Read Cuvok 1 Zaŋ 4 Bible Online

1 Zaŋ 4 - Cuvok bible

1 Zaŋ 4

¹Guula aɗaw hay masa ya walakwar elehey, akwar ta kəs mesfen hay fakwan pa rav takwar bay, amaa mewuzeɗec mesfeney ana hay, masəna gəla mesfeney ana hay ece dek da vara Zlav kwa, afa ndah mapana yaŋ tec ka ndah mehwedek ma sə, ac makwakwaca mabay dapa vavara.

²Akwar da sən Mesfen Mavəna sə, jaka pe jə nesey: Mesfen wula wula masa e gweɗ metehw tehwe ana Yesu Kəristi e dek dapa slaw ta vaw sə, mesfeney ana ŋgesey ta Zlavay.

³Amaa mesfen wula wula masa a cafa ma Yesu e dek dapa slaw ta vaw bay sə, mesfen ana ŋgesey, ta Zlav bay, aŋga mesfen ta maslagəra te Kəristi, masa akwar ka cəna ac ka sləfaw, e te dekey, təlam nesey ana, aŋga dapa vavara cay.

⁴Akwar wude hey aɗaw, masa akwar ndah ta Zlavay, akwar ka ŋgə bigula da yaŋ ndah mapana yaŋ tec ka ndah mehwedek ma ana ŋgesey, afa Mesfen maŋga mezlər dapa akwar sə, aŋga ava gədaŋ ka fəna mesfen maŋga bay da yaŋ ndah ta vavara.

⁵Eceŋ sə, ac ndah ta vavara, ece gweɗ sə, ara ndah ta vavara te gweɗey, ndah ta vavara ana ŋgesey ece cənecen ma.

⁶Amaa tandakwa sə, andakwa ndah ta Zlavay. Nda masa a sən Zlavay sə, a cənandakwaɗ ma. Nda masa aŋga nda ta Zlav bay sə, a cənandakwaɗ ma aabay. Anda sənakwa Mesfen te metehwe ana va mesfen ta mazlak nda sə, jaka pe jeŋ ana hay nesey.

⁷Guula aɗaw hay masa ya walakwar elehey, mawalakwa vaw fa vaw tandakwa, afa mawal nda sə, e dek da vara Zlavay, nda masa a wal nda sə, aŋga ŋgesey, Zlav te heyekey, a sən Zlavay.

⁸Nda masa a wal nda bay sə, ka sən Zlav aabay, afa Zlavay sə, a wal nda.

⁹Mawala masa gwagumaw Zlav e ŋguzdek mawal nda tata kad andakwa: Ke zlərek Wudiya malay kad pa vavara, afa andə da njahakwa eve ndey jaka pa aŋga.

¹⁰Mawal vaw sə, aŋga ara nesey: Andakwa ta walakwa Zlav bay, mawalandakwa sə, sesəker aŋga, ke zlərek Wudiya ara jə ta kwakwas masa mezleh ka vavas mebər hay tandakwa.

¹¹Guula aɗaw hay masa ya walakwar elehey, daha Zlav ka walandakwa ara nesey sə, a lada andakwa may, anda walakwa vaw fa vaw tandakwa may.

¹²Zlavay sə, kwa ndana ka wala aabay. Amaa daha anda walakwa vaw fa vaw tandakwa sə, Zlav a njah dapa andakwa, ŋgesey, mawal nda tata dapa andakwa ka nəhata.

¹³Andə da sənakwa masa andakwa macama ava Zlavay, aŋga may, aŋga macama ava andakwa sə, jaka pe jə nesey: Ka vandakwa Mesfen tata.

¹⁴Taciya sə, andə ka wala, anda tə yaw da yaŋ ana, masa Zlav Papaŋ ke zlərek Wudiya ara nda mambəla nda dapa vavara.

¹⁵Nda masa e gweɗ metehw tehwe ana Yesu aŋga Wut ta Zlavay sə, Zlav aŋga dapa aŋga, aŋga may aŋga dapa Zlavay.

¹⁶Tandakwa sə, anda sənakwa mawal nda ta Zlav masa e ŋguzdek kad pa taɓa tandakwa, andə ka kəsakwa pa rav tandakwa. Zlavay sə, a wal nda, nda masa a wal nda sə, aŋga dapa Zlavay, Zlavay aŋga dapa aŋga may.

¹⁷Daha mawal nda ka nəhata fakwanay dapa andakwa, andə ta njahakwa eve mesən jene metehwe ana pas ta matəɗ ma, afa manjah tandakwa dapa vavara nesey aŋga ara te Yesu Kəristi.

¹⁸Zidaw dapa mawal nda sə, aabay, mawal nda masa fakwanay sə, a mbas zidaw, afa zidaw sə, aŋga macama eve mekətey, nda masa a ŋgə zidaw sə, aŋga manəha ava mawal nda masa fakwan aabay.

¹⁹Tandakwa sə, anda walakwa vaw, afa aŋga sə, ka walandakwa kamma.

²⁰Daha ndana e gweɗey: «Ya wal Zlavay», amaa a wala malamaŋ, daha aabay dəmaŋ fe ndey bay sə, aŋga nda maŋgəla ma. Eve metehwe ana, nda masa aŋga malamaŋ daha aabay dəmaŋ masa a wala eve ndey tata, a waya bay, naa, a da wal Zlav masa a wala bay sə, meemey?

²¹Mawala ma ta ma majawa masa anda təhazakwa da vara vaw: Nda masa a wal Zlavay sə, da wal malamaŋ daha aabay dəmaŋ may.