Read Cuvok Ebəre hay 5 Bible Online

Ebəre hay 5 - Cuvok bible

Ebəre hay 5

¹Mazlakava ta ndaakwas hay fakwanay sə, ece kəsek deveŋ ndana hay, aŋga mapa te meŋgə mezlər kad Zlavay mafay ta ndana hay. Mezlər tata sə, ta mavə jene hay va meŋgə kwakwas kad Zlavay mafay te mebər hay.

²Aŋga ava yaŋ tata ana a zlafa macəna jə masa e ŋgə dapa ndah masa ece sən jene bay va masa ece zlekey, afa aŋga ava yaŋ tata ana sə, bəle hay ka ŋgatafa vəla vəla fakwanay.

³Mafay te bəle ana hay ŋgesey, a lada a və jene te meŋgə kwakwas kad Zlavay. A viya ana sə, mafay te mebər ta ndana hay babəla bay, amaa mafay te mebər tata hay may.

⁴Ndana mazlafa mavana mehehəm kad yaŋ tata ta manjah ka mazlakava ta ndaakwas hay ava yaŋ tata sə, aabay. Meŋgetey ana sə, jaka pa mazal nda ta Zlavay ara aŋga ta zal Harawna.

⁵Ara aŋga ana Kəristi may, ka vana mehehəm kad yaŋ tata ta manjah ka mazlakava ta ndaakwas hay ava yaŋ tata sə, aabay. A ŋgatiya sə, da vara Zlavay masa ka gwaɗa, gege: «Kaa sə, ka wat aɗaw, ta pəsna nesey, ya Papakw.»

⁶Ara masa ma mekele ɓa te gweɗ, gege: «Ka ndaakwas katar ka midakw ara ta Malkisadaka.»

⁷Dapa manjah te Yesu dapa vavara sə, ka cana mbahw va makəɗ ha ava macə lalaw mazlakava ana va makuɗafa Zlav masa aŋga ava gədaŋ ta mambəliya dapa maməcay. Ara nesey, Zlav ka cəna makuɗa tata mafay ta manah yaŋ tata.

⁸Kwa aŋga Wut ta Zlavay sə, ka sasərak manahan yaŋ jaka pa marga masa aŋga ta siya.

⁹Masa Zlav ka təraɗ ka nda mahusata pe memeɗ te jene hay fakwanay cay sə, ka njahata kad ndah manahan yaŋ fakwanay, nda masa aca ra ŋgat membəl katar ka midakw jaka vara vaw.

¹⁰Zlav ka paɗ ka mazlakava ta ndaakwas hay ara ta Malkisadaka.

¹¹Da yaŋ ma ana nesey, andaw eve jene hay gaa te megweɗey, amaa gədaŋ dapa ta maŋguzdakwaɗ ma da yaŋ ana, afa akwar ka tər takwar ka ndah matəhwahwam ta macəna jene.

¹²Eve metehwe ana, efes aabay dəga zleezle akwar ka tər takwar ka ndah masasəraka ndana hay. Amaa təlam nesey, akwa wal sə, ndana hay da sasərakakwaɗ jene hay macaaca ana ta ma ta Zlavay sə, saya. Akwa hwar sə, masə wa saya, bəna ɗaf masa masasala bay.

¹³Nda masa a sə wa babəla sə, aŋga wat gwendez heley, jə mambəla ana va mambəla ana aabay sə, a sən mevənec bay.

¹⁴Amaa ta ndah mazlakava hay sə, ac mak ta mandə ɗaf masa masasala ana, afa ac ka sasəraka leŋgesl tec mambəla ana, aca san mavən jə mambəla ana va mambəla ana bay.