Read Cuvok 2 Piyer 2 Bible Online

2 Piyer 2 - Cuvok bible

2 Piyer 2

¹Ndah mapana yaŋ tec ka ndah mehwedek ma ec ke dek pa taɓa ta ndah te Isreyel hay zleezle. Ara aŋga ana, ndah mapana yaŋ tec ka ndah masasəraka ndana hay ec te dekey kad pa taɓa takwar. Ec te kəsek mesesərek hay ta maŋgal ma masa a hwad nda kad pa mazay, ac ta kəs ma ta Bay tec membəlec sə, aabay. Ara nesey ece səpenek mazə masa e te ŋgetefec kad yaŋ eceŋ.

²Ndana hay gaa ec te cəpeceŋ dapa makəs vaw tec fa zaŋ ana. Ndana hay gaa ac ta laf cəv te metehwe ana mafay teceŋ.

³Ac ta fəcakwar eve mesesərek tec masa ta maŋgal ma ka ta ŋgat səlay. Eceŋ masa dəga zleezle matəɗ ma teceŋ e ɓəleceŋ, mazə tec a ta njah gaa ɓasabay.

⁴Eve metehwe ana, kwa maskəla hay maŋga mebərey sə, Zlav ke ŋgefec metekwen aabay, ke kuyeɗec pe veɗ mekweleleŋ ana, dapa faŋga ac majawa dapa ləvaŋ, aca ɓal pas ta matəɗ ma teceŋ.

⁵Kwa ka ŋgafa metekwen ndah dapa vavara mezleezle ana sə, aabay, amaa dapa masa a zə ndah suwe hay ava yam mazlakava sə, ka raɓaɗ Nuwe ha, aŋga nda mabəzada mezlər ara aŋga ana va aŋga nda macahkar ana deveŋ ndah membəlek dapa yam mazlakava.

⁶Ava dəɓa ana, Zlav ke təɗec ma yaŋ ndah dapa berne hay ta Sawduma va dapa berne hay ta Gwamara. Ke zenec avəda helmeɗ ara meləwec. Ara nesey, Zlav a wal meŋguzdecen kad ndah maŋga jə mambəla ana aabay maayaŋ kad fəma e te ŋgedec marga ara aŋga ana.

⁷Ka mbəla Ludaw, nda maŋga mezlər ara aŋga ana avəda. Aŋga masa ndah makəɗa nda va ndah makəs fa zaŋ ana saw ac ka ŋgada marga mabay,

⁸afa nda maŋga mezlər ara aŋga ana nesey, ka njah dapa taɓa teceŋ, ka wala va ka cəna jə mambəla ana aabay masa ac ta ŋgiya fa pas fa pas. Mezlər tec hay mambəla ana aabay ŋgesey, ka ŋgada marga kad rav tata.

⁹Ara nesey, Bay Mazlakava a sən membəlekec dapa marga ndah masa aca nahan yaŋ va mepeɗec ha wal ndah maŋga mezlər ara aŋga ana aabay ke te ŋgedec marga pas ta matəɗ ma.

¹⁰Mahwalhwala ana sə, e te ŋgedec marga kad ndah macəpa mekekesl ta slaw ta vaw teceŋ masa maləza va ndah mapana gədaŋ ta maŋgə bay ta Zlavay ke jene taambəla. Ndah masasəraka ndana hay ava maŋgal ma ana ŋgesey ac ka paɗ yaŋ teceŋ ka ndah mambəla ana va ac ava maŋgə həɓa mabay. Ece lel ta malaf mesfen hay masa ec eve mehehəm mabay da baymaləvaŋ sə, aabay.

¹¹Kwa maskəla hay masa ece fənec ndah masasəraka ndana hay ava maŋgal ma ana ŋgesey ava gədaŋ va gədaŋ mazlakava, ac ka laf mesfeney ana hay ŋgesey fa yam te ndey ta Bay Mazlakava sə, aabay.

