Read Cuvok Zak 1 Bible Online

Zak 1 - Cuvok bible

Zak 1

¹Yey Zak, nda maŋga mezlər ta Zlavay va ta Bay Mazlakava Yesu Kəristi. Ya vində megweɗ fa vaw aɗaw nesey, kad tərsam hay te Isreyel kuraw dapa yaŋ ana ecew makwakwaca dapa vavara fakwanay, ya gwaɗafakwar.

²Malama va dəma hay, kwa marga hay mekele mekele masa aca ŋgatafakwar ka ta cakakwar sə, makəsaw eve mewesley,

³afa akwa səniya, macak makəsparav takwar sə, e heyek majah vaw.

⁴Amaa a lada majah vaw takwar ana da ndəvda mezlər tata kasl pe memeɗey ana, afa akwar de tər ka ndah masa ec ke husec pa mamaɗ yaŋ te jene hay fakwanay, ndah mandəvda mezlər hay fakwanay va ndah masa aca hwar jene kwa kusetke aabay.

⁵Daha ndana deveŋ akwar leŋgesl te meven jene hay a ŋgana pahata sə, a da nəkafa Zlav mavana jene kad ndana hay fakwanay taambəla va mekət dadar aabay, ŋgesey a ta vana.

⁶Amaa a lada da nəkaw ava makəsparav, bəna ava mawulak yaŋ ecew ecew bay, afa nda masa a wulak yaŋ ecew ecew sə, aŋga ara meŋgeŋgel ta yam mafayakfayak ana masa memeɗ ta cawasliya saw.

⁷Tərsam ta nda ana ŋgesey, a da wulak yaŋ ta maŋgat jeŋ ana da vara Bay Mazlakava bay,

⁸afa aŋga ava mawulak yaŋ ecew ecew dapa medə tata fakwanay.

⁹A lada nda makəsparav masa aŋga maslamarga sə, de wesley da yaŋ masa Zlav a baŋgaɗiya kad a wudam.

¹⁰Nda eve zleley may, daha Zlav ka bəraŋga avəda dapa slam tata sə, de wesl jaŋgata, afa a ta kazlata ara mefefen ta gamslak hay.

¹¹Daha pas e beŋgeɗek kad a wudam, a ndal nda sə, a ɓəta gamslak ana hay vəda, mefefəney ana a kazlata, meteh tata a maməhata. Ara aŋga ana, nda eve zleley, a ta ɓətata dapa mezlər tata hay.

¹²Mapəsma ɓa kad nda maɓəsa mecek hay, afa ava dəɓa te mecekey ana, a ta ŋgat rəkwat ta matəkaɗ yaŋ ta manjah katar ka midakw masa Zlav ka gwaɗa daha a ta viya kad ndah masa aca wal Zlavay ana.

¹³Daha nda masa ka kakaslata pe meŋgə jene masa e teh bay sə, e te gweɗ masa: «Mekekesl ta vaw aɗaw nesey e de dek vara Zlavay» sə, ara na bay, afa mekekesl ta vaw sə, a zlafa macak Zlavay ke te ŋgə jene masa e teh bay sə, aabay. Zlavay ava yaŋ tata ana, a paɗ ndana pe mecekey sə, aabay.

¹⁴Mecekey sə, e dek dapa mekekesl ta vaw ta ndana, masa a hwadiya, a fəciya.

¹⁵Daha mekekesl ta vaw ana ka gəlata, e heyek mebərey. Mebər may, daha ka gəlata sə, e heyek maməcay.

¹⁶Malama va dəma hay masa ya walakwar elehey, akwar ta fəca yaŋ takwar bay.

¹⁷Mavə jene masa aŋga eve mehehəm mabay ka fəna jene hay fakwanay va mavə jene mambəla ana masa taambəla sə, ece dek da vara Zlav Papaŋ, nda malama jene hay mawaɗa slam da baymaləvaŋ, masa a ŋgwad vaw aabay, kwa e ŋgek ləvaŋ jaka pa maŋgwad vaw tata sə, aabay.

¹⁸Dapa mawulak yaŋ tata ka vandakwa mesfeney jaka pa ma te metehwe ana, afa andə da njahakwa fa slam macaaca ana mafəna te jene hay masa aŋga te lemeceŋ.

¹⁹Masənafa ma hay nesey mambəla ana malama va dəma hay masa ya walakwar elehey: Kwa waawa da vas vaw ta macak zləmay, bəna a ta vas vaw te megweɗ bay, a ta vas vaw ta mazam rav bay,

²⁰afa mazam rav ta ndana sə, a zlafa meŋgə jene ara aŋga ana ta Zlav bay.

²¹Mafay ana, makwida jene hay masa aca dakal nda va suwe hay fakwanay manəha dapa rav takwar. Makəsaw ava manah yaŋ ma masa Zlav ta sləkaɗ pa rav takwar, afa ma ana aŋga ava gədaŋ ta mambəl mesfen takwar.

²²Akwar te zlec sə, da yaŋ macak zləmay fa ma ta Zlav babəla bay, amaa meŋgə jə masa ma ana te gweɗey. Daha akwar ka ŋgaw ara na aabay sə, ŋgesey, akwar ka fəca yaŋ takwar avəda.

²³Eve metehwe ana, daha ndana a cak zləmay fa ma ta Zlavay e ŋgə mezlər ava aŋga aabay sə, aŋga ara nda mawuzaɗa ndey tata dapa mahwarhwar. A wala ndey tata aŋga meemey.

²⁴Ava dəɓa ana masa ka ndandazla cay sə, a daɓa, faŋga faŋga ana, a sənafa ndey tata ana aŋga meemey sə, ɓasabay.

²⁵Amaa nda mayaha macəna ma da yaŋ ma majawa masa a pəla nda dapa ɓeley, a təhaza ma ana mambəla ana, a pəsana dapa yaŋ aabay, e ŋgə mezlər ava aŋga ara ma majawa ana ta gwaɗa sə, nda ŋgesey, a ta ŋgat mapəsma dapa mezlər masa a ŋgiya.

²⁶Daha ndana a kəsiya dapa rav tata, aŋga nda macəpa cəv ta kwakwas, amaa ka pə leŋgesl fa ma tata ana aabay sə, ŋgesey ka fəca yaŋ tata avəda. Macəp cəv ta kwakwas tata ana ŋgesey taambəla.

²⁷Cəv ta kwakwas masa mapana, kwa mebər dapa aabay fa yam te ndey ta Zlav Papaŋ tandakwa sə, ara nesey: Mawuzaɗ matawak hay va ŋgwefidey hay dapa marga teceŋ. Map leŋgesl fa vavara, afa a da dakalandakwa bay.