Read Cuvok 1 Piyer 4 Bible Online

1 Piyer 4 - Cuvok bible

1 Piyer 4

¹Ara masa Kəristi ka sə marga dapa slaw ta vaw, akwar may, meŋgə gədaŋ ta mawulak maɓəs marga ana ara aŋga ta ɓəsiya, afa kwa waawa maɓəsa marga ana sə, aŋga mavəna eve mebərey.

²Dəga təlam nesey kasl pa manjah takwar magəra kad fəma sə, akwar ta njah ara mekekesl ta vaw ta ndana hay ta waya bay, amaa manjah ara Zlav ta waya.

³Eve metehwe ana, zleezle sə, akwar ka njah ara ndah masa aca sən Zlav bay. Akwar ka njah dapa meŋgə madama, meŋgə ndey fe jene ta ndana, mekwey, manjah dapa mandə jene hay va masə jene hay va mekekəred kad mbat hay masa aca hahəlan yaŋ ta Zlav aabay.

⁴Təlam nesey, ndah masa aca sən Zlav bay sə, ece rəzl mafay ta masa akwa ŋgə jeŋ ana hay fa slam ana eve eceŋ dapa manjah masa e teh bay sə, ɓasabay, mafay ana aca lafakwar.

⁵Amaa ac ta gwaɗan jene hay masa ac ta ŋgiya fakwanay sə, kad Zlav masa aŋga maləmada ta matəɗ ma a yaŋ ndah eve ndey va ndah maməca.

⁶Mafay ana, kwa kad ndah maməca hay, Labara mambəla ana mabəzada kad eceŋ, afa Zlav ke təɗec ma yaŋ dapa slaw ta vaw aca ra njah ara Zlav ta waya jaka pe Mesfeney.

⁷Mamaɗ yaŋ te jene fakwanay sə, aŋga hukw cay. Ara nesey, meŋguzdek leŋgesl te meven jene hay va mepə leŋgesl fə yaŋ takwar, afa akwar da ŋgat gədaŋ ta macə mbahw.

⁸Wagaa akwar te ŋgə jene wula wula fakwanay sə, mawal vaw dapa taɓa takwar ava rav amta, afa mawal vaw sə, a bəraɗafa mebər hay mabay.

⁹Akwar ta kəs məlaŋ hay wula wula kad hwaɗ ta way takwar eve mehwehwer bay.

¹⁰Kwa waawa sə, de ŋgə mezlər ava gədaŋ masa Zlav ta vana ka ta jən ndah mekele. Ara nesey, akwa tərata ka ndah maŋga mezlər ta Zlavay eve cəvey ana ava gədaŋ masa aŋga ta viya wal wal kad kwa waawa.

¹¹Nda masa ka ŋgat gədaŋ ta mabəzad ma sə, a da bəzad ma ta Zlavay. Nda masa ka ŋgat gədaŋ ta majəna nda, e de jənec ndana hay ava gədaŋ masa Zlav ta vana, afa ndana hay aca ra hahəm Zlavay jaka pa Yesu Kəristi fakwanay, aŋga nda masa aŋga ava gədaŋ, masa ndana hay aca hahəmiya katar ka midakw. E de ŋgey!

¹²Guula aɗaw hay masa ya walakwar elehey, akwar te rəzl da yaŋ marga hay masa aca ŋgadakwar hahar bay, akwar ta wulakiya ara marga metehwe ana ta maŋgatafakwar bay.

¹³Amaa sesəker meweslə ta maɓəs marga ana hay ara Kəristi ta ɓəsiya, afa akwar da wala ara Zlav masa e ŋguzdek mehehəm tata. Ara nesey, akwar te wesl macəkuma bay.

¹⁴Daha aca lafakwar mafay ta masa akwar ndah te Kəristi sə, ŋgesey, mewesley, afa Mesfen te membeɗey, Mesfen Mavəna, a ta njah ava akwar.

¹⁵A lada kwa ndana deveŋ akwar a da sə marga mafay ta masa aŋga te kəɗek ndana cukw cukw, daha aabay aŋga makar, aŋga te ŋgek jene mambəla ana aabay, daha aabay aŋga te ŋgek cakazlam bay,

¹⁶amaa daha ndana a sə marga mafay ta masa aŋga nda te Kəristi sə, ŋgesey, a ta ŋgə hwar bay. Sesəker a da ŋgana wasay Zlavay mafay ta masa aŋga eve mezel te Kəristi dapa rav tata.

¹⁷Pas masa Zlav a ta təɗ ma a yaŋ ndana hay sə, ka zlarata cay, a zlariya kamma sə, jaka vara andakwa ndah tata. Yaw, daha a zlariya ava andakwa, naa mamaɗ yaŋ ta ndah masa ac ka kəs Labara mambəla ana ta Zlav aabay sə, de ŋgə gwagumaw?

¹⁸Mavinda dapa Ɗelewer mavəna, gege: «Daha nda maŋga mezlər ara aŋga ana e mbəl ava gədaŋ dapa sə, naa ndah masa rav tec masasala ta makəs ma ta Zlavay va ndah te mebərey sə, ec de mbəl, gwagumaw?»

¹⁹Ara nesey, ndah masa aca ɓəs marga mafay te jə masa Zlav ta waya sə, aca ra van mawulak yaŋ teceŋ fakwanay kad Zlav nda melemekeceŋ, nda maŋga jə masa ka gwaɗaɗ ha.