Read Cuvok Ebəre hay 4 Bible Online

Ebəre hay 4 - Cuvok bible

Ebəre hay 4

¹Zlav ka gərandakwa ma tata magwaɗa ana daha te mesehw pa slam ta masasak vaw masa aŋga ta ləmadandakwaɗ ha. Ara nesey, mapakwa leŋgesl, afa kwa nda amta deveŋ akwar a da ŋgat mesehw pa bay, bay,

²afa andə ka ŋgatakwa Labara mambəla ana ara papaŋ ta papaŋ tandakwa hay ac ka ŋgataw dapa yaŋ ta səɓak sə, may. Amaa ma ana masa ac ta cəna sə, ke jənec kwa kusetke aabay, afa masa ac ta cəna sə, ac ka kəsaw ava makəsparav aabay.

³Tandakwa masa andə ka kəsakwa ma ana pa rav sə, andə ta sahwakwa pa slam ta masasak vaw ana. Mafay ana Zlav ke gweɗ, gege: «Dapa mezem ta rav aɗaw, ye ke mbeɗey: “Kwa ec te sehw pa masasak vaw masa ya ta ləmadiya kad eceŋ sə, aabay!”» Zlav e gweɗ ara nesey sə, anjəkar ka ndəvda mezlər tata ana cay dəga dapa mezler ta vavara.

⁴Eve metehwe ana, ma magwaɗa ɓa da yaŋ pas ta masasak vaw, gege: «Zlav ka sasak vaw manah matasəla ana dapa mezlər tata hay fakwanay.»

⁵Magwaɗa saya dapa ma tata, gege: «Kwa ec te sehw pa masasak vaw aɗaw masa ye te ləmedecen sə, aabay.»

⁶Ndah macaaca ana macəna Labara mambəla ana ac ka ŋgat mesehw pa aabay sə, afa ac ka gwam ta manah yaŋ kad pa aabay. Anjəkar, kad ndah dərziya sə, cəv ɓa kad ec heley te mesehw kad pa.

⁷Mafay ana, Zlav ka pə manah waya, a zala manahay ana pəsna. Eve megweɗ jaka pe Deevet manah gaa ava dəɓa ana, ara masa magwaɗa ana da wudam, gege: «Pəsna, daha akwa cəna uway tata sə, akwar ta sasala rav takwar hay bay.»

⁸Eve metehwe ana, daha Yasuwa ke hwedeɗec Papaŋ ta Papaŋ tandakwa hay pa slam ta masasak vaw masa Zlav ta ləmadiya kad eceŋ sə, ŋgesey, efes Zlav e te gweɗ da yaŋ pas mekele ava dəɓa ana sə, ɓasabay.

⁹Ara nesey, masasak vaw ara ta manah matasəla ana sə, aŋga mapa kad ndah ta Zlavay,

¹⁰afa nda masa ke sehw pa masasak vaw masa Zlav ta ləmadiya sə, aŋga ava yaŋ tata ana may ka paɗ yaŋ tata pa masasak vaw dapa mezlər tata ara masa Zlav ta sasak vaw dapa mezlər tata.

¹¹Mafay ana, maŋgakwa gədaŋ te mesehw pa masasak vaw ana ŋgesey, afa mececel ta masasal yaŋ ta papaŋ ta papaŋ tandakwa hay, da hwad kwa nda amta kad pa mazə bay.

¹²Ma ta Zlavay sə, aŋga eve ndey, aŋga ava gədaŋ macəkuma bay. E zem macəkuma bay ka fəna kafaya masa ma ana ecew. E sehw kasl pa mavən meezeŋ va mesfeney, mevez hay va zarɗak hay, a təɗana ma yaŋ mekekesl ta vaw hay va mawulak yaŋ hay ta rav ta ndana.

¹³Jene malama masa a zlafa maraɓata fa yam te ndey tata sə, aabay. Jene hay fakwanay mawurɗa fa yam te ndey tata, ndey tata a wala jene hay fakwanay. Andakwa fakwanay, andə ta gwaɗakwa jə masa anda ŋgakwa sə, kad aŋga, fəma tata.

¹⁴Andakwa ava mazlakava ta ndaakwas hay masa aŋga ava gədaŋ ɓa, masa ka husata kasl vara Zlavay. Aŋga sə, Yesu, wut ta Zlavay. Ara nesey, matəhazakwaɗ jə masa anda kəsakwa sə, mambəla ana.

¹⁵Mazlakava ta ndaakwas hay tandakwa sə, a zlafa maɓəsa marga hay ava andakwa dapa bəle tandakwa hay bay sə, aabay. Ac ka caka mafəciya dapa jene fakwanay ara andakwa, amaa kwa ke ŋgə mebər aabay.

¹⁶Ara nesey, andə ta ŋgakwa zidaw ta maŋguc vaw kad vara gwadadakw ta bay ta Zlavay dapa slam tata mambəla ana masa a ŋgə bay dapa sə, bay. Dərŋga sə, andə ta ŋgatakwa metekweney va mambəla ana tata, afa andə da mbəlakwa dapa pas masa andakwa dapa marga.