Read Cuvok 2 Piyer 3 Bible Online

2 Piyer 3 - Cuvok bible

2 Piyer 3

¹Guula aɗaw hay masa ya walakwar elehey, nesey leeter aɗaw meecew ana masa ya vindiya kad akwar. Dapa leeter ana hay cuweeney nesey sə, ya ka wal mapərakakwar dapa jene hay masa akwa səniya cay, afa akwar da sləkaɗ mawulak yaŋ masa manduwak ana pe leŋgesl takwar.

²Ya wal sə, masənafa ma masa ndah mehwedek ma mavəna ta bəzadiya zleezle va ma hay masa maslaŋ takwar hay ta gwaɗakwar, ma ta Bay Mazlakava, Nda mambəla nda.

³Macaaca ana, masəna sə, dapa mamaɗ yaŋ te jene hay, ndah masasarafakwar masa macəpa mekekesl ta slaw ta vaw teceŋ ec te dekey.

⁴Ec te gweɗ, gege: «Yesu, gege: “E te vehek biba?” Naa təlam nesey sə, aŋga kəla la wula? Papaŋ ta papaŋ tandakwa hay ec ke məceceŋ, amaa ec ke pərekek dapa maməc aabay, dəga melem ta vavara sə, kwa jene ke ŋgwed aabay!»

⁵Aca sənafa bay ava ha masa zleezle Zlav ke lemek baymaləvaŋ va vavara, vavara masa e təhek dapa yam jaka pa ma tata. Ka vəna vavara ava yam, ka lama ava yam.

⁶Ara aŋga ana ava yam ana ŋgesey, zleezle Zlav ka zana vavara macaaca ana avəda ava yam mazlakava ana.

⁷Ta baymaləvaŋ va vavara masa ac ɓa kasl pəsna nesey sə, ma ta Zlavay ana pal amta aŋga te gəreɗec ha kad kwakwaw masa e te ndeleceŋ. Pəsaŋga ana ŋgesey, e te təɗec ma yaŋ ndah magəla yaŋ hay.

⁸Amaa jene pal amta ɓa guula aɗaw hay masa ya walakwar elehey, jə masa a da pəsakwar dapa yaŋ bay. Ta Bay Mazlakava sə, manah amta aŋga ara mavay bakatar, mavay bakatar, aŋga ara manah amta.

⁹Bay Mazlakava sə, a ŋgə matəhwahwam te meŋgə jə masa ka gwaɗa cay sə, aabay. Ndah mekele aca wulakiya Zlavay sə, aŋga matəhwahwam, away! A ŋgə sə, a pakwar sek, ka wal masa kwa nda amta da zaɗay sə, aabay. Amaa a wal sə, kwa waawa da ŋgwada rav tata.

¹⁰Pas ta Bay Mazlakava e te dekey sə, a ta hufandakwa ara nda makar. Ta pəsaŋga ana ŋgesey, baymaləvaŋ a ta maməhata ava maɓəsla ma mazlakava, dərŋga jene hay ec te ndeleceŋ ava kwakwaw, vavara va mezlər tata hay fakwanay ec te zeceŋ.

¹¹Ara masa jeŋ ana hay fakwanay nesey ac ta ndəvata sə, a lada akwa səna mambəla ana manjah takwar masa akwar da də dapa sə, wula. A lada manjah takwar ana de ŋgə mavəna, masa madərazla ava Zlavay.

¹²Akwar masa akwa ɓəl a lada pas ta Zlavay de dekey sə, meŋgə gədaŋ a lada pas ana ŋgesey de ŋgə zef. Pəsaŋga ana ŋgesey, kwakwaw a ta ndala baymaləvaŋ avəda helmemeɗ, jene hay dərŋga fakwanay ac ta maməhata dapa kwakwaw.

¹³Anda ɓəlakwa sə, ara masa Zlav ta gwaɗandakwa zleezle, gege: A ta vandakwa baymaləvaŋ waya va vavara waya, dapa slam masa ndah maŋga mezlər ara ŋga ana faŋga ɓa.

¹⁴Mafay ana, guula aɗaw hay masa ya walakwar elehey, dapa meɓəley ana nesey, meŋgə gədaŋ, afa a da ŋgatafakwar dapa metehey, akwar eve mebər aabay, kwa magwazav fa vaw aabay.

¹⁵Masəna mambəla ana, Bay Mazlakava a pakwar sek sə, afa akwar de mbəl cəɗem cəɗem. Nesey masa Pawl, malamaŋ tandakwa va guula tandakwa a wal megweɗey, masa a vindakwaɗ eve leŋgesl te meven jene hay masa Zlav ta vana.

¹⁶Dapa leeter ana masa aŋga te vindec fakwanay da yaŋ ma ana hay nesey sə, ke gweɗ ara nesey ana. Dapa slam leŋgeɗ hay sə, slam hay masa ndana hay aca cəna bay ɓa. Ara nesey, ndah masa ece sən jene bay va ndah masa ac ka ŋgat mesesərek da yaŋ ana aabay, aca ŋguzad ma da yaŋ ana wal, ara masa aca ŋgiya ava Ma hay mavinda Mavəna mekele ka ta nas manjah teceŋ.

¹⁷Yaw, e tehey! Guula aɗaw hay masa ya walakwar elehey, akwar ka cəna ma da yaŋ ana kamma cay. Map leŋgesl, akwar ta və yaŋ takwar kad pe cəv te mezlek bay va mavə yaŋ takwar kad pa mapəraslakwaɗ mawulak yaŋ takwar da yaŋ jə masa Zlav a ta vakwar bay.

¹⁸Amaa madaɗay fəma fəma dapa mambəla ana ta Zlavay va masən Bay tandakwa Mazlakava Yesu Kəristi. Da lada sə, ndana hay aca ra hahəmaw dəga təlam nesey, katar ka midakw. E de ŋgey!