Read Cuvok Ebəre hay 6 Bible Online

Ebəre hay 6 - Cuvok bible

Ebəre hay 6

¹Ara nesey, magərakwaɗ mesesərek hay macaaca ana da yaŋ Kəristi ka ta baŋgaɗandakwa kad pe mesesərek ta mazlakava hay. Andə ta vahakwa kad pe mesesərek hay te mezlerey ana bay, ara megweɗey: Meŋgwedek rav dapa mezlər hay masa aca hwad nda kad pa maməcay va makəs ma ta Zlavay.

²Andə ka sasərakakwa da yaŋ beetem hay, map ha a yaŋ ndana hay, mepərekek ta ndana hay dapa maməcay va mataɗ ma ta Zlavay masa katar ka midakw.

³Mawala jə masa andə ta ŋgiya, daha Zlav ka walaw.

⁴Gədaŋ dapa kad ndah masa pas amta ac ka ŋgat manjah dapa slam mawaɗa ta Zlavay, ac ka caka mevə jene taambəla masa e dek da baymaləvaŋ, ac ka ŋgat meven ta ma te Mesfen Mavəna,

⁵ac ka caka mecen ta ma mambəla ana ta Zlavay va gədaŋ ta vavara maayaŋ kad fəma,

⁶ava aŋga ana fakwanay, ec ke təɗec pe cəv tec mezleezle ana saya. Gədaŋ dapa kad eceŋ te mehwedec kad pa maŋgwad rav teceŋ saya, afa a tərata ara ac ta zləlaw Wut ta Zlavay fa hap ke ecew saya. Ara nesey, ece ŋgə sə, aca wal ndana hay aca ra laf Wut ta Zlavay.

⁷Daha vavara a sə yam masa a slek kad yaŋ ana cəɗem cəɗem sə, vavara ana e pəcek jene hay mambəla ana kad ndah mahəviya. Ara nesey, vavara ana a ŋgat meven ta ma ta mapəsma tata da vara Zlavay.

⁸Amaa daha vavara ana, e pəcek mətak hay va gamslak hay masa mətak fətiya sə, ŋgesey, vavara ana mambəla ana aabay. A ta njah gaa ɓasabay, Zlav a ta gwadara avəda, mamaɗ yaŋ ana sə, a ta ndalata.

⁹Takwar guula aaɗaw hay masa ya walakwar elehey, anda səniya eve metehwe ana, eve megweɗ fakwan ara nesey sə, masa akwar dapa cəv mambəla ana, cəvey ana sə, te membəley.

¹⁰Eve metehwe ana, Zlav sə, aŋga nda maŋga mezlər eve cəvey ana. A sənafa mezlər takwar va mawal nda takwar masa akwar ta ŋguzdiya mafay te mezel tata ava mapaɗ yaŋ takwar pe mezlər ta ndah ta Zlavay zleezle va pəsna nesey.

¹¹Amaa mawulak yaŋ taciya sə, anda wal kwa waawa takwar de ŋguzdek maŋgaŋgar vaw ana ara aŋga ana ta makəs mawulak yaŋ te meɓəl jene kad pe mezlezlen tata kasl pe memeɗey ana,

¹²kwa ava mazlac maŋgə gədaŋ takwar bay, amaa ava mazazahw ndah masa jaka pa makəsparav va mepəsek aca ŋgat macam jene hay masa Zlav ka gwaɗa daha, ac ka ŋgat jə masa Zlav te gweɗeceŋ, e te veceŋ.

¹³Masa Zlav e gweɗ a ta ŋgana jene kad Abəraham sə, ke mbeɗey eve mezel tata ana, afa ndana mekele mafəna masa e de mbeɗ ava aŋga sə, ɓasabay.

¹⁴Ara nesey, gege «Eve metehwe ana, ya ta nəhakaa ava mapəsma, ya ta vakaa wudeh gaa macəkuma bay.»

¹⁵Masa Abəraham a cəna ma ana sə, ka ɓəlaw eve mepəsek. Ara nesey, ka ŋgat jə masa Zlav ka gwaɗa a ta vana.

¹⁶Daha ndana hay ece mbeɗey sə, ece mbeɗ eve mezel ta nda mazlakava masa aŋga da yaŋ eceŋ. Membeɗey ana ŋgesey, aŋga ara jene magəha dapa taɓa ta ndana hay.

¹⁷Eve cəvey ana nesey, Zlav a wal meŋguzdecen saya kad ndah ma ta cama jene tata masa aŋga te gweɗeceŋ e te veceney sə, aca ra səna tehwe Zlav a ta ŋgwada mawulak yaŋ tata aabay. Mafay ana, ka pana membeɗ kad yaŋ ma tata magwaɗa ana daha.

¹⁸Ara nesey, mezlər hay ecew nesey sə, ec te ŋgwed aabay. Dapa ma magwaɗa ana daha va membeɗ tata sə, Zlav a zlafa maŋgal ma dapa aabay. Nesey ana sə, a vandakwa gədaŋ macəkuma bay. Ara nesey, andakwa masa andə ka gərakwaɗ jene hay fakwanay ka ta təhaz mawulak yaŋ ta maŋgat jene masa magwaɗa ana daha kad andakwa.

¹⁹Mawulak yaŋ ta maŋgat jene ana ŋgesey, a təhaz mesfen tandakwa caŋw caŋw ara ɓəray ta mazlac kaslkaslah. Mafay ana, anda sahwakwa jaka pa magambargambar marana slam mavəna macəkuma bay sə, kasl pa slam masa Zlav aŋga dapa da baymaləvaŋ.

²⁰Pa slam masa Yesu ka ŋgəlandakwaɗ ma kad pa mafay tandakwa, afa aŋga sə, aŋga mazlakava ta ndaakwas hay katar ka midakw ara ta Malkisadaka.