Read Cuvok 1 Zaŋ 2 Bible Online

1 Zaŋ 2 - Cuvok bible

1 Zaŋ 2

¹Wude hey aɗaw, ya vindakwar ma nesey sə, afa akwar de ŋgə mebər bay. Amaa daha ndana ke ŋgə mebərey sə, andakwa ava nda ma ta zlacafandakwa fəma ta Zlav Papaŋ ɓa. Nda ana sə, Yesu Kəristi masa aŋga nda maŋga mezlər ara aŋga ana,

²afa aŋga sə, ka və yaŋ tata ara jə ta kwakwas ta mavavas mebər tandakwa hay. A viya ana sə, mafay te mebər tandakwa hay babəla bay, amaa mafay te mebər ta ndah ta vavara fakwanay.

³Daha anda nahakwa yaŋ kad pə ma hay ta ma majawa ta Zlavay, ŋgesey, e ŋguzdek sə, anda sənakwa Zlavay

⁴Nda masa e gweɗ, gege: «Ya sən Zlavay», amaa a nah yaŋ kad pa ma hay ta ma majawa tata aabay sə, ŋgesey, aŋga nda maŋgəla ma, metehwe ana da vara vaw aabay.

⁵Amaa nda masa a nah yaŋ kad pa ma tata sə, ŋgesey, mawal Zlavay sə, ka nəhata tehwe da vara vaw. Ara nesey, anda sənakwa, andakwa macama ava aŋga.

⁶Nda masa a wulakiya, aŋga macama ava Kəristi sə, a lada e dey jaka pe cəv masa Kəristi ana te də jaka pa sə, may.

⁷Guula aɗaw hay masa ya walakwar elehey, ya vindakwar nesey sə, ma ta ma majawa waya bay, amaa ma ta ma majawa mava masa akwar ava aŋga ɓa dəga dapa mezlerey ana. Ma ta ma majawa mava ŋgesey sə, aŋga ma masa akwar ka cəna cay.

⁸Ava aŋga ana fakwanay anjəkar aŋga ma ta ma majawa ana waya masa ya ta vindakwar. Ŋgesey ana sə, metehwe ana e ŋguzdek dapa Kəristi va dapa akwar may, afa ləvaŋ a ŋgəla vaw, slam mawaɗa metehwe ana e weɗek cay.

⁹Nda masa a wulakiya, aŋga manjaha dapa slam mawaɗa, amaa a wala malamaŋ daha aabay dəmaŋ fe ndey bay sə, ŋgesey, aŋga cəɗem cəɗem dapa ləvaŋ hay heley.

¹⁰Nda masa a wal malamaŋ daha aabay dəmaŋ sə, aŋga dapa slam mawaɗa. Ara nesey, kwa jene ma ta zlafa makazlaɗ pe mebər aabay.

¹¹Amaa nda masa a wala malamaŋ daha aabay dəmaŋ fe ndey bay sə, ŋgesey, aŋga dapa ləvaŋ hay, e dey dapa ləvaŋ hay, a sən slam masa a də kad dapa sə, bay, afa ləvaŋ hay ac ka həɗazlan ndey vəda.

¹²Wude hey aɗaw, ya vindakwar leeter nesey sə, afa Zlavay ka pəlakwaɗ mebər takwar hay avəda mafay te mezel te Yesu Kəristi.

¹³Akwar Papaŋ te wude hey, ya vindakwaɗ sə, afa akwa sən Nda masa aŋga ɓa cay dəga dapa mezlerey ana. Akwar gawla hay, ya vindakwaɗ sə, afa akwar ka ŋgə bigula da yaŋ Nda suwe.

¹⁴Wude hey aɗaw, ya vindakwaɗ sə, afa akwa sən Zlav Papaŋ. Akwar Papaŋ te wude hey, ya vindakwaɗ sə, afa akwa sən Nda masa aŋga ɓa cay dəga dapa mezlerey ana. Akwar gawla hay, ya vindakwaɗ sə, afa akwar ava gədaŋ, ma ta Zlavay aŋga dapa akwar, akwar ka ŋgə bigula da yaŋ Nda suwe.

