Read Cuvok 2 Piyer 1 Bible Online

2 Piyer 1 - Cuvok bible

2 Piyer 1

¹Yey, Simaŋw Piyer, ya nda maŋga mezlərey va ya maslaŋ te Yesu Kəristi. Leeter nesey, mavinda kad akwar ndah makəsa ma te Kəristi ara andaw. Yesu Kəristi masa aŋga Zlav tandakwa va Nda mambəla nda, afa aŋga nda maŋga mezlər ara aŋga ana.

²A lada mambəla ana va meteh ta Zlavay da njah da yaŋ akwar mafəna ana jaka pa masən Zlavay va Bay tandakwa Mazlakava Yesu.

³Zlavay jaka pa gədaŋ tata mazlakava, ka vandakwa jene hay fakwanay masa a da jənandakwa dapa manjah tandakwa ara masa aŋga ta waya. Ka ŋguzdandakwaɗ nda mazalakandakwa kad pa masən gədaŋ tata mazlakava va mambəla ana tata.

⁴Jaka pe jeŋ ana hay ŋgesey, ka vandakwaɗ jə mazlakava va jə mambəla ana fakwanay masa ka gwaɗandakwa dəga zleezle a ta vandakwa. A ŋgiya ara nesey sə, afa akwar da ŋgat macam vaw ava Zlavay ana va jaka pe cəvey ana ŋgesey, akwar da mbəlata fa mawulak yaŋ mambəla ana aabay ta vavara manasa nda nesey.

⁵Mafay ana meŋgə gədaŋ, kad veŋ makəsparav takwar sə, mapana manjah mambəla ana, kad veŋ manjah mambəla ana, mapana masən Zlavay,

⁶kad veŋ masən Zlavay sə, mapə leŋgesl fə yaŋ takwar, kad veŋ mapə leŋgesl fə yaŋ takwar, mapana mepəsek, kad veŋ mepəsek, mapana magas vaw fa Zlavay,

⁷kad veŋ magas vaw fa Zlavay, mapana meŋgə metekwen fa malamaŋ hay, kad veŋ meŋgə metekwen fa malamaŋ hay, mapana mawal vaw dapa taɓa takwar ara malamaŋ hay may.

⁸Daha manjahay ana nesey da varakwar ɓa, e dey fəma fəma sə, a ta tərakwar avəda ka ndah maŋga mezlər cəɗem cəɗem va magəlakwar dapa masən Bay tandakwa Mazlakava Yesu Kəristi.

⁹Amaa nda masa aŋga ava manjahay ana hay na aabay sə, e wele ndey dəreŋ aabay ara nda mahazlaw. A sənafa mepel mebər tata hay masa Zlav ta pəlan dəga zleezle sə, sabay.

¹⁰Mafay ana, malama va dəma hay, meŋgə gədaŋ ta masasala mezel masa Zlav ta zalakakwar va mapalakakwar deveŋ ndana hay. Daha akwa ŋgiya ara nesey sə, akwar te teɗ pa makaslafay hay aabay.

¹¹Ara nesey, akwar ta ŋgat cəv te mesehw taambəla pa Wunam ta bay ta Bay tandakwa Mazlakava Yesu Kəristi va Nda mambəla nda.

¹²Mafay ana, ya sləfakwaɗ jeŋ ana hay cəɗem cəɗem, kwa akwa sən ma da yaŋ jeŋ hay ana cay va masa akwar masasala dapa metehwe ana təlam nesey.

¹³Amaa ya wulakiya, zuwan ya sləfakwaɗ ma ana hay dapa masa ye eve ndey hel nesey, afa a da pəsakwar dapa yaŋ bay.

¹⁴Ya səniya, mbala ya ta məc cay ara Bay tandakwa Mazlakava Yesu Kəristi ta ŋguzdawa.

¹⁵Ara nesey, say ya ŋgə gədaŋ ta masasərakakwaɗ jeŋ ana hay fakwanay, afa kwa ava dəɓa ta maməc taaɗaw sə, akwar da zlafa masənafa jeŋ ana hay cəɗem cəɗem.

¹⁶Dapa masa anda gwaɗakwar da yaŋ medek te Yesu Kəristi Bay tandakwa Mazlakava ava gədaŋ sə, andə ka gwaɗakwar ara ndana hay ta kər maɗay ana saw aabay, amaa andaw eve ndey taciya andə ka wala gədaŋ tata ana mazlakava.

¹⁷A ŋgat mahahəl yaŋ va mehehəmey da vara Zlav Papaŋ sə, dapa masa uway e cənek dapa meweɗ mazlakava ta Zlavay te gweɗ, gege: «Nesey sə, Wat aɗaw masa ya waya elehey, aŋga masa ke wefiyey, ya ka paɗ mewesley aɗaw fətiya.»

¹⁸Uway ana ŋgesey, andaw ava yaŋ taciya ana andə ka cəna e dek da baymaləvaŋ dapa masa andaw ava aŋga dapa wudam mavəna.

¹⁹Kad veŋ ana saya, ma ta ndah mehwedek ma ka vandaw gədaŋ da yaŋ ana, andə ka kəsaw kwa ava mawulak yaŋ ecew ecew aabay. Ara nesey, anda pakwa leŋgesl fa ma ta ndah mehwedek ma ana ara petərla mawaɗa slam dapa ləvaŋ kasl pe meweɗek ta pas va masa bat ta slamɓal te beŋgeɗek vaw dapa rav takwar.

²⁰Jə macaaca ana sə, masəna mambəla ana: Ndana mazlafa meŋguzdek ma ta ndah mehwedek ma mavinda dapa Ɗelewer mavəna ava yaŋ tata sə, aabay,

²¹afa ma ta ndah mehwedek ma sə, e dek dapa mawulak yaŋ ta nda magəda bay. Amaa Mesfen Mavəna te jənec ndana hay ece re gweɗek mawulak yaŋ ta Zlavay.