¹²Amaa ndah ana ŋgesey aca ŋgə jene hay saw ara jə te ley hay masa ec eve leŋgesl aabay masa ac malama ke te təhezey va ke te kəɗey. Ndah ana, aca laf jene hay masa aca səniya bay. Ara nesey, ec te kuɗep ara jə te ley hay.

¹³Ac ta ŋgat fe meyəv te meŋgə mezlər ara aŋga ana aabay teceŋ sə, mezlər hay masa ec te ŋgec ara aŋga ana aabay kad ndana hay. Mewesldeceŋ sə, meŋgə mezlər tec mambəla ana aabay ŋgesey fa yam te ndey ta ndana hay, kwa ta pas. Dapa masa akwa ndə jene eve eceŋ fa slam ana, ece wesley ka ta fəcakwar, manjah teceŋ varakwar pəsaŋga ana ŋgesey sə, aŋga maləza va manəha ava hwaray.

¹⁴Ndey tec manəha weh ava mawal makəs vaw fa zaŋ ana, ece yəv te meŋgə mebər aabay. Aca yah ka ta ŋgə mebərey sə, ndah masa gədaŋ tec pahata dapa makəsparav. Aca yah cəɗem cəɗem sə, jene kad hwaɗ tec babəla. Ndah ana ŋgesey sə, Zlav ke gwederec avəda.

¹⁵Ac ka gərda cəv manduwak ana, ec ke zlekeceŋ kad pa makəs cəv mambəla ana aabay ara nda mezel Balam wut ta Busawr.

¹⁶Amaa ka ŋgat mapay mafay ta magal yaŋ tata, zaŋgwa masa e gweɗ aabay maa ka gwaɗa ava uway ta ndana. Ka ɓəzlan merezlə ta nda mehwedek ana ŋga avəda.

¹⁷Ndah masasəraka ndana hay ava maŋgal ma ana ŋgesey, ac ara təker masa yam ka sərkwata dapa va zlav ta yam masa memeɗ ta fuwiya, yam dapa aabay. Zlav ke ləmedec slam dapa ləvaŋ meɓekɓek ana.

¹⁸Aca gwaɗ ma hay te meŋgə həɓa hay saw va ma hay masa a ta jəna nda aabay. Ece ŋgeyec dəɓel kad ndah masa ece gərek manjah tec təlam dapa taɓa ta ndah te mebər hay. Dəɓel ana sə, meŋgə jene hay saw masa ece hwedek hwaray ara slaw ta vaw tec ta waya.

¹⁹Ndah masasəraka ndana hay ava maŋgal ma ana hay, ece gweɗec kad ndana hay sə, ac ta pəla vaw dapa ɓeley, anjəkar eceŋ ava yaŋ teceŋ ana sə, ec ɓel hay kad pa mazay, afa jə wula wula maŋga bay da yaŋ ndana sə, a təra nda ana avəda ke ɓel tata.

²⁰Daha ndah masa ece mbəlek dapa jə maləza ta vavara jaka pa masən Yesu Kəristi Bay tandakwa Mazlakava, nda mambəlandakwa, amaa ec ke vehec saya kad pa ha te jeŋ ana hay, afa ec de ŋgə bay da yaŋ eceŋ sə, ŋgesey, manjah tec a tərata mambəla ana aabay mahwalhwala ana ka fəna macaaca ana.

²¹Kad ndah ana ŋgesey, zuwan ac ta sən cəv manduwak ana bay da yaŋ masa ac ka səna avəda amaa aca ŋgwadafa dəɓa ma ta ma majawa mavəna masa mava kad eceŋ.

²²Jeŋ ana masa e ŋgetefec ara nesey sə, ara ma maɗəva te gweɗ, gege: Gəda ka vahata pe menjəkeɗek jə masa aŋga ta vənahiya va vetem mapana, ka vahata pa manah pe dəreɓ.