Read Cuvok Ebəre hay 9 Bible Online

Ebəre hay 9 - Cuvok bible

Ebəre hay 9

¹Majaw ma macaaca ana sə, aŋga ava kwakwas hay ta makəɗ ha kad Zlavay ɓa va way ta kwakwas ta makəɗ ha ana ɓa dapa vavara.

²Slam makara ɓa, hwaɗiya ana mavəna dapa ecew. Hwaɗ te meker macaaca ana sə, aca zaliya «slam mavəna.» Da hwaɗiya ana faŋga, jə ta map petərla hay ɓa, taabəla ta map peŋ hay masa mava kad Zlavay va peŋ hay masa ndana hay ta viya kad Zlavay.

³Jaka dəɓa ta magambargambar ana sə, aca zaliya slam mavəna macəkuma bay.

⁴Dapa slam ana sə, slam te meŋgeŋgez təbekw ta gənaɓ va ekwete ta majaw ma makwara ava gənaɓ. Dapa ekwete ana sə, wuselek ta gənaɓ manəha weh ava man[1], daŋgwar ta Harawna masa ke ɗek mefefen fətiya va beelem hay masa ma hay ta ma majawa mavinda fətiya.

⁵Da yaŋ ekwete ana sə, meezeŋ ta maskəla hay malama ɓa, ac ka bərɗa ekwete ana ava pərkwasla tec hay. Amaa pas ta maŋguzad ma da yaŋ jeŋ ana hay fakwanay sə, ke husek bay heley.

⁶Jeŋ ana hay fakwanay sə, ac mapa ara nesey: Ndaakwas hay, ke te ŋgə mezlər teceŋ sə, ece sehw cəɗem cəɗem kad pa slam makara macaaca ana.

⁷Amaa pa slam meecew ana, me te sehw sə, say mazlakava ta ndaakwas ana hay aŋga amta, e sehw dəɓa amta da hwaɗ ta mavay. E sehwey ana sə, eve bembez ta gənaw dapa ha ka ta və kad Zlavay, afa a da pəlan mebər tata va mebər ta ndah mekele masa ac ta ŋgiya ava ha bay.

⁸Mesfen Mavəna ka wal meŋguzdekey, daha slam makara macaaca ana aŋga ɓa heley sə, cəv te mesehw kad pa slam mavəna macəkuma bay sə, mawuna aabay heley.

⁹Jeŋ ana hay fakwanay nesey sə, ac ara meezeŋ te jene hay masa ece ŋgə ta pəsna. Ara megweɗey, mavə jene hay va maŋgə kwakwas hay sə, aca zlafa matəra nda makəɗ ha kad Zlavay sə, ka nda mambəla ana aabay.

¹⁰Ŋgesey ana sə, ac kwakwas hay masa ndana hay ta gwaɗiya da yaŋ jə ta manday, da yaŋ jə ta masay va da yaŋ mayah kwakwas ta mapan jene hay. Kwakwas ana hay ŋgesey ka ŋgə mezlərey kasl pa pas masa Zlav a ta ŋgwada jene hay fakwanay ka waya.

¹¹Amaa Kəristi ke dekey ara mazlakava ta ndaakwas hay ka ta vandakwa jene hay mambəla ana masa andə ta ŋgatakwa maayaŋ kad fəma. Ke sehw pa way makara mazlakava mafəna macaaca ana va masa ka husata pe memeɗ te jene hay fakwanay. Way ana sə, ndana ta lamiya bay, a wal megweɗey, way ana aŋga dapa melem na bay.

¹²Ke sehw eve bembez ta mazawal va eve bembez ta wut ta zla sə, aabay. Amaa e sehw kad pa way ta kwakwas sə, eve bembez tata, dəɓa pal amta katar. Ara nesey, ka pəlakandakwa avəda dapa mebər tandakwa katar.

