Read Cuvok Zak 5 Bible Online

Zak 5 - Cuvok bible

Zak 5

¹Təlam nesey, akwar ndah eve zleley hay, macak zləmay. Makuɗa ava gədaŋ mafay ta makaslafay mazlakava ana masa a ɓəlakwar.

²Zleley hay takwar ka kuɗapata, rəkwat hay takwar tep hay ke pəɗec avəda,

³gənaɓ va səlay hay takwar maŋgərzuway ka kəsa avəda. Maŋgərzuway ana ŋgesey sə, a ta tə yaw da yaŋ mebər takwar hay. Maŋgərzuway ana a ta ndakwaɗ slaw ta vaw takwar avəda ara kwakwaw. Akwar ka ɓəcaɗ zleley hay takwar kad pa pas te mendəv te jene hay.

⁴Meyəv ta ndah meŋgek jene hay takwar de ley sə, akwar ke ndecen avəda. Makuɗa ta ndah ana ka husafa Bay Mazlakava masa aŋga ava gədaŋ mabay.

⁵Akwar dapa mambivaw va meŋgə jene hay masa a wafakwar dapa vavara nesey. Akwar ka rəfa vaw takwar ara gənaw hay kad pa pas te mezlehey.

⁶Akwar ka jawa nda maŋga mezlər ara aŋga ana avəda ava ma, akwar ka kəɗa avəda ka macəhwandaw, kwa ka gwam bay sə, aabay.

⁷Ara nesey, malama va dəma hay, mepəsek kasl pas masa Bay Mazlakava e te vehekey. Mawala nda te mehəvey, a ɓal meyəv te mezlər tata eve mepəsek kasl pas masa jeŋ ana ta ŋgata. A ɓal yam ta mavərzla va yam ta masəfa.

⁸Ara aŋga ana, akwar may, mepəsek, masasala rav takwar, afa pas te mevehek ta Bay Mazlakava sə, aŋga hukw cay.

⁹Akwar ta cafa lalaw ndana bay malama va dəma hay, afa Zlavay a da təɗakwar ma yaŋ bay. Təlam nesey, nda mavəna ndana hay aŋga fəma ta way.

¹⁰Mafay ta marga va mepəsek sə, malama va dəma hay, macəp mececel ta ndah mehwedek ma masa ec ke gweɗ eve mezel ta Bay Mazlakava.

¹¹Anda gwaɗakwa ndah maɓəsa marga hay ac ka ŋgat mapəsma. Akwar ka cəna ma da yaŋ marga ta Ayuba va mawala jə masa Bay Mazlakava a yahiya, afa Bay Mazlakava sə, aŋga nda masəna metekwen fa nda va nda maŋga jə mambəla ana kad ndana.

¹²Amaa jə mazlakava sə, malama va dəma hay, akwar te mbeɗ bay, kwa ava slam da baymaləvaŋ, kwa ava vavara, kwa eve cəv wula wula. Da lada sə, megweɗ takwar de ŋgə sə, aŋga, daha ara aŋga bay, megweɗ away, afa akwar da ŋgat matəɗ ma a yaŋ akwar bay.

¹³Ndana deveŋ akwar a sə marga ɓa geyey? A da cə mbahw. Ndana deveŋ akwar aŋga eve meweslə ɓa geyey? A da slə law hay ta mahahəm Zlavay.

¹⁴Ndana deveŋ akwar aŋga gwabay ɓa geyey? E de zelec mesnendə hay ta Macam yaŋ ta ndah ta Zlavay, aca ra təkwaɗafa mal eve mezel ta Bay Mazlakava, aca ra cə mbahw kad Zlavay mafay tata.

¹⁵Macə mbahw ava makəsparav sə, a mbəla nda ana avəda. Bay Mazlakava a ta zləmada avəda dapa mehecey tata. Daha ke ŋgə mebərey sə, a ta pəlan mebər tata.

¹⁶Ara nesey, kwa waawa da ŋguzda mebər tata nda amta va amta dapa taɓa takwar. Macə mbahw kad Zlavay mafay ta nda amta va amta dapa taɓa takwar, afa akwar da ŋgat membəley. Manək jene ta nda maŋga mezlər ara aŋga ana sə, aŋga ava gədaŋ kwa macəkuma bay.

¹⁷Mawala Eli, aŋga ndana ara andakwa. Ka nəkafa Zlavay dapa macə mbahw tata ava rav tata pal amta, afa yam da slə bay. E zler dapa ŋgesey ana, mavay mahkar ava kiya makwa, yam ka slə aabay.

¹⁸Ava dəɓa ana, ka nəkafa Zlav dapa macə mbahw tata saya, yam de slekey. Dapa ŋgesey ana, yam ka slay, jene hay ke ŋgə mabay.

¹⁹Malama va dəma hay, daha nda amta deveŋ akwar ka zlakata dapa jə metehwe ana sə, a lada ndana e de vehek avəda.

²⁰Masəna, nda masa ke vehek ndana dapa cəv te mebər avəda dapa slam masa aŋga dapa sə, ŋgesey, ka mbəla mesfen tata avəda, ka maməha mebər hay gaa avəda.