Read Cuvok 2 Zaŋ 1 Bible Online

2 Zaŋ 1 - Cuvok bible

2 Zaŋ 1

¹Yey, mesnendə ta makəsparav hay, ya vində leeter nesey kad Ŋgwaz[1] masa Zlav ka yahaɗha va wudiya hay masa ye welec tehwe ana. Mawalakwar ana sə, ya amta bay, amaa ndah fakwan masa aca sən metehwe ana.

²Anda walakwar ana, afa metehwe ana masa aŋga dapa andakwa, a ta njah ava andakwa katar ka midakw.

³Da lada sə, Zlav Papaŋ va wudiya Yesu Kəristi da vandakwa mambəla ana, metekweney va metehey, afa anda da njahakwa dapa metehwe ana va mawal vaw.

⁴Ye ke wesl macəkuma bay, afa ya ka ŋgat wudeh takaa dərziya ece dey dapa cəv te metehwe ana ara ma majawa masa andaw ta ŋgatakwa da vara Papaŋ tandakwa.

⁵Yaw, təlam nesey, ŋgwaz masa ya waya elehey, wala jə masa ya nəkafakaa, masa ya vindakaɗ nesey sə, ma majawa waya bay, amaa ma majawa masa anda sənakwa dəga dapa mezlerey ana, ma ana, gege: Mawalakwa vaw fa vaw tandakwa.

⁶Mawala ma da yaŋ mawal vaw: A lada anda dakwa dapa cəv ta ma hay ta ma majawa. Nesey, ma majawa masa akwar ka cəna dəga dapa mezlerey ana, afa akwar de dey dapa cəvey ana nesey,

⁷afa ndah mafəca nda hay mabay ec ke kwekwecec dapa vavara. Aca gwam ka kəs masa Yesu Kəristi e dek dapa slaw ta vaw ara ndana sə, bay. Nda ana ara ŋgesey sə, aŋga nda mafəca nda, aŋga maslagəra te Kəristi.

⁸Mep leŋgesl fə yaŋ takwar, afa akwar ta zana wut te mezlər takwar hay bay, amaa akwar da ŋgat meyəv te mezlər takwar fakwanay.

⁹Nda masa a zlaŋda cəvey ana, va a cəp mesesərek hay mazlakava te Kəristi aabay sə, aŋga macama ava Zlav aabay. Amaa nda masa aŋga manjaha dapa mesesərek hay mazlakava te Kəristi sə, aŋga macama ava Zlav Papaŋ va Wudiya.

¹⁰Daha ndana e dek kad varakwar, a hwadakwar mesesərek hay mazlakava na bay sə, akwar ta kəsiya kad hwaɗ ta way takwar bay, akwar ta gwaɗafa bay.

¹¹Nda masa ka gwaɗafa sə, ŋgesey, ka camata eve mezlər tata hay mambəla ana aabay.

¹²Ye eve jene hay mabay ta mavindakwar, amaa ya wal mavindakwaɗ ma ana hay pe ɗelewer ava jə te mevində bay, afa ya wulak yaŋ te medey kad varakwar ana, anda da kərakwa maɗay ndey eve ndey, afa meweslə tandakwa da nəhata.

¹³Wudeh ta dəmakw masa Zlav ta yahiya sə, aca gwaɗafakaa may[2].