Read Cuvok Zak 2 Bible Online

Zak 2 - Cuvok bible

Zak 2

¹Malama va dəma hay, akwar masa akwar ava makəsparav ɓa da yaŋ Yesu Kəristi Bay tandakwa Mazlakava, nda mafəna jene hay fakwanay eve mehehəmey, akwar ta pal nda meepel bay.

²Eve metehwe ana, daha nda eve zleley, aŋga ava njəlay ta gənaɓ mambəla ana dapa ha, aŋga ava rəkwat mambəla ana fa vaw, e sehw kad pa macam yaŋ takwar. Nda maslamarga ana may, e sehw kad pa macam yaŋ takwar ana, aŋga ava rəkwat mava ana fa vaw.

³Daha akwa ŋguzad manah yaŋ takwar ɗahw sə, kad nda masa aŋga ava rəkwat mambəla ana fa vaw eve megweɗey: «Kaa sə, njah fa slam ta manjah mambəla ana nesey!» Amaa kad nda maslamarga sə, akwa gwaɗa: «Takaa sə, zlec meezlecey, daha aabay, ta njaha fatay, fa vara fa slam te sek aɗaw.»

⁴Daha ara nesey sə, akwa pal nda meepel aabay geyey? Akwar ke təɗec ma yaŋ ndana hay ava mawulak yaŋ masa e teh bay aabay geyey?

⁵Macak zləmay, malama va dəma hay masa ya walakwar elehey! Naa Zlav ka pala maslamarga hay fa yam te ndey ta ndah ta vavara nesey e de peɗec ka ndah eve zleley hay dapa makəsparav va ka ndah ma ta cama Wunam ta bay masa ka gwaɗa daha kad ndah masa e weleceŋ?

⁶Amaa takwar sə, akwa peɗec maslamarga hay ara jene taambəla. Maŋgadakwar hahar dapa vavara sə, na ndah eve zleley hay? Asaya, naa mahwadaɗakwar fəma ta ndah mavəna ma ta ndana hay dapa slam ta matəɗa ma sə, eceŋ ana hay?

⁷Naa meseser fe mezel mambəla ana masa Yesu Kəristi ta pafakwar sə, eceŋ ana?

⁸Eve metehwe ana, akwar ke ŋgə jə mambəla ana daha akwar ka nah yaŋ kad pa ma majawa ta Wunam ta bay ta Zlavay ara masa mavinda dapa Ɗelewer mavəna, gege: «Ka da wal maslavda takaa ara ka ta wal yaŋ takaa ana.»

⁹Amaa daha akwa pal nda meepeley sə, ŋgesey, akwa ŋgə mebərey. Ara nesey, ma majawa a jawakwar avəda may, afa akwar ka nah yaŋ kad pa ma majawa ana aabay.

¹⁰Eve metehwe ana, daha ndana ka nah yaŋ kad pa ma majawa fakwanay, amaa ka zləɓa ma majawa ana pal amta avəda sə, ŋgesey, ke zləɓec avəda fakwanay,

¹¹afa nda masa e gweɗ: «Ka ta ŋgə madama bay», e gweɗ saya: «Ka ta kəɗ ndana ka macəhwandə bay.» Yaw, daha ka ka ŋgə madama ava ndana aabay, amaa ka ka kəɗaɓa ndana macəhwandaw sə, ŋgesey, ka ka paɗ ma majawa sə, ke jene taambəla.

¹²Megweɗey va meŋgə mezlərey ara ndah masa ac mazala ke te təɗec ma yaŋ jaka pa ma majawa masa a pəla nda dapa ɓeley.

¹³Eve metehwe ana, nda masa a sən metekwen fa ndah dərziya bay sə, Zlav a ta təɗana ma yaŋ ava maŋgafa metekwen aabay. Metekweney sə, a fəna matəɗ ma yaŋ ndana[1].

¹⁴Malama va dəma hay, a ta jəna nda eve mey, daha ndana e gweɗey: Ya ava makəsparav ɓa, amaa ke ŋguzdek makəsparav ana jaka pe mezlər hay aabay sə, makəsparav ana ŋga a mbəla avəda geyey?

¹⁵Daha malamaŋ, daha aabay dəmaŋ tandakwa masa aŋga ava rəkwat fa vaw aabay, a ŋgat jene ta mandə cəɗem cəɗem aabay.

¹⁶Daha ndana deveŋ akwar a gwaɗa: «Daɗay dapa metehey, ta paɓa rəkwat fa vaw, ta ndaɓa jene mban», daha ka vana jene aabay sə, ma hay tata ana ŋgesey, ac ta jən nda ana eve mey?

¹⁷Ara aŋga ana ava makəsparav daha ke ŋguzdek yaŋ jaka pe mezlər aabay sə, aŋga ara jene maməca ana.

¹⁸Amaa gəla ndana e te gweɗey: «Kaa sə, ka ava makəsparav, yey may ye eve mezlər hay.» Ya ta vahanay, ŋguzdawa makəsparav takaa masa aŋga eve mezlər aabay, yey sə, ya ta ŋguzdakaɗ makəsparav aɗaw jaka pe mezlər hay.

¹⁹Ka ka kəsaw pa rav takaa, Zlavay sə, aŋga pal amta biba? Ma takaa ana təɗe. Damkwaw hay ac ka kəs ma ana pa rav tec may, amaa ece kekesley, zidaw e kəɗeceŋ.

²⁰Marəzla! Ka wal ya ŋguzdakaɗ makəsparav masa e ŋgə mezlər aabay va masa a jəna nda aabay sə, geyey?

²¹Abəraham, papaŋ ta papaŋ tandakwa hay zleezle, Zlav ka paɗ ka nda maŋga mezlər ara aŋga ana sə, naa jaka pe mezlər hay masa aŋga ta və wudiya Izak fa slam te meŋgeŋgez təbekw?

²²Ka wala makəsparav tata aŋga macama fa slam ana eve mezlər tata hay. Mezlər hay tata ac ka nəha makəsparav tata avəda.

²³Ara nesey, ma masa Ɗelewer mavəna te gweɗey sə, ka ŋgata, ma ana ke gweɗ, gege: «Abəraham sə, ka kəs ma ta Zlavay, Zlav ka paɗ ka nda maŋga mezlər ara aŋga ana.» Ara nesey, ka zalaw guula aɗaw.

²⁴Akwar ka wala masa Zlav a piya ka nda maŋga mezlər ara aŋga ana sə, mafay te mezlər tata, bəna mafay ta makəsparav babəla bay.

²⁵Mawulakaw da yaŋ Rahab, ŋgwaz makəsa vaw fa zaŋ ana. Naa Zlav a paɗ ka ŋgwaz maŋga mezlər ara aŋga ana sə, mafay te mezlər masa aŋga te kəsec maslaŋ hay te Isreyel hay, ke ŋguzdec wewer ta mavahaɓa jaka pe cəv mekele?

²⁶Eve metehwe ana, ara vaw masa aŋga eve mesfen aabay sə, aŋga maməca. Ara aŋga ana, makəsparav masa aŋga eve mezlər hay aabay sə, aŋga maməca ana.