Read Cuvok Zud 1 Bible Online

Zud 1 - Cuvok bible

Zud 1

¹Yey Zud, nda maŋga mezlər te Yesu Kəristi, malamaŋ ta Zak ta vində leeter nesey, kad akwar ndah masa Zlav Papaŋ, ta zalakakwar va ta walakwar. Asaya, akwar ndah masa Zlav ta raɓaɗakwar ha kad Yesu Kəristi.

²Da lada sə, Zlav da pəlakwaɗ mebərey, da njahaɗakwar dapa metehey va mawal vaw mafəna ana.

³Guula aɗaw hay masa ya walakwar elehey, ya ka wulakaw mabay ta mavindakwar ma da yaŋ membəl masa a ɓəlandakwa fakwanay. Ya ka wala sə, cama ya vindakwar leeter ana, afa a da vakwar gədaŋ te meŋgə vəram mafay te mesesərek hay masa Zlav ta viya kad ndah tata dəɓa amta katar ka midakw.

⁴Ya vindakwar ana sə, afa ndah masa Zlav ke təɗec ma yaŋ zleezle mavinda daha, ec ke sehwec pa taɓa takwar meereɓey. Aca ŋgwad ma masa e gweɗ da yaŋ mambəla ana ta Zlav tandakwa ka ta ŋgə jə mambəla ana bay ara ac ta waya va macafa ma nda masasəraka nda, Bay tandakwa Mazlakava Yesu Kəristi.

⁵Kwa akwa sən ma da yaŋ ma masa ya ta gwaɗakwar na mambəla ana fakwan cay, amaa ya sləfakwaɗ saya. Zleezle Bay Zlavay ke mbəlekec tərsam te Isreyel hay avəda dapa vavara ta Misəra. Ava dəɓa ana, ke bezlec ndah dərziya masa aca gwam ka kəs ma tata bay sə, avəda.

⁶Masənafa maɗay ta maskəla hay dərziya masa ac ka zlaŋda kwakumakw ta gədaŋ masa Zlav te veceŋ, ac ka gərda slam ta manjah teceŋ. Ara nesey, Zlav ke ɓəzleɗec ha katar ka midakw pa ləvaŋ meɓekɓek ana, ke jeweceŋ ava jajarɓay, afa aca ra ɓal pas ta matəɗ ma yaŋ mazlakava.

⁷Ara aŋga ana, masənafa maɗay ta ndah dapa berne ta Sawduma, ta Gwamara va berne hay mekele mekele da cak teceŋ. Ac ka ŋgə jene hay mambəla ana aabay ara maskəla ana hay, ac ka yah makəs vaw eve jene hay saw masa ta makəs vaw bay. Təlam nesey, Zlav e ŋgedec marga dapa kwakwaw masa e te ndəv aabay katar ka midakw. Marga ana ŋgesey, e ŋguzdek sə, a lada anda pakwa leŋgesl fə yaŋ tandakwa.

⁸Ndah ana ŋgesey sə, medə teceŋ ara aŋga ana, dapa mawulak yaŋ tec masa matərwaɗa sə, aca dakal vaw teceŋ eve mebər hay mekele mekele ara makəs vaw fa zaŋ ana, map gədaŋ ta Zlavay ke jene taambəla va malaf mehehəm ta maskəla hay.

⁹Kwa Misel, bay ta maskəla hay, dapa masa aca ŋgə gada fa slaw ta vaw ta Muyiz ava bay ta haalay sə, ka lafaw aabay, amaa ka gwaɗa, gege: «A lada Bay Mazlakava da ŋgadakaa hahar.»

¹⁰Amaa teceŋ sə, aca laf jə masa aca sən ma da yaŋ ana bay. Aca cəp sə, mawulak yaŋ teceŋ ara jə te ley hay masa aca sən jene bay. Ara nesey, mawulak yaŋ teceŋ ana ke zenec avəda.

¹¹Wabaw kad eceŋ, afa ac ka cəp cəv ta Kayen. Ac ka paɗ yaŋ teceŋ pa maŋgal ma ka ta ŋgat səlay ara Balam ta ŋgiya zleezle. Ac ke zeceŋ saya, afa ac ka ŋgaŋgəra nda ara nda mezel Kawrey.

