Read Cuvok Ebəre hay 2 Bible Online

Ebəre hay 2 - Cuvok bible

Ebəre hay 2

¹Mafay ana, a lada anda pakwa leŋgesl kad veŋ ana fa ma masa andə ta cənakwaɗay, daha anda walakwa mazə bay,

²afa daha ma masa maskəla hay ta sləfiya zleezle ke ŋguzdek mehehəm tata, daha ndah masa ac ka pə leŋgesl fətiya aabay, daha aabay ac ka nahan yaŋ aabay, ac ka ŋgat mekətey.

³Naa andə da mbəlakwa fe mekətey ana na gwagumaw, daha anda pakwa membəl mazlakava nesey ke jene taambəla? Afa membəley ana nesey Bay Mazlakava ava yaŋ tata ana ka sləfa avəda kamma. Ava dəɓa ana, ndah macəna ma tata ana sə, ac ka ŋguzdandakwaɗ eve metehwe ana.

⁴Dapa ŋgesey ana, Zlav ka təkafa ha matə yaw teceŋ ana jaka pe meŋgə cah hay va meŋgə mezlər hay marəzla nda mekele mekele. Asaya, jaka pa gədaŋ te mezlər hay masa Mesfen Mavəna ta vəniya kad ndana hay ara aŋga ta waya.

⁵Anda gwaɗakwa nesey sə, da yaŋ vavara masa e te dekey. Bəna da yaŋ maskəla hay masa Zlav ka paɗ gədaŋ ta vavara nesey pa ha teceŋ sə, bay.

⁶Sesəker ndana ɓa dapa Ɗelewer mavəna, gege: «Ndana sə, aŋga waawa masa ka da sənafa? Ndamagəda sə, aŋga waawa masa ka da pafa ndey?

⁷Ka ka paɗ ndana ke kusetke fəma ta maskəla hay. Ka ka vana mehehəmey va mahahəlan yaŋ.

⁸Ka ka paɗ jene hay fakwanay a hwaɗ ta ha tata.» Ava mapaɗ jene hay fakwanay a hwaɗ ha tata, Zlav ka gərda jene kwa amta masa a da njah da hwaɗ ta ha tata bay sə, aabay. Amaa təlam nesey, anda walakwaɗ masa jene hay fakwanay ac mapa da hwaɗ ta ha ta ndana cay sə, aabay heley.

⁹Amaa, anda ɗalakwa jene amta ɓa: Yesu ka tərata kusetke fəma ta maskəla hay ta manjah gaa aabay, təlam nesey, anda walakwaɗ Zlav ka vana mehehəmey va mahahəlan yaŋ mafay ta maməc masa aŋga ta sə marga. Ara nesey, jaka pa mambəla ana ta Zlavay, Yesu ka məcata mafay ta ndamagəda fakwanay.

¹⁰Eve metehwe ana, a lada Zlav masa malama jene hay va matəhaza jene hay fakwanay, mabaŋgaɗa Yesu kad pe memeɗ te jene hay fakwanay jaka pa marga hay, afa e de hwedec wudeh gaa kad pe mehehəm tata. Afa Yesu sə, aŋga nda mehwedec kad pe membəley.

¹¹Anjəkar Yesu, nda mapana ndana hay dapa mebər teceŋ va ndah masa ac mapana dapa mebərey sə, Papaŋ tec amta. Mafay ana, Yesu ka ŋgə hwar te mezelec malama va dəma hay sə, aabay.

¹²Yesu, gege: «Awa Zlavay, ya ta slaf mezel takaa kad malama va dəma hay, ya ta hahəmakaa dapa taɓa ta macam yaŋ fakwanay.»

¹³Ke gweɗ saya, gege: «Yey sə, ya ta paɗ map nda mambəla ana taaɗaw dapa Zlavay.» Asaya, ke gweɗ, gege: «Ya kana, yey ava wudeh masa Zlav ta vuwa.»

¹⁴Ara nesey, ara masa wude hey ana ac macama dapa slaw ta vaw va dapa bembez, Yesu ava yaŋ tata ana ka kəs manjah ara eceŋ, afa a da mbərasla gədaŋ ta bay ta haalay matəhaza matimaazlaɓ ta maməc sə, avəda

¹⁵va e de mbəlec ndah fakwan masa ac dapa ɓel ta zidaw fa maməcay dapa manjah teceŋ.

¹⁶Afa Yesu e dek sə, ka ta jən maskəla hay bay, amaa ka ta jən tərsam ta Abəraham.

¹⁷Mafay ana, efes aŋga te metər dapa jene hay fakwanay ara malamaŋ va dəmaŋ hay, afa e de tər ka mazlakava ta ndaakwas hay manəha eve metekweney va makwaɗma dapa mezlər ta Zlavay, afa e de vevəsecen mebər ta tərsam hay avəda.

¹⁸Təlam nesey, a zlafa mejənec ndah masa ac dapa mecekey, afa aŋga ava yaŋ tata ana ke dey jaka pe mecekey va jaka pa marga.