Read Cuvok 1 Piyer 3 Bible Online

1 Piyer 3 - Cuvok bible

1 Piyer 3

¹Akwar ŋgwaza hay, ara aŋga ana, mecənecen ma ta mawulah takwar hay, afa kwa daha mawulah dərziya deveŋ eceŋ masa aca gwam ka kəs ma ta Zlav bay sə, akwa zlafa mekwetekec avəda kad pa makəsparav jaka pa manjah takwar. Kwa akwar ke gweɗec aabay,

²afa ac ta wala manjah takwar mapana va manah yaŋ takwar.

³Majasl vaw takwar sə, de ŋgə jaka a vəda bay, ara meweɗey: Macə yaŋ, map jə ta zləmay ta gənaɓ, daha aabay map rəkwat ta səlay.

⁴Amaa majasl vaw takwar sə, de ŋgə dapa rav, majasl vaw masa e ŋguzdek dapa makwaɗma va mepəsek masa mehehəmey ana mabay fa yam te ndey ta Zlavay.

⁵Ara nesey, zleezle ŋgwazah makəsparav hay mapana mawulak yaŋ tec fa Zlavay, ac ka jasl vaw dapa rav teceŋ eve mecənecen ma ta mawulah tec hay,

⁶ara mececeley ana, Sara ka nahda yaŋ kad mawula Abəraham, ka zala bay aɗaw. Akwar masa akwar ka tərata ke dehw ta Sara ana jaka pe meŋgə mezlər mambəla ana kwa ava zidaw dapa vaw aabay.

⁷Akwar mawula hay, ara aŋga ana madaɗ dapa manjah fa slam ana ava ŋgwazah takwar hay ava masən masa gədaŋ tec pahata fa takwar. Mehehəlecen yaŋ, afa ec may, ac ta ŋgat membəley ara akwar. Maŋgaw ara nesey, afa kwa jene mekele da rana macə mbahw takwar hay bay.

⁸Mamaɗ yaŋ ana, manjah fakwanay leŋgesl takwar amta va mawulak yaŋ takwar amta, mawal vaw ara malamaŋ va dəmaŋ hay, meŋgə metekwen fa vaw takwar va manjah makwaɗma hay.

⁹Akwar te veh suwe kad ndana bay, daha aabay malaf vaw, akwar ta vahiya bay. Sesəker mepəsefec ma, afa akwar mazala ke te ŋgə mezlərey ana hay ŋgesey, afa Zlav da pəsafakwar ma.

¹⁰Mavinda Ɗelewer mavəna, gege: «Nda masa a wal manjah mambəla ana cəɗem cəɗem va mawala manah tata hay dapa mewesley, a lada a pə leŋgesl fe neneŋ tata ta magwaɗ ma masa e teh bay va ɗaf ta ma tata ta mafəca nda.

¹¹Da gərda meŋgə jə masa e teh bay, e de ŋgə mezlər mambəla ana, da yah metehey ava maŋgə gədaŋ cəɗem cəɗem.

¹²Afa, Bay Mazlakava e pefec ndey ndah maŋga mezlər ara aŋga ana, e cəkefec zləmay pa macə mbahw teceŋ, amaa Bay Mazlakava e njerefec ndah maŋga jə masa e teh bay sə, aabay.»

¹³Ara nesey, daha akwa ŋgaŋgar vaw te meŋgə mezlər ara aŋga ana sə, ma da ŋgafakwar suwe sə, wa?

¹⁴Kwa daha akwa sə marga mafay te meŋgə mezlər ara aŋga ana, ŋgesey mapəsma ɓa kad akwar. Akwar te lel fa ndana hay bay, leŋgesl takwar e te dəŋgezl bay.

¹⁵Amaa mahahəlan yaŋ te Kəristi dapa rav takwar ara Bay takwar Mazlakava. Maləmada vaw cəɗem cəɗem ta mavah ma hay masa ndana hay ta nəkafakwar da yaŋ jə masa akwa pə mawulak yaŋ takwar fətiya.

¹⁶Amaa e de ŋgə ava makwaɗma, ava manah yaŋ va ava rav mapana. Ara nesey, kwa daha aca gwaɗ ma hay mambəla ana aabay da yaŋ manjah takwar dapa makəsparav sə, hwar e te kəɗec avəda.

¹⁷Daha Zlav ta waya, zuwan masə marga mafay te meŋgə mezlər mambəla ana da yaŋ masa masə marga mafay te meŋgə mezlər mambəla ana aabay.

¹⁸Eve metehwe ana, Kəristi ava yaŋ tata ka sə marga mafay te mebərey, a siya pal dəɓa amta mafay ta ndana hay fakwanay. Aŋga masa ke ŋgə mebər aabay, amaa ka məcata mafay ta ndah te mebərey. A ŋgiya ara nesey, afa a da ŋguzdakwar fəma ta Zlavay, aŋga masa ka məcata dapa slaw ta vaw ara ndana, amaa Mesfen Mavəna ke pərekek avəda kad pe mesfeney.

¹⁹Ara nesey, ke dey pe mebəzedec ma kad mesfen hay masa ac maɓəzla.

²⁰A wal megweɗey kad mesfen hay masasala yaŋ zleezle masa Zlav te pec sek dapa masa Nuwe a cacaɗ kaslkaslah mazlakava ta yam. Dapa ŋgesey ana, ndah mesehw pa kaslkaslah ana sə, ac gaa aabay, ac cahkar, ac ke mbəlec dapa yam.

²¹Ŋgesey ana sə, e ŋguzdek mececel te beetem masa a mbəlakwar təlam nesey. Beetem ana ŋgesey sə, ta mapan laŋgwa fa vaw bay, amaa ta makəs cəv ta macəp Zlavay ava rav mapana. Akwa mbəley ana sə, jaka pa masa Zlav te pərekek te Yesu Kəristi dapa maməcay,

²²masa ka data a baymaləvaŋ, aŋga manjaha da ha ta zam ta Zlavay. Dərŋga sə, e ŋgə bay da yaŋ maskəla hay, da yaŋ mesfen hay masa ac ava matimaazlaɓ va da yaŋ mesfen hay masa ac ava gədaŋ mazlakava.