Read Cuvok 1 Zaŋ 3 Bible Online

1 Zaŋ 3 - Cuvok bible

1 Zaŋ 3

¹Mawala mawal nda mazlakava masa Zlav Papaŋ ta ŋguzdiya kad andakwa. Aca zalandakwa wudeh ta Zlavay, eve metehwe ana, andakwa sə, wudiya hay. Mafay ana, ndah ta vavara aca zlafa masənandakwa bay, afa aca sən Zlav bay.

²Guula aɗaw hay masa ya walakwar elehey, e zler dəga təlam nesey, andakwa wudeh ta Zlavay, amaa masa andə ta njahakwa ana sə, ke ŋguzdek aabay heley. Anda sənakwa pas masa e te ŋguzdek vaw sə, andə ta njahakwa ara aŋga, afa andə ta walakwaɗ aŋga ana sə, aŋga meemey.

³Kwa nda wula wula masa aŋga ava mawulak yaŋ ta maŋgat jene dapa Kəristi sə, a da təra yaŋ tata mapana ara Yesu Kəristi masa aŋga mapana.

⁴Kwa nda wula wula maŋga mebərey sə, a ŋgə gada ava ma majawa ta Zlavay, afa mebərey sə, maŋgə gada ava ma majawa.

⁵Amaa akwa səniya, Yesu Kəristi e dek kad pa vavara nesey sə, ka ta kəs mebər hay, aŋga sə, aŋga eve mebər kwa kusetke da vara vaw aabay.

⁶Ara nesey, kwa waawa masa aŋga macama ava aŋga sə, e ŋgə mebər ɓasabay. Kwa waawa maŋga mebərey sə, ka wala aabay, kwa ka sənaw aabay.

⁷Wude hey aɗaw, mep leŋgesl, a lada kwa ndana da zlakdakwar bay. Nda manaha yaŋ kad pe meŋgə mezlər ara aŋga ana sə, aŋga nda maŋga mezlər ara aŋga ana, ara Kəristi nda maŋga mezlər ara aŋga ana.

⁸Nda maŋga mebər sə, aŋga dapa ha ta bay ta haalay, afa dəga dapa mezlerey ana, bay ta haalay aŋga nda maŋga mebərey. Mawala mafay te mey masa Wut ta Zlavay e təhekey: E təhek sə, ka ta gədas mezlər ta bay ta haalay.

⁹Nda masa Zlav te heyekey sə, e ŋgə mebər ɓasabay, afa ma ta Zlavay aŋga dapa aŋga ara hulefey. A zlafa meŋgə mebər ɓasabay sə, afa Zlav te heyekey.

¹⁰Anda sənakwa wudeh ta Zlavay va wudeh ta bay ta haalay sə, jaka pe jə nesey: Nda masa e ŋgə mezlər ara aŋga ana aabay sə, aŋga wut ta Zlav bay. Asaya, kwa nda masa a wal malamaŋ bay sə, aŋga wut ta Zlav bay.

¹¹Mabəzad ma masa akwar ta cəna dəga dapa mezlerey ana sə, aŋga nesey: Mawalakwa vaw fa vaw tandakwa.

¹²Andə ta ŋgakwa ara Kayen bay, aŋga sə, aŋga jaka gəva ta Nda suwe, ka kəɗa malamaŋ avəda cukw cukw. A kəɗiya ana sə, mafay te mey? Mafay te mezlər tata hay ac mambəla ana aabay, anjəkar ta malamaŋ sə, mezlər tata hay ac ara aŋga ana.

¹³Malama va dəma hay, akwar ta həzla yaŋ takwar bay, kwa daha vavara a walakwar fe ndey bay.

¹⁴Tandakwa sə, anda sənakwa andə ka dakakwa dapa maməcay kad pe mesfeney, afa anda walakwa malamaŋ tandakwa hay. Nda masa a wal nda bay sə, aŋga manjaha dapa maməc heley.

¹⁵Nda masa a wala malamaŋ daha aabay dəmaŋ fe ndey bay sə, aŋga nda makəɗa nda. Akwa səniya, kwa nda makəɗa nda wula wula sə, aŋga eve mesfen katar ka midakw da vara vaw sə, aabay.

¹⁶Anda sənakwa mawal vaw sə, jaka pe jə nesey: Yesu ka vana mesfen tata avəda mafay tandakwa. Ara aŋga ana, andakwa may, a lada anda vakwa mesfen tandakwa kad malamaŋ tandakwa hay.

¹⁷Daha ndana aŋga eve zleley hay ta vavara na ɓa, a wala malamaŋ daha aabay dəmaŋ masa a hwar jene, a ŋgafa metekwen aabay sə, ŋgesey, mawal nda ta Zlav da njah dapa aŋga sə, meemey?

¹⁸Wude hey aɗaw, anda ta walakwa vaw eve megweɗey va ava ɗaf ta ma babəla bay, amaa eve mezlərey va megweɗ metehwe ana.

¹⁹Jaka pe jeŋ ana hay nesey, andə ta sənakwa, andakwa jaka gəva te metehwe ana, ara nesey, andə ta təkakwa rav tandakwa fəma ta Zlavay,

²⁰afa daha rav tandakwa a jawandakwa ava ma hay, Zlavay sə, a fəna rav tandakwa, a vən jene hay fakwanay.

²¹Guula aɗaw hay masa ya walakwar elehey, daha rav tandakwa a jawandakwa ava ma hay aabay, ŋgesey, anda zlafa magwaɗakwa kad Zlavay ava zidaw dapa vaw ɓasabay,

²²kwa daha anda nəkakwa meemey da vara vaw sə, andə ta ŋgatakwa, afa anda nahakwa yaŋ kad pə ma hay ta ma majawa tata va meŋgə jene masa a wafa.

²³Mawala masa ma ta ma majawa tata ta gwaɗandakwa: Makəsakwa wudiya Yesu Kəristi va mawalakwa vaw fa vaw tandakwa ara masa aŋga ta gwaɗandakwa te meŋgey.

²⁴Kwa waawa masa a nah yaŋ kad pa ma hay ta ma majawa sə, aŋga dapa Zlavay, Zlavay ana may aŋga dapa aŋga. Anda sənakwa Zlav aŋga ava andakwa sə, jaka pe jeŋ ana hay nesey, mbalay Mesfen Mavəna masa aŋga ta vandakwa.