¹⁵Akwar ta wal vavara bay, kwa jene hay masa ac dapa sə, akwar te welec bay. Daha nda masa a wal vavara sə, ŋgesey, a ta zlafa mawal Zlav Papaŋ bay,

¹⁶afa jene hay fakwanay dapa vavara ara Mekeslə ta vaw, meŋgə ndey fe jə ta ndana, magal yaŋ mafay te zleley hay. Jeŋ ana hay fakwanay nesey sə, ece dek da vara Zlav Papaŋ bay, amaa ece dek dapa vavara.

¹⁷Vavara va jene hay masa ndana hay aca waya elehey sə, a ta ndəvata, amaa nda maŋga jene ara Zlav ta waya sə, a ta njah katar ka midakw.

¹⁸Wude hey aɗaw, nesey mamaɗ yaŋ ta pas ana hay, akwar ka cəna masa aca gwaɗiya, maslagəra te Kəristi e te dekey, anjəkar təlam nesey, maslagəra hay te Kəristi mabay, ac fana cay, andə da sənakwa mamaɗ yaŋ ta pas ana hay cay sə, jaka feceŋ ana.

¹⁹Ndah ana ŋgesey, ece dek deveŋ andakwa, amaa ac ka njah ndah tandakwa aabay. Daha ac ka njah ndah tandakwa sə, efes ac ta njah ava andakwa. Amaa ac ka gərdandakwa, afa e de ŋguzdek metehwe ana masa kwa nda amta deveŋ eceŋ aŋga nda tandakwa metehwe ana sə, aabay.

²⁰Takwar sə, akwar ka ŋgat Mesfen Mavəna jaka vara Kəristi, akwar fakwanay akwa səniya.

²¹Ya ka vindakwaɗ masa akwa sən metehwe ana bay sə, aabay, amaa akwa səniya, kwa maŋgal ma kusetke masa e dek dapa metehwe ana sə, aabay.

²²Nda maŋgəla ma sə, aŋga wa, aŋga nda macafa ma Yesu sə, aŋga Kəristi bay. Mawala maslagəra te Kəristi sə, nda masa a cafa ma Zlav Papaŋ va Wudiya.

²³Kwa waawa masa a sən Wat bay sə, ŋgesey, a cə ma fa Zlav Papaŋ. Nda masa a sən Wat sə, ŋgesey, a sən Zlav Papaŋ may.

²⁴Takwar sə, a lada mabəzad ma masa akwar ta cəna dəga dapa mezlerey ana sə, da njah dapa akwar. Daha mabəzad ma masa akwar ta cəna dəga dapa mezlerey ana aŋga dapa akwar sə, ŋgesey, akwar may, akwar ta njah dapa Wat va Zlav Papaŋ.

²⁵Nesey ma masa aŋga ana ka gwaɗa a ta vandakwa: Ma ana sə, manjah katar ka midakw.

²⁶Nesey jə masa ya wal vindakwar, da yaŋ ndah mayaha cəv ta mazlakədakwar.

²⁷Takwar sə, Mesfen masa akwar ta ŋgatiya da vara Kəristi sə, aŋga dapa akwar, akwar ka wal masa ndana mekele da sasərakakwar sə, ɓasabay, amaa ara masa Mesfen tata ana a sasərakakwar da yaŋ jene hay fakwanay, a sasərakakwar sə, metehwe ana, bəna maŋgal ma bay, afa ka sasərakakwar cay, akwar manjaha macama dapa Kəristi.

²⁸Ara nesey sə, wude hey aɗaw, manjah akwar macama ava aŋga, afa daha pas masa e te təhekey sə, andə ta sənakwa metehwe ana andə ta njahakwa ava aŋga, bəna hwar a da kəɗandakwa mafay ta masa andə ta njahakwa dəreŋ ava aŋga pas te mevehek tata bay.

²⁹Akwa səniya Kəristi sə, aŋga nda maŋga mezlər ara aŋga ana, masəna, kwa waawa maŋga mezlər ara aŋga ana sə, aŋga wut ta Zlavay.