Read Cuvok Zak 3 Bible Online

Zak 3 - Cuvok bible

Zak 3

¹Malama va dəma hay, akwar ta njah fakwan ka ndah masasəraka ndana hay bay. Akwa səniya, ndah masasəraka ndana hay sə, Zlav e te təɗec ma yaŋ mabay ka fəna ndah dərziya.

²Andakwa fakwanay, anda zlakakwa eve cəv hay mekele mekele. Nda masa e zlek dapa maɗay tata aabay sə, ŋgesey, aŋga nda masa ka husata pa mamaɗ yaŋ te jene hay fakwanay, masa a zlafa matəhaz vaw tata fakwanay.

³Daha anda pakwa lagambal pa ma te pəlez hay, afa ac da nahandakwaɗ yaŋ sə, ŋgesey, anda padakwa ma ta vaw tec fakwanay.

⁴Mawala kaslkaslah ta yam hay may: Kwa ac mazlakava ana, masa memeɗ e hwedeceŋ, amaa mepedecen ma sə, guvakw kusetke, nda matəhaza guvakw ana sə, a zlafa mehwedec pa slam masa a waya.

⁵Ara aŋga ana, neneŋ sə, aŋga kusetke deveŋ gəva hay ta vaw, amaa a ŋgə həɓa ta magwaɗ ma hay mazlakava mazlakava. Mawala saya, ara masa zay ta kwakwaw kusetke, a zlafa mafana səɓak mazlakava ana avəda!

⁶Neneŋ may, aŋga kwakwaw, aŋga vavara te jene hay masa ece teh bay. Neneŋ manjəɓa deveŋ gəva hay ta vaw tandakwa. Maləza vaw tandakwa fakwanay sə, aŋga. Neneŋ ana a fə manjah tandakwa fakwanay ava kwakwaw masa e dek dapa slam ta marga masa katar ka midakw.

⁷Ndana sə, a zlafa mekətec tərsam te jene hay avəda fakwanay ara gənaw hay te ley va ɗiyak hay, gənaw hay masa ece də ava hwaɗ ava hwaɗ va kəlef hay.

⁸Amaa neneŋ sə, ndana a zlafa makətiya bay, afa aŋga jə mambəla ana aabay, a njah cəkwam aabay. Aŋga manəha ava lak ta makəɗa nda.

⁹Anda pəsakwa ma kad Bay Mazlakava, Papaŋ tandakwa sə, ava aŋga ana. Anda gwadarakwa ndana hay masa ec meezeŋ ta Zlavay sə, ava aŋga ana jaŋgata.

¹⁰Mapəsma va magwadar nda sə, e dek dapa ma ta nda amta. Malama va dəma hay, a lada de ŋgə ara na bay.

¹¹Yam maŋgaryayah ana va yam masa e cəney sə, aca zlafa mepelek dapa ndey ta yam amta geyey?

¹²Malama va dəma hay, masəna, maftay a zlafa meheyek wut ta Awliviyey sə, aabay. Daha aabay, wudez te rezeŋ a zlafa meheyek maftay geyey? Ndey ta yam maŋgaryayah ana sə, a zlafa mepelek yam masa e cəney sə, aabay.

¹³Nda masa aŋga eve leŋgesl te meven jene hay masa e sən jene hay deveŋ akwar sə, wa? E de ŋguzdek jaka pa manjah tata mambəla ana eve mezlər ta manah yaŋ va eve leŋgesl te meven jene hay.

¹⁴Amaa daha rav takwar manəha weh eve səlek masa e teh teh bay va leŋgesl ta mavən vaw dapa taɓa takwar, ŋgesey, akwar te ŋgə həɓa mafay te leŋgesl takwar ana bay. Akwar ta ŋgəlafa ma metehwe bay.

¹⁵Leŋgesl te meven jene hay ana ŋgesey, e dek da vara Zlav da wudam bay, aŋga dapa vavara ana nesey, e dek da vara ndamagəda, da vara damkwaw.

¹⁶Eve metehwe ana, dapa slam masa səlek va mavən vaw aca ŋgə bay sə, meŋgə mezlər eve cəvey ana aabay va tərsam te jene hay masa ece teh bay fakwanay sə, ac faŋga may.

¹⁷Amaa leŋgesl te meven jene hay masa e dek da vara Zlavay sə, aŋga mapana, e hwedek metehey va makwaɗma kad pa taɓa ta ndana hay. A yah macam ndana hay, aŋga manəha ava metekwen fa ndana va meŋgə mezlər hay mambəla ana, a pal nda meepel aabay, e gweɗ eve neneŋ dapa ma ecew ecew aabay.

¹⁸Wut te meŋgə jene ara aŋga ana sə, aŋga masləka dapa metehey kad ndah maŋga mezlər te metehey ana.