Read Cuvok Zak 4 Bible Online

Zak 4 - Cuvok bible

Zak 4

¹Meŋgə gada va mapay dapa taɓa takwar sə, e dek dama? Naa ece dek dapa mekekesl ta vaw maŋgana gada dapa vaw takwar hay biba?

²Akwa hwar maŋgat jene hay, amaa akwar ava aŋga aabay. Akwar ndah makəɗa ndana hay, masa səlek hay, akwar ka zlafa maŋgat jə masa akwa huriya sə, aabay. Akwa ŋgə vəram, akwa bazl vaw dapa taɓa takwar. Akwar ka ŋgat jə masa akwa huriya aabay sə, afa akwar ka nəkaw aabay.

³Kwa daha akwa nəkiya, akwa ŋgatiya aabay, afa manək jene takwar ana aŋga eve cəvey ana aabay, akwa nək sə, jə masa akwar da nasiya ara mawulak yaŋ takwar ta waya war.

⁴Akwar ndah maŋgana mezlər eve cəvey ana aabay kad Zlavay. Akwa sən masa maŋgə guula ava vavara sə, a təra nda ka maslagəra ta Zlavay sə, bay geyey? Nda masa a wal manjah ka guula ta vavara sə, a ŋgə a tər yaŋ tata ka maslagəra ta Zlavay.

⁵Daha aabay akwa wulakiya ma ta Zlav masa e gweɗ sə, taambəla geyey? Ma ana, gege: «Zlav a hwar makəsa Mesfen masa aŋga ta paɗ pa andakwa sə, avəda ava gədaŋ.»

⁶Amaa sesəker Zlav ka pəsafandakwa ma mafəna ana. Mafay ana, mavinda dapa Ɗelewer mavəna, gege: «Zlav a həl ha tata da yaŋ ndah magəla yaŋ, amaa e pəsefec ma ndah makwaɗma.»

⁷Mafay ana, manahan yaŋ kad Zlavay, amaa majaha vaw mambəla ana fəma ta bay ta haalay. Ara nesey, a hwayata dəreŋ ava akwar.

⁸Maŋgucafa vaw Zlavay, aŋga may, a ta ŋgucafakwar vaw. Mapana ha takwar dapa mebərey, akwar ndah te mebər hay. Mapana rav takwar, akwar ndah mawulaka yaŋ ecew ecew.

⁹Masənafa matakwa takwar, mapə rəkwat ta matakwa fa vaw, makuɗa. A lada meseser takwar de tər ka law ta makuɗa, meweslə takwar de tər ka matakwa.

¹⁰Manahda yaŋ takwar fa yam te ndey ta Bay Mazlakava, ara nesey, a ta baŋgaɗakwar avəda.

¹¹Malama va dəma hay, akwar ta ŋgaldar fa ndana bay. Nda masa a ŋgaldar fa malamaŋ kwa fa dəmaŋ, daha aabay a təɗana ma yaŋ sə, ŋgesey, a ŋgaldar fa ma majawa, a ŋgə sə, a təɗana ma yaŋ ma majawa ana. Ŋgesey, ka nda masa ke ŋgə mezlər ava ma majawa aabay, amaa ka nda matəɗana ma yaŋ ma majawa ana.

¹²Zlav pal aŋga amta, aŋga nda mavana ma majawa, aŋga nda matəɗana ma yaŋ. Aŋga nda masa a zlafa membəl ndana va maziya. Naa kaa sə, ka wa la wa masa ka təɗana ma yaŋ maslavda takaa?

¹³Ara nesey, akwar ndah megweɗ: «Pəsna, daha aabay tedew sə, anda ra dakwa pe berne nesey, andə da ŋgakakwa mavay amta dərŋga, andə da ŋgakwa fəlew, anda ra ŋgatakwa səlay gaa.»

¹⁴Anjəkar, akwa sən masa mesfen takwar a ta njah tedew meemey sə, bay, afa akwar sə, akwar ara cacak masa e ŋgeŋgez mabay, manjah kusetke sə, a maməhata!

¹⁵Efes akwa gweɗ ara nesey: «Daha Bay Mazlakava ka walaw mambəla ana, andakwa ɓa eve ndey sə, anda ra ta ŋgakwa jə nesey va nesey»,

¹⁶amaa təlam nesey, akwa ŋgə həɓa dapa mawulak yaŋ takwar hay. Həɓa ana ara nesey sə, e teh bay.

¹⁷Ara nesey, nda masa a sən meŋgə jene mambəla ana, amaa ka ŋgaw aabay sə, ŋgesey, ke ŋgə mebərey.