Read Cuvok 1 Zaŋ 5 Bible Online

1 Zaŋ 5 - Cuvok bible

1 Zaŋ 5

¹Kwa nda wula wula masa ka kəsaw pa rav, Yesu aŋga Kəristi[1] sə, nda ŋgesey Zlav te heyekey, Kwa nda wula wula masa a wal Zlav mayaha ndana hay, a wal nda masa Zlavay ana te heyek sə, may.

²Andə da sənakwa anda walakwa wudeh ta Zlavay sə, jaka pe jə nesey: Daha anda walakwa Zlavay va meŋgə mezlər ava ma hay ta ma majawa tata,

³afa jə masa e ŋguzdek mawal Zlavay sə, e ŋguzdek ara nesey: Manah yaŋ kad pa ma hay ta ma majawa tata. Ma hay ta ma majawa tata ana hay aca fənandakwa fa gədaŋ sə, aabay,

⁴afa nda masa Zlav te heyek fakwanay sə, aŋga bigula da yaŋ vavara. Mavandakwa gədaŋ ta maŋgə bigula da yaŋ vavara sə, makəsparav tandakwa.

⁵Bigula da yaŋ vavara sə, wa? Naa nda makəsa Yesu aŋga Wut ta Zlavay?

⁶Yesu Kəristi e dek sə, ava yam va eve bembez, bəna ava yam babəla bay, amaa ava yam va bembez. Mesfeney ta tə yaw da yaŋ ana, afa Mesfeney sə, a ŋgal ma aabay.

⁷Jene hay mahkar mata yaw ɓa:

⁸Mesfeney, yam va bembez, ac mahkar ana nesey, matə yaw tec amta.

⁹Anda kəsakwa matə yaw ta ndana hay, anjəkar matə yaw ta Zlav a fəna gaa, afa matə yaw ta Zlav sə, masa ka tə yaw da yaŋ Wudiya.

¹⁰Nda masa ka kəs Wut ta Zlavay, aŋga ava matə yaw ana nesey dapa rav tata. Nda masa ka kəs Zlav aabay, ka paɗ Zlavay ana ka nda maŋgəla ma, afa aŋga ava makəsparav fa matə yaw masa Zlavay ta gwaɗiya mafay ta Wudiya sə, aabay.

¹¹Matə yaw ana sə, aŋga kana: Zlav ka vandakwa manjah katar ka midakw, manjah katar ka midakw ana sə, aŋga dapa Wudiya.

¹²Nda masa aŋga ava Wat ta Zlavay sə, aŋga ava manjah katar ka midakw, amaa nda masa aŋga ava Wat ta Zlav aabay sə, aŋga ava manjah katar ka midakw aabay.

¹³Ya vindakwaɗ fakwan nesey sə, afa akwar da səna, akwar ka ŋgat manjah katar ka midakw, akwar masa akwar ava makəsparav dapa mezel ta Wut ta Zlavay.

¹⁴Mawala mesen jene metehwe ana tandakwa fəma tata, daha anda nəkakwa jene vara vaw ara masa aŋga ta waya sə, a cəkafandakwa zləmay.

¹⁵Ara masa anda sənakwa a cəkafandakwa zləmay kwa anda nəkakwa mey mey, anda sənakwa andə ta ŋgatakwa jə masa andə ka nəkakwa da vara vaw.

¹⁶Daha ndana a wala malamaŋ daha aabay dəmaŋ e ŋgə mebərey, mebər masa a hwad nda pa maməc aabay, a da cə mbahw, Zlav a mbəla avəda, daha eve metehwe ana, mebər masa maŋga sə, a hwad nda pa maməc aabay. Mebər masa a hwad nda pa maməc sə, aɓa, ye gweɗ masa macə mbahw mafay te mebərey ana ŋgesey sə, aabay.

¹⁷Jə mambəla ana aabay fakwanay sə, mebərey, amaa mebər hay fakwanay aca hwad nda pa maməc sə, aabay.

¹⁸Anda sənakwa kwa waawa masa Zlav te heyekey sə, e ŋgə mebər ɓasabay, afa Wut ta Zlavay a ɓəlafa, nda suwe a zlafa maŋgana jene kwa kusetke aabay.

¹⁹Anda sənakwa, andakwa sə, andakwa ndah ta Zlavay, amaa ndana hay dapa vavara fakwanay ac da hwaɗ ta ha ta nda suwe.

²⁰Anda sənakwa Wut ta Zlavay ke dekey, ka vandakwa leŋgesl, ka ta sən Zlav masa aŋga metehwe ana. Andakwa macama ava Zlav masa aŋga metehwe ana jaka pa Wudiya Yesu Kəristi. Aŋga sə, aŋga Zlav masa metehwe ana va aŋga manjah katar ka midakw.

²¹Wude hey aɗaw, mepə leŋgesl ava mbat hay.