Read Cuvok 1 Zaŋ 1 Bible Online

1 Zaŋ 1 - Cuvok bible

1 Zaŋ 1

¹Anda bəzadakwar ma da yaŋ nda masa aŋga mesfeney. Dəga vavara malama bay heley, aŋga ɓa cay, andə ka cəna ece gweɗ da yaŋ ana, andə ka wala eve ndey taciya, andə ka ndandazlaw va andə ka pafa ha,

²afa nda masa aŋga mesfeney sə, ke ŋguzdek vaw, andə ka wala, anda tə yaw da yaŋ ana, ara nesey, anda ŋguzdakwaɗ ma da yaŋ manjah katar ka midakw masa ka njah da cak ta Papaŋ, va masa ka ŋguzdandan vaw.

³Jə masa andə ta wala va masa andə ta cəna sə, anda ŋguzdakwaɗ kad akwar may, afa akwar may, akwar da ŋgat macam vaw ava andaw. Macam vaw tandakwa ana ŋgesey, aŋga macam vaw masa ava Zlav Papaŋ va wudiya Yesu Kəristi.

⁴Ara nesey, anda vindakwaɗ ma ana, afa meweslə tandakwa da nəhaɗay.

⁵Mawala mabəzad ma masa anda te cənek da vara vaw, anda ŋguzdakwaɗay: Zlavay sə, aŋga mawaɗa, meveh ta ləvaŋ kwa kusetke da vara vaw aabay.

⁶Daha anda gwaɗakwa: «Andakwa macama ava Zlavay», amaa anda dakwa fəma fəma dapa ləvaŋ sə, ŋgesey, anda ŋgəlakwa ma, andə ka dakwa ara ma metehwe ana ta waya sə, aabay.

⁷Amaa daha anda dakwa dapa slam mawaɗa ara Zlavay ava yaŋ tata ana masa aŋga dapa slam mawaɗa sə, ŋgesey, andakwa macama ndana ava ndana. Ara nesey, bembez te Yesu, wudiya, a panandakwa avəda dapa mebər hay fakwanay.

⁸Daha anda gwaɗakwa: Andə ka ŋgakwa mebər hay aabay, ŋgesey, anda zlakakwa ava yaŋ tandakwa ana, ara nesey, metehwe ana dapa andakwa ɓasabay.

⁹Daha anda ŋguzdakwaɗ mebər tandakwa hay, Zlavay sə, aŋga nda maŋga mezlər ara aŋga ana va nda maŋga mezlər eve cəvey ana a ta pəlandakwaɗ mebər tandakwa hay, a ta panandakwa avəda dapa meŋgə jene hay mambəla ana aabay.

¹⁰Daha anda gwaɗakwa: «Andə ka ŋgakwa mebər hay aabay», ŋgesey, anda pakwa Zlavay ka nda maŋgəla ma, ma tata dapa andakwa aabay.