Read Cuvok 1 Piyer 5 Bible Online

1 Piyer 5 - Cuvok bible

1 Piyer 5

¹Təlam nesey, ye gweɗ kad mesnendə hay dapa Macam yaŋ ta ndah ta Zlavay dapa taɓa takwar, yey masa ye mesnendey ara akwar ana va yey nda matana yaw da yaŋ marga te Kəristi, ya ta ŋgat mehehəm masa e te ŋguzdekey.

²Maɓac bakw ta təmak hay[2] masa Zlav ta gəraɗ pa ha takwar eve mapafa ndey ava rav takwar pal amta ara Zlav ta waya, akwar ta ŋgiya sə, ara ndana ta tatəkakwar bay, mafay ta maŋgat zleley bay, amaa ara akwar ta waya.

³Akwar ta ŋguzad gədaŋ ta bay da yaŋ ndah masa Zlav te peɗec pa ha takwar bay, amaa maŋguzad manjah mambəla ana masa aca ra cəpakwar.

⁴Pas masa bay ta gwala jene hay ka ta dakata sə, akwar ta ŋgat mataɗa ta mahahəl yaŋ masa kwa a ta ŋgwada mehehəm tata aabay.

⁵Ara aŋga ana, akwar wudeh gawla hay, mecənecen ma te mesnendə hay dapa Macam yaŋ ta ndah ta Zlavay. Akwar fakwanay, manahda yaŋ kad kwa waawa dapa taɓa takwar, afa mavinda dapa Ɗelewer mavəna, gege: «Zlav e ŋgwedefec dəɓa ndah magəla yaŋ hay, amaa kad ndah manaha yaŋ sə, e ŋgefec metekweney.»

⁶Ara nesey, manahda yaŋ takwar fəma ta Zlavay, afa a da baŋgaɗakwar dapa pas masa aŋga ta piya.

⁷Magəraɗ mawulak yaŋ takwar fakwanay pa ha tata, afa aŋga sə, a pə ndey fakwar.

⁸Mapə leŋgesl, manjah eve ndey! A fa maslagəra takwar, bay ta haalay, aŋga ara mabar masa a kuɗa, a yah jene ka nday.

⁹Majahafa vaw, ava makəsparav masasala. Masənafa marga ana hay nesey, malamaŋ takwar hay makəsparav dapa vavara fakwanay aca siya ara akwar may.

¹⁰Zlavay, nda maŋgana metekwen tata fa ndana hay, ka zalakakwar kad pe meweɗ tata masa a ta njah katar ka midakw dapa Yesu Kəristi sə, a ta ləmadaɗakwar pa slam ana ava dəɓa ta masə marga hay dapa manah mekusetke ana hay ŋgesey. A ta sasalakwar, a ta vakwar gədaŋ, a ta zlacakwar caŋw caŋw kwa jene ma ta təɗdakwar aabay.

¹¹A lada a da ŋgə bay katar ka midakw. E de ŋgey!

¹²Ya ka vindakwar ma ana hay nesey jaka pa majəna nda ta Silas masa ya piya ka malama metehwe ana, ka ta vakwar gədaŋ va maŋguzdakakwar masa akwar ka təhaza metekwen metehwe ana ta Zlavay.

¹³Malamaŋ tandakwa hay dapa Macam yaŋ ta ndah ta Zlavay dapa vavara ta Baabilaŋw[3] fana masa Zlav te peleceŋ ara akwar sə, aca gwaɗafakwar, ara aŋga ana Markwas, wat aɗaw ka gwaɗafakwar saya may.

¹⁴Megweɗ fa vaw takwar amta va amta ava mahumbat vaw ara akwar malamaŋ hay. A lada metehey da njah da yaŋ akwar fakwanay, akwar masa dapa Kəristi.