Read Cuvok 3 Zaŋ 1 Bible Online

3 Zaŋ 1 - Cuvok bible

3 Zaŋ 1

¹Yey, ye mesnendə ta makəsparav hay ta vində leeter ana nesey. Ya vindiya kad Gayus guula aɗaw masa ya waya elehey eve metehwe ana.

²Guula aɗaw masa ya walakaa elehey, ya wal ka da ŋgat macəyaŋ dapa jene hay fakwanay. Ya səniya manjah takaa dapa cəv ta Zlavay sə, mambəla ana, ya wal sə, a lada ka da njah werwer saya may.

³Ye ke wesl mabay da yaŋ kaa, afa medek ta malamaŋ hay kad fana sə, ac ka tə yaw da yaŋ ma metehwe ana masa e ŋguzdek dapa manjah takaa. Ke də cəɗem cəɗem dapa jə metehwe ana.

⁴Yaw, jene mekele ma da weslədeyey mafəna masa ya ta cəna wudaɗ hay ece də dapa ma metehwe ana sə, aabay.

⁵Guula aɗaw masa ya walakaa elehey, ka dapa mejənec malamaŋ hay dapa makəsparav kwa ac məlaŋ hay. Ke ŋgə ŋgesey, jə masa e ŋguzdek mezlər takaa eve cəvey ana.

⁶Ac ka tə yaw da yaŋ mawal nda takaa fəma ta Macam yaŋ ta ndah ta Zlavay fana. Ya ŋgakaa mbahw, jənec dapa maŋgway teceŋ ana ara masa Zlav ta waya.

⁷Eceŋ sə, ece zleftek da way teceŋ mafay te mezel te Kəristi. Kwa ac ka kəs jene vara ndah masa aca sən Zlav bay sə, aabay.

⁸Ara nesey, a lada anda jənakwa eceŋ, afa anda da camakwa vaw eve eceŋ fa slam ana dapa mabəzad ma metehwe ana may.

⁹Ya ka vində leeter kusetke ɓa kad pa Macam yaŋ ta ndah ta Zlavay, amaa Diyawtəref masa a wal manjah ka nda mazlakava ta ndana hay dapa macam yaŋ ana sə, ka kəsandaw ka ndah mambəla ana aabay.

¹⁰Mafay ana, pas masa ya ka ta husata varakwar sə, ya ta ŋguzdakwaɗ mezlər tata hay mambəla ana aabay masa aŋga ta ŋgiya fakwanay. Ara megweɗey, ya ta ŋguzdakwaɗ ma hay saw masa aŋga ta gwaɗiya da yaŋ andaw. Na hay babəla bay, aŋga ava yaŋ tata ana, a wal makəs malamaŋ hay masa məlaŋ hay kad hwaɗ ta way tata bay. E recen ma ta ndah masa aca wal mekəseceŋ kad hwaɗ ta way teceŋ. Asaya, e mbesec dapa Macam yaŋ ta ndah ta Zlavay.

¹¹Guula aɗaw masa ya walakaa elehey, ka ta zazahw jə mambəla ana aabay ŋga bay, amaa zazahw jə masa mambəla ana. Nda maŋga jə mambəla ana sə, ŋgesey, aŋga nda ta Zlavay, amaa nda maŋga jə mambəla ana aabay sə, ŋgesey, a sən Zlav bay.

¹²Te Demetəriyus sə, ndana hay fakwanay aca hahəmiya. Metehwe ava yaŋ tata ana, a tə yaw da yaŋ ana. Kwa andaw ava yaŋ taciya, anda tə yaw da yaŋ ana ara nesey. Yaw, ka səniya ma masa anda ta gwaɗakaa nesey sə, ma metehwe ana.

¹³Ya wal ma ta gwaɗakaa ma da yaŋ jene hay gaa saya, amaa ya wal mevindeɗec ma ana hay fakwan pe leeter ana bay,

¹⁴afa ya wal madaɗay kad varakaa dapa manah hay ana nesey. Ara nesey, andə da kər maɗay ndey eve ndey.

¹⁵A lada metehey da njah ava kaa. Guula tandakwa hay fana, aca gwaɗafakaa. Gweɗefec guula tandakwa hay dərŋga amta amta fakwan may.