Read Cuvok 1 Piyer 2 Bible Online

1 Piyer 2 - Cuvok bible

1 Piyer 2

¹Ara nesey, magərda meŋgə suwe fakwanay, maŋgal ma, maŋgwad nda ava ɗaf ta ma, meŋgə səlek va megweɗ fa nda.

²Ara wudeh gwendez, mahwar masə wa masa dapa mesfeney va wa masa mapana, afa daha akwa dey fəma fəma ava masiya sə, akwar ta ŋgat megəley ara makəsparav hay va maŋgat mahusa kasl pe membəley.

³Ara Ɗelewer mavəna, gege: «Akwar ka caka masa Bay Mazlakava aŋga nda mambəla ana.»

⁴Maŋgucafa vaw, afa aŋga sə, aŋga kekeŋ masa aŋga eve ndey masa ndana hay ta kazlda ava zlalav, Amaa Zlav ka yahaɗha, ka wala sə, aŋga mambəla ana.

⁵Akwar sə, manjah ara kekeŋ masa aŋga eve ndey, malam way masa Mesfeney da njah dapa, afa akwar da njah ka ndaakwas tata hay masa mapana, ka ta ŋgana kwakwas hay masa mavəna, masa a wafa Zlavay jaka pa Kəristi.

⁶Mavinda dapa Ɗelewer mavəna, gege: «Yey Zlavay, mawala masa ya pə kekeŋ mambəla ana da Siyawna, a da njah ke kekeŋ mazlaca way mambəla ana, kwa waawa masa ka kəsaw pa rav sə, kwa hwar a ta ŋgana aabay.»

⁷Kad akwar ndah makəsa ma te Yesu, akwar ta ŋgat mehehəmey. Amaa kad ndah masa rav tec masasala, «kekeŋ masa masamahzla hay ta kazlda ava zlalav sə, ka tərata kekeŋ mambəla ana ta malam way ka fəna dərziya hay.»

⁸Asaya, aŋga kekeŋ te mecəhweney, «Pəra masa a təɗa nda.» Mecəhwen e kəɗec ndah ana ŋgesey sə, afa ac ka kəs ma ta Zlav aabay, mafay ana ac mapa kad kekeŋ ana.

⁹Amaa akwar sə, akwar tərsam masa mapala daha, tərsam ta ndaakwas hay ta bay, tərsam masa mavəna, tərsam masa Zlav ka paɗakwar ha kad aŋga, afa akwar da ŋguzad mezlər mazlakava ta Zlav masa aŋga ta zalakakwar dapa ləvaŋ kad pa slam mawaɗa tata mambəla ana.

¹⁰Akwar masa zleezle akwar ndah ta Zlav bay, amaa təlam nesey, akwar ndah tata. Akwar masa akwar ka ŋgat metekwen ta Zlav aabay, amaa təlam nesey, akwar ka ŋgat metekwen tata.

¹¹Guulaɗ hay, ya vakwar gədaŋ ara ndah masa ac da yaŋ sek va ndah məlaŋ hay masa ac da maslaayam, mep leŋgesl fe mekekesl ta slaw ta vaw takwar hay masa aca ŋgə vəram eve mesfen takwar.

¹²Manjah mambəla ana dapa taɓa ta ndah masa aca sən Zlav bay, afa kwa daha ece gweɗ da yaŋ akwar ara akwar ndah maŋga jə mambəla ana aabay, amaa ac ta səna avəda akwar mapana jaka pe mezlər takwar hay. Ara nesey, ac ta hahəm Zlavay pas te mevehek tata.

¹³Mafay ta masa akwar ka kəs ma ta Bay Mazlakava Yesu sə, mecənecen ma ta ndah ta ŋgwaməna hay fakwanay, kad bay Sizar dapa manjah te meŋgə bay tata,

¹⁴ara aŋga ana may, mecənecen ma te gwevernel hay masa ac maslaŋ tata hay ke te kətec ndah maŋga jə mambəla ana aabay va mehehəmec ndah maŋga jə mambəla ana.

¹⁵Meŋgə jene mambəla ana ara nesey sə, Zlav a waya, ara nesey, akwa həlafa magwaɗ ma hay masa saw ta ndah marəzla.

¹⁶Manjah ara ndah mapəla dapa ɓeley, akwar te ŋgə mezlər ava mapəla vaw takwar dapa ɓeley sə, ara magambargambar ta mar suwe bay, sesəker manjah ara ndah maŋga mezlər ta Zlavay.

¹⁷Mehehəmec ndana hay fakwanay, mawal malamaŋ takwar makəsparav hay, melel fa Zlavay, mehehəlecen yaŋ ta bay.

¹⁸Akwar ndah maŋga mezlər ta ndana hay, mecənecen ma ta bay ta way takwar hay eve menehecen yaŋ fakwanay, akwar ta ŋgiya ana sə, kad bay ta way hay mambəla ana, daha aabay bay ta way hay masa makwaɗma babəla bay, amaa kwa kad bay ta way hay masa ece ŋgə bay sə, may.

¹⁹Eve metehwe ana, daha akwa wala marga hay masa ta maŋgatafakwar bay aca ŋgatafakwar, amaa akwar ka ɓəsa vəda mafay ta manahan yaŋ kad Zlavay sə, ŋgesey, akwar ke ŋgə jene mambəla ana.

²⁰Daha aca kəɗakwar mafay ta masa akwar ke ŋgə jə mambəla ana aabay, akwa ɓəsiya sə, ma ta hahəlakwaɗ yaŋ mafay ana sə, wa? Amaa daha ava dəɓa te meŋgə jene mambəla ana, akwa sə marga eve mepəsek, ŋgesey jə mambəla ana fa yam te ndey ta Zlavay.

²¹Aŋga, Zlav a zalakwar sə, kad pa manjahay ana ara nesey, afa Kəristi may, ka sə marga mafay takwar. Mafay ta marga ana ŋgesey, ka gərakwar mececeley, afa akwar da cəp cəv masa aŋga ta vahiya.

²²Aŋga sə, ke ŋgə mebər aabay, kwa mafəca nda ke təhek dapa ma tata sə, aabay.

²³Aŋga masa aca lafiya, amaa ke vehecen melefey ana aabay, dapa masə marga tata, kwa ka pay aabay, amaa ka paɗ mawulak yaŋ tata sə, a yaŋ Zlavay, nda matəɗa ma a yaŋ ndana hay eve cəvey ana.

²⁴Aŋga masa dapa slaw ta vaw tata, ka zəɓa mebər hay tandakwa avəda fa hap mazləlawa, afa ma da gərakwaɗ meŋgə mebərey, andə da njahakwa ke te ŋgə jene ara Zlav ta waya, aŋga masa mbəlek tata hay ka mbəlakwar avəda.

²⁵Afa akwar ka zlakata ara təmak hay, amaa təlam nesey, akwar ka vahakata kad vara gwala jene va nda maɓəla mesfen takwar.