Read Cuvok Maŋguzad jene hay kad Zaŋ 1 Bible Online

Maŋguzad jene hay kad Zaŋ 1 - Cuvok bible

Maŋguzad jene hay kad Zaŋ 1

¹Maŋguzad jene te Yesu Kəristi masa Zlav ta vana, ke te ŋguzdecen kad ndah maŋga mezlər tata hay da yaŋ jene hay masa ac te ŋgə maayaŋ kad fəma. A ŋguzdiya ana sə, ava mazlar maskəla tata kad vara Zaŋ, nda maŋga mezlər tata.

²Zaŋ ana may, ka tə yaw da yaŋ ana, jene hay masa aŋga te weleceŋ, jeŋ ana hay sə, ac nesey: Ma ta Zlavay va metehwe ana masa e ŋguzdek jaka pa Yesu Kəristi.

³Mapəsma ɓa kad nda majaŋga ma ana nesey, kad ndah macəka zləmay fa ma hay masa ece dek da vara Zlavay, va kad ndah matəhaza ma ana mavinda dapa sə, mambəla ana afa pas ana aŋga hukw cay.

⁴Yey, Zaŋ ta vində leeter nesey kad Macam yaŋ hay tasəla ta makəsparav hay dapa vavara ta Azi. Zlavay, nda masa aŋga ɓa pəsna, wagaa melem ta vavara sə, aŋga ɓa cay va masa e te dekey, a da vakwar mambəla ana va meteh tata. Da lada sə, mesfen hay tasəla masa ac fəma ta gwadadakw tata da vakwar mambəla ana va metehey.

⁵Asaya, da lada sə, Yesu Kəristi da vakwar mambəla ana va metehey, aŋga masa nda matana yaw eve cəvey ana, aŋga cəvandaw ta ndah mepərekek macaaca dapa maməcay, aŋga Bay ta bay hay dapa vavara. Kad nda masa a walandakwa, masa ka mbəlakandakwa avəda dapa mebər tandakwa jaka pe bembez tata,

⁶masa ka tərandakwa avəda ka ndah ta wunam ta bay tata va ka ndaakwas hay ta Zlav Papaŋ, da lada sə, ndana hay aca ra səna mehehəm tata va gədaŋ katar ka midakw. E de ŋgey!

⁷Menjerey, e dek dapa zlav ta yam hay, ndana hay fakwanay ac ta wala, kwa ndah masa ac ka zləlaw, tərsam hay dapa vavara fakwanay ac ta njah dapa matakwa[1] mafay tata. Aŋga! E de ŋgey!

⁸Bay Zlavay, ke gweɗ, gege: «Yey sə, ya Alfa va Awmiga[2], nda masa aŋga ɓa pəsna, wagaa melem ta vavara sə, aŋga ɓa cay va masa e te dekey, nda masa aŋga ava gədaŋ da yaŋ jene hay fakwanay.»

⁹Yey, Zaŋ malamaŋ takwar mafay ta masa andə ka tərtandakwa amta dapa Yesu. Andakwa malamaŋ hay dapa Wunam ta bay ta Zlavay va malamaŋ hay jaka pa masə marga hay va maɓəsiya dapa mepəsek. Yey sə, ec ke təheziyey avəda, ec ke kezleɗiyey pa vavara mezel Patmaws [3]dapa taɓa ta yam mafayakfayak ana, afa yey ta bəzad ma ta Zlavay va maŋguzad matə yaw te Yesu.

¹⁰Dapa pas ta Bay Mazlakava, Mesfen Mavəna ke təheziyey, ya ka cəna uway ɓa e gweɗek ava gədaŋ jaka ava dəɓa aɗaw ara uway te dərem.

¹¹Uway ana, e gweɗiyey, gege: Jə masa ka wala nesey sə, vindaɗ pa livəra, ke de zlərecen kad Macam yaŋ hay ta ndah ta Zlavay tasəla dapa berne te Efez, ta Səmirna, ta Pergam, ta Tiyatira, ta Sardis, ta Filadelfiya va ta Lawdikiya.

¹²Pəla ya ŋgwad ma ka ta wala nda megweɗiyey. Ye te njer sə, baa fe petərla hay ta gənaɓ ava ha ana hay tasəla.

¹³Dapa taɓa te petərla ana sə, ya ka wala jene ɓa ara wut ta nda. Nda ana aŋga ava rəkwat mazambəla ana fa vaw kasl fa dəɓa te sek. Aŋga majawa ava kanda ta gənaɓ fa rav.

¹⁴Yaŋ va ŋgwec ta yaŋ ta nda ana e weɗ ndeɗ ndeɗ ara gagəmay va ara zlav ta yam, wut te ndey tata ara neneŋ ta kwakwaw magamgam ana.

¹⁵Sek tata hay ece zlezley ara ɓəray mambəla ana masa ndana ta həniya ava kwakwaw. Uway tata sə, e rerem ara yam te vevə dapa maajav mazlakava.

¹⁶Nda ana, aŋga ava menjewzle hay tasəla matəhaza dapa ha ta zam tata, kafaya masