay.

³Masənafa ndah dapa daŋgay ara akwar eve eceŋ dapa daŋgay ana. Asaya, masənafa ndah masa ndana hay ece ŋgedec marga, afa akwar may, akwar ava vaw ara eceŋ.

⁴A lada kwa waawa da nahda yaŋ kad pa ma ta macam vaw ta mawal va ŋgwaz. Kelvek ta ndah va ŋgwaza sə, a lada de zleɓ bay, afa ndah makəsa vaw fa zaŋ ana va ndah maŋga madama sə, Zlav e te təɗec ma yaŋ.

⁵A lada mawal səlay elehey sə, da ŋgə bay da yaŋ manjah takwar bay. Mewesley da yaŋ jə masa akwar ava aŋga ɓa, afa Bay Mazlakava ava yaŋ tata ana, gege: «Away, ya ta pəlakaa aabay, ya ta gərdakaa aabay.»

⁶Mafay ana, anda zlafa magwaɗakwa ava zidaw ɓasabay: «Bay Mazlakava sə, aŋga nda mejəniyey, kwa ya ta ŋgə zidaw fe jene aabay, ndana sə, e te ŋgiyey ɓa mey?»

⁷Masənafa mesnendə takwar hay maŋguzdakwar ma ta Zlavay. Mawuzaɗa manjah teceŋ kasl pe memeɗey ana va mazazahw makəsparav teceŋ.

⁸Yesu Kəristi sə, aŋga ara aŋga ana, taavanay, pəsna va katar ka midakw.

⁹Akwar ta vana cəv kad ndana da fəcakwar eve mesesərek hay masa ac wal ava masa akwar ka cəna cay sə, bay. Mambəla sə, masasala rav takwar dapa mambəla ana ta Zlavay, bəna da yaŋ kwakwas te jə ta manday masa e te jənec ndah manaha yaŋ kad pa sə, bay.

¹⁰Andakwa sə, andakwa ava slam te meŋgeŋgez təbekw kad Zlav ɓa masa ndaakwas hay te Zuwef hay ec eve cəv ta mandə jə masa mapa da yaŋ slam ana sə, aabay.

¹¹Mazlakava ta ndaakwas hay sə, e sehw eve bembez ta gənaw hay kad pa slam mavəna macəkuma bay, e de ŋgə kwakwas te mepəlecen mebər ta ndana hay, amaa slaw ana sə, aca ndaliya da vəda ta taɓa ta wunam.

¹²Mafay ana, Yesu a məc da vəda te berne sə, afa e de penec ndana hay avəda dapa mebər teceŋ eve bembez tata.

¹³Amcakwa kad a vəda ka ta cə yaŋ ava Yesu, afa anda da ɓəsakwa melef hay masa ac ta lafiya sə, may.

¹⁴Dapa vavara nesey sə, andakwa dapa berne masa a ta njah katar ka midakw sə, aabay, amaa andakwa dapa mayah berne masa maayaŋ kad fəma.

¹⁵Ara nesey, jaka pa Yesu maŋgakwa wasay kad Zlav cəɗem cəɗem ara mavə jene taambəla. Ara megweɗey, mahahəmakwa mezel tata ava ɗaf ta ma tandakwa.

¹⁶A ta pəsakwar dapa yaŋ te meŋgə jene mambəla ana va majən vaw fa vaw takwar bay, afa mezlərey ana hay nesey sə, ac kwakwas hay masa aca wafa Zlavay.

¹⁷Menehecen yaŋ kad mesnendə takwar hay va mecənecen ma. Eve metehwe ana, ece pə ndey cəɗem cəɗem fe mesfen takwar hay, afa ac ta gwaɗan jə masa ac ta ŋgiya sə, kad Zlavay. Ara nesey ec te ŋgə mezlər teceŋ eve mewesley, bəna eve mehwehwer masa a ta jənakwar kwa kusetke aabay bay.

¹⁸Macə mbahw mafay taciya, afa anda səniya tehwe mawulak ta rav taciya aŋga mapana. Eve metehwe ana, cəɗem cəɗem anda yah meŋgə jə mambəla ana.

¹⁹Macə mbahw, ya nəkafakwar ava matəkafa ha ma ana, afa ya da vahaɗ kad varakwar zef.

²⁰A lada Zlav nda mavana metehey, mevehek Bay tandakwa Mazlakava Yesu dapa maməcay, masa aŋga gwala jene mazlakava jaka pe bembez ta majaw ma katar ka midakw,

²¹da vakwar gədaŋ te meŋgə jene hay fakwanay mambəla ana, afa akwar de ŋgə jə masa a waya. Da lada sə, jə masa a wafa jaka pa Yesu Kəristi de ŋgə dapa andakwa, mehehəm de ŋgə kad aŋga katar ka midakw. E de ŋgey!

²²Malama va dəma hay, ya ŋgakwar mbahw ta maɓəs ma hay ta mavə gədaŋ nesey, afa ma hay masa ya ta vindakwar nesey sə, ac zambəla aabay.

²³Ya wal ma ta ŋguzdakwaɗ sə, malamaŋ tandakwa Timawtey ka dakata a vəda dapa daŋgay. Daha ka ta husakata zef vereyey fana sə, andə ta daɗ ka ta wuzaɗakwar cuweeney.

²⁴Megweɗefec mesnendə takwar hay va makəsparav hay dərŋga fakwanay. Malamaŋ tandakwa hay dapa vavara ta Itali, aca gwaɗafakwar may.

²⁵A lada mambəla ana ta Zlav da njah ava akwar fakwanay.