Read Cuvok Ebəre hay 7 Bible Online

Ebəre hay 7 - Cuvok bible

Ebəre hay 7

¹Malkisadaka, bay ta Salem, aŋga ndaakwas ta Zlav da Wudam. Ke dey ka ta cə yaŋ ava Abəraham, dapa masa Abəraham e vehek dapa vəram ava bay hay sə, ka pəsafa ma.

²Abəraham a və zaka sə, kad aŋga. Malkisadaka sə, aŋga eve mezel masa a wal megweɗ: «Bay te meŋgə mezlər eve cəvey ana.» Asaya, aŋga «bay ta Salem», ara megweɗey, «bay te metehey.»

³Aŋga ana sə, kwa papaŋ aabay, kwa mamaŋ aabay, kwa papaŋ ta papaŋ tata hay aabay. Asaya, kwa pas te mehey tata va pas ta maməc tata sə, ndana a səniya bay. Aŋga sə, aŋga ara Wut ta Zlavay, a ta njah ka ndaakwas ta Zlavay katar ka midakw.

⁴Mawala mehehəm ta Malkisadaka! Abəraham papaŋ ta papaŋ tandakwa zleezle ka vana zaka te meven ta ma mambəla ana te jene hay masa aŋga te pəreslek dapa vəram.

⁵Ma majawa ta Muyiz a və cəv kad ndaakwas hay dapa tərsam te Levi, gege: Aca ra nak zaka te jene hay masa tərsam te Isreyel hay ta ŋgatiya fakwanay, ara megweɗey vara malamaŋ tec hay, masa anjəkar tərsam ta Abəraham.

⁶Malkisadaka sə, aŋga dapa tərsam te Levi ana aabay. Amaa ka ŋgat zaka dapa ha ta Abəraham. Kad veŋ ana saya, ka pəsafa ma nda masa ka ŋgat ma hay magwaɗa ana daha ta Zlavay.

⁷Kwa mawulak yaŋ da yaŋ ana aabay, nda mapəsa ma kad ndana sə, aŋga nda mazlakava da yaŋ nda maŋgata mapəsma ana.

⁸Fana nesey sə, ndah makəsa zaka sə, ac ndah masa pas leŋgeɗey ac ta məcata. Amaa a fana sə, anda gweɗ da yaŋ nda masa aŋga manjaha katar ka midakw.

⁹Ke te gweɗ fakwanay, jaka pa Abəraham, Levi ana makəsa zaka ŋgesey sə, ka nah yaŋ kad pa zaka.

¹⁰Kwa Levi ana ke heyek aabay heley sə, ara aŋga ɓa cay jaka pa Abəraham, papaŋ ta papaŋ dapa masa aca cə yaŋ ava Malkisadaka.

¹¹Dapa ma majawa te Isreyel hay, aca yah ka ndaakwas hay sə, wudeh dapa ta tərsam te Levi. Ac ndaakwas hay ara Harawna. Amaa mezlər ta ndaakwas teceŋ ana ŋgesey, ka zlafa mandəvda mezlərey ana fakwan aabay, efes daha ka zlafa sə, andə ta yahakwa ndaakwas mekele ara Malkisadaka sə, ɓasabay. Nesey ana sə, a ta jəna nda aabay.

¹²Daha mezlər ta ndaakwas hay ka ŋgwadata sə, ŋgesey, ma majawa a ŋgwadata may.

¹³Ta Bay tandakwa Mazlakava masa ma ana hay nesey te gweɗ da yaŋ ana sə, tərsam tata wal. Kwa nda amta dapa tərsam tata ke ŋgə mezlər ta ndaakwas fa slam meŋgeŋgez təbekw sə, aabay.

¹⁴Ara masa anda sənakwa mambəla ana, Bay tandakwa Mazlakava sə, e heyek jaka pa tərsam ta Zuda. Dapa masa Muyiz e gweɗ fa ndaakwas hay sə, kwa ke gweɗ da yaŋ tərsam ana na aabay.

¹⁵Ma ana aŋga mapana mambəla ana saya daha ndaakwas mekele masa e təhekey sə, aŋga ara Malkisadaka.

¹⁶Ke tər ka ndaakwas ara kwakwas hay masa ndana hay ta jawiya sə, aabay, amaa e tər sə, jaka pa gədaŋ mazlakava ta manjah masa e te nes aabay.

¹⁷Eve metehwe ana, Ɗelewer mavəna, gege: «Ka ndaakwas katar ara ta Malkisadaka.»

¹⁸Ara nesey, ma majawa mezleezle ana sə, mavavəsa avəda, afa aŋga ava gədaŋ ɓasabay va a jəna nda ɓasabay.

¹⁹Ma majawa ta Muyiz ana ŋgesey, ka zlafa matəra ndana hay ka ndah mambəla ana fa yam te ndey ta Zlavay sə, aabay. Amaa Zlav ka vandakwa mawulak yaŋ ta maŋgat jene masa aŋga mazlakava ka fəna ma majawa, mbalay mawulak yaŋ ta maŋgat jene ana ŋgesey, anda zlafakwaɗ maŋgucafa vaw Zlavay.

²⁰Kad veŋ ana saya, mezlərey ana ŋga e de ŋgey sə, eve membeɗey. Ta ndah dərziya ece tər ka ndaakwas hay sə, eve membeɗey ana ŋga aabay,

²¹amaa ta Yesu, e tər ka ndaakwas sə, jaka pe membeɗ masa Zlav ta gwaɗiya da yaŋ ana, gege: «Yey Bay Mazlakava, ya ta vahda ma aabay, ye ke mbeɗey: “Ka ndaakwas katar.”»

²²Nesey ana, a wal megweɗey, mbalay Yesu, majaw ma masa Zlav ta ŋgiya ava andakwa sə, a fəna majaw ma macaaca ana gaa.

²³Kad veŋ ana saya, ndaakwas hay ke ŋgə mabay, afa maməc ke vec cəv ta manjah cəɗem cəɗem ka ndaakwas hay sə, aabay.

²⁴Amaa ta Yesu sə, mafay ta masa a njah ka katar sə, kwa ndana mekele masa a ta njah ka ndaakwas pa slam tata sə, aabay.

²⁵Mafay ana, a zlafa membəlec ndah maŋgucafa vaw Zlavay jaka pa aŋga jaka pe cəv masa katar, afa aŋga sə, aŋga manjaha cəɗem cəɗem eve ndey ka ta cə mbahw pa slam teceŋ.

²⁶Yesu, mazlakava ta ndaakwas hay masa da lada kad andakwa. Aŋga sə, aŋga mavəna, ke ŋgə jə mambəla ana aabay sə, aabay, ke ŋgə mebər aabay, Zlav ka vəna avəda ava ndah te mebər hay va ka ŋgəɗa avəda kad a wudam a baymaləvaŋ.

²⁷Aŋga sə, ka hwar mavə jene ara mazlakava hay ta ndaakwas hay dərziya ta və jene ta kwakwas fa pas fa pas mafay te mebər hay teceŋ va te mebər hay ta ndana hay sə, aabay. Ka və yaŋ tata ana pal dəɓa amta katar.

²⁸Ma majawa ta Muyiz a pə ka ndaakwas hay sə, ndah bəle hay. Amaa nda masa Zlav ka paɗ ka mazlakava ta ndaakwas hay eve membeɗey ava dəɓa ta ma majawa sə, Wudiya masa a zlafa maŋgana jene hay avəda fakwanay katar.