¹²Maləzakwaɗ ɗaf takwar masa akwa ndiya ava malamaŋ hay dapa makəsparav sə, eceŋ ana. Aca ndə jene va masə jene mabay, amaa kwa hwar e ŋgec aabay, afa aca wulak sə, hwaɗ tec babəla. Ac ara zlav ta yam hay masa memeɗ hay te hwedeceŋ, amaa yam a slə dapa aabay. Ac ara wudez hay masa kwa kiya te meheyey sə, ece hey aabay. Ac ara wudez hay makula, maŋgəla avəda dapa slaslalay ana.

¹³Ac ara meŋgeŋgel ta yam mafayakfayak ana masa e cewesl saw. Mebər teceŋ e ŋguzdek ara megəveɗ ta yam da ma ta wayam. Ac ara menjewzle hay masa aca ŋgway saw. Mafay ana, Zlav ke ləmedec slam dapa ləvaŋ meɓekɓek ana katar ka midakw.

¹⁴Zleezle Enakw, nda dapa tərsam ta Adamaw dəɓa tasəla ke hwedek ma, gege: «Mawala, Bay Mazlakava e te dekey ava maskəla tata hay gaa,

¹⁵ke te təɗec ma yaŋ ndana hay fakwan dapa vavara. E te təɗec ma yaŋ ana sə, kad ndana hay fakwan maŋga mebər hay, mezlər hay fakwan masa ac ta ŋgiya mambəla ana aabay va ma hay mambəla ana aabay masa ac te gweɗ da yaŋ ana.»

¹⁶Ndah ana ŋgesey, cəɗem cəɗem ece hwehwərey da yaŋ ndah dərziya, ece pec mebərey. Aca tataɓ sə, mekekesl ta vaw teceŋ masa e tehteh bay, ɗaf ta ma tec hay ece gweɗek sə, jene hay masa ec eve cəvey aabay, ece hehəlecen yaŋ ta ndana hay afa ac da ŋgat jene hay masa ac ta waya.

¹⁷Kad akwar guula aɗaw hay, masənafa mabəzad ma ta maslaŋ hay ta Bay tandakwa Mazlakava Yesu Kəristi zleezle da yaŋ jə masa e te ŋgə pəsna.

¹⁸Ac ka gwaɗakwar: «Pas masa mbala vavara e te ndəvey sə, ndana hay ac ta sasarafakwar, ac ta njahay dapa macəp jə mambəla ana aabay masa aca waya.»

¹⁹Ndah ana hay ŋgesey, ac te hwedek mavan vaw pa taɓa ta makəsparav hay, ac ava mawulak yaŋ ta vavara, ec eve Mesfen Mavəna aabay.

²⁰Amaa takwar guula aɗaw hay, madaɗay dapa mapaɗ manjah takwar fa makəsparav takwar mapana ana. Macə mbahw ava gədaŋ te Mesfen Mavəna,

²¹Majaha vaw dapa mawal vaw ta Zlavay, mapaɗ maɓal jene takwar dapa metekwen ta Bay tandakwa Mazlakava Yesu Kəristi masa a ta vandakwa manjah katar ka midakw.

²²Ndah masa ac dapa mawulak yaŋ, mekəseceŋ eve meŋgefec metekweney,

²³membəlekec avəda ava mepəreslekec dapa kwakwaw. Ta ndah dərziya sə, mekəseceŋ eve metekweney, amaa mep leŋgesl ta macam vaw eve eceŋ, afa kwa rəkwat tec hay sə, ac madakala eve mebər hay masa ac ta ŋgiya.

²⁴Kad nda masa aŋga ava gədaŋ ɓa ta maɓəlafakwar dapa metəɗey va ma ta zlacaɗakwar fəma, masa akwar sə, ma da yaŋ akwar kwa kusetke aabay, a fəma te membeɗ tata dapa mewesley,

²⁵kad Zlav masa aŋga pal aŋga amta, aŋga nda mambəlandakwa jaka pa Yesu Kəristi Bay tandakwa Mazlakava, membeɗey, mesekey, gədaŋ mazlakava va gədaŋ ta bay dəga vavara malama bay heley, pəsna va katar ka midakw. E de ŋgey!