¹³Afa daha bembez ta mazawal va ta mar hay ta zla va melwec mendelek ta səɓal ta zla masa ac ta təmafa nda mazləɓa, ka pana avəda, ka təra avəda ka nda mavəna,

¹⁴naa daha ara nesey sə, bembez te Kəristi ana a fəna gaa aabay ŋgəɗa geyey? Aŋga masa jaka pa gədaŋ te Mesfen Mavəna masa a məc aabay, ka vana yaŋ tata avəda kad Zlavay ara nda masa aŋga mava ke te kəɗey masa aŋga eve mebər aabay. Bembez tata a ta panandakwaɗ mawulak yaŋ ta rav te meŋgə mezlər hay maməca ka ta ŋgana mezlər kad Zlav masa aŋga eve ndey.

¹⁵Mawala mafay te mey Kəristi aŋga maslamda ta ndana hay ava Zlavay dapa majaw ma waya, masa aŋga mambaɗ ma waya. A məcay ana sə, mafay te mehusemekec ndana hay dapa jene hay masa ac ka zlaŋda dapa majaw ma macaaca ana, afa ndah mazala sə, ac ra ŋgat ma magwaɗa ana daha ta macam jene hay katar ka midakw.

¹⁶Afa dapa slam masa ma ta ndana mambəɗa ɓa e de ŋgə mezlərey sə, say ava dəɓa ta maməc ta nda mambəɗa ma.

¹⁷Mambaɗ ma e de ŋgə mezlərey sə, say ava dəɓa ta maməcay. Daha nda mambəɗa ma ana aŋga eve ndey sə, ndana maŋgana mezlər ava ma mambəɗa ana ŋga aabay.

¹⁸Mafay ana, kwa majaw ma macaaca ana sə, ke zlerey eve bembez.

¹⁹Dapa masa Muyiz e ŋguzdecen ma hay ta ma majawa fakwanay kad ndana hay ara ma majawa te gweɗey. Ka kəs bembez ta wut ta zla hay va ta mazawal hay, magaɓa ava yam, ŋgwec makwara gagaza ana va gamslak hay te wudez mezel Isup. Ava dəɓa ana, ka kucafa ɗelewer ta ma majawa va fa ndana hay fakwanay.

²⁰Eve megweɗ, gege: «Nesey bembez ta majaw ma masa Zlav ta jawiya ava akwar.»

²¹Muyiz ka kucafa bembez fa way makara va fe jene hay ta kwakwas may.

²²Ara masa ma majawa ta Muyiz te gweɗey sə, mapan hamazlakava te jeŋ ana hay ŋgesey sə, eve bembez. Daha ava macah bembez aabay sə, mapəl mebər aabay may.

²³Daha meezeŋ te jene hay masa ac da baymaləvaŋ ac ka panata jaka pa kwakwas ana hay ŋgesey, ara nesey, jene hay masa metehwe ana da baymaləvaŋ sə, ac te ŋgə jaka pa kwakwas hay masa mambəla ana mafəna.

²⁴Kəristi sə, ke sehw pə Way ta kwakwas masa ndana hay ta lamiya ava ha teceŋ ara meezeŋ te jene metehwe ana sə, aabay. Amaa e sehwey ana sə, a baymaləvaŋ, afa e de ŋguzdek vaw təlam nesey kad andakwa fa yam te ndey ta Zlavay.

²⁵E sehwey ana sə, mafay ta mavə yaŋ tata dəɓa gaa ara mazlakava ta ndaakwas hay te sehw fa mavay fa mavay a pa Way ta kwakwas eve bembez ta gənaw hay bay.

²⁶Afa daha ka ŋgaw ara nesey sə, a ta sə marga dəɓa gaa dəga te mezler ta vavara. Amaa e sehw pal dəɓa amta dapa mamaɗ yaŋ te jene hay fakwanay, ke ŋguzdek yaŋ tata ka ta vavəsa mebər hay jaka pa mavə yaŋ tata ara jene ta kwakwas.

²⁷Afa kwa waawa sə, aŋga mapa ka ta məc dəɓa amta, ava dəɓa ana, ka ta ŋgat matəɗ ma a yaŋ.

²⁸Ara nesey, Kəristi may, ka və yaŋ tata ta maməc pal dəɓa amta ka ta kəsa mebər ta ndana hay gaa avəda. E te ŋguzdek vaw meecew ana sə, ka ta kəs mebər sabay, amaa ka ta mbəl ndah masa aca ɓəliya.