Read Cuvok Ebəre hay 3 Bible Online

Ebəre hay 3 - Cuvok bible

Ebəre hay 3

¹Ara nesey, malama va dəma hay dapa Macam yaŋ ta ndah ta Zlavay, masa Zlav da baymaləvaŋ ta zalakwar. Map ndey fa Yesu masa aŋga mazlakava ta ndaakwas hay masa anda kəsakwa ma tata.

²Aŋga sə, aŋga nda maŋga mezlər eve cəvey ana fa yam te ndey ta Zlav mapaɗ ke te ŋgə mezlərey ana nesey ara Muyiz ta ŋgiya dapa way ta Zlav fakwanay.

³Aŋga sə, aŋga mahahəma ka fəna Muyiz, ara nda malama way ta fəna way ana eve mehehəmey.

⁴Eve metehwe ana, way fakwanay sə, nda malamiya ɓa, nda malama jene hay fakwanay sə, Zlavay.

⁵Muyiz ka njah nda maŋga mezlər eve cəvey ana dapa way ta Zlavay ara nda maŋga mezlərey. Ka tə yaw fe jene hay masa Zlav e te gweɗ da yaŋ ana.

⁶Amaa Kəristi sə, aŋga ara wat da hwaɗ ta way ta Zlavay, masa aŋga mapa da yaŋ way tata ana. Way tata sə, andakwa ana, daha anda raɓakwaɗ ma tata masa anda ta kəsakwa va maɓəl jə masa Zlav a ta vandakwa eve mewesley.

⁷Mafay ana, ara masa Mesfen Mavəna te gweɗey: «Ta pəsna nesey, daha akwa cəna uway tata,

⁸akwar ta sasala rav takwar hay ara Papaŋ ta Papaŋ takwar hay ta ŋgərafa Zlav zleezle dapa pas te mecekey dapa yaŋ ta səɓak bay,

⁹masa papaŋ takwar hay ac ke peɗiyey pe mecekiyey jaka pa mayah mewzeɗiyey afa aca ra wala mezlərey aɗaw

¹⁰dapa mavay kwakwar faɗ. Mafay ana, ye ke zəmefec rav, ye ke gweɗey: Cəɗem cəɗem rav tec e zlekey, ndah ana ŋgesey, ac ka cəna jə masa ya ɓəliya vara eceŋ sə, aabay,

¹¹afa ye ke mbeɗey dapa mazam ta rav aɗaw, ye ke gweɗey, kwa ec te sehw pa masasak vaw sə, aabay.»

¹²Malama va dəma hay, mep leŋgesl! A fa kwa nda amta takwar da ŋgat rav masa e teh bay va rav masa masasala bay, afa daha aabay sə, a ta hwadaɗ pa maŋgwadafa dəɓa Zlav masa aŋga eve ndey,

¹³amaa mavə gədaŋ dapa taɓa takwar amta va amta, fa pas fa pas, dapa masa akwa cəna ma ta Zlav pəsna nesey, afa kwa nda amta da sasala rav tata bay, mebər da zlafa mafəciya bay.

¹⁴Eve metehwe ana, andə ta tərakwa ka ndah maŋga mezlər ava Kəristi, daha anda təhazakwa mambəla ana map nda tandakwa ka nda mambəla ana masa dəga dapa mezlerey ana kasl pe memeɗey ana,

¹⁵ara nesey, magwaɗa ana daha, gege: «Ta pəsna daha akwa cəna uway tata, akwar ta sasala rav takwar hay ara dapa pas masa papaŋ ta papaŋ takwar hay ta gərafa Zlav bay.»

¹⁶Macəna uway ta Zlavay va masa ac ka ŋgərafa sə, wa hay wa? Naa ndah masa Muyiz te həlekec fakwanay dapa vavara ta Misəra?

¹⁷Zlav a zam rav mavay kwakwar faɗ sə, da yaŋ wa hay wa? Naa da yaŋ ndah maŋga mebər hay, kasl pa masa macəhwandə tec hay ka kwakwacata fakwanay dapa yaŋ ta səɓak?

¹⁸Zlav ke mbeɗey: Kwa ec te sehw pa masasak vaw aɗaw masa ya ta ləmadiya aabay sə, da yaŋ wa hay wa? Naa, mafay ta ndah maŋgərafa?

¹⁹Eve metehwe ana, anda sənakwa, ec ke sehw pa slam ta masasak vaw ana aabay sə, afa rav tec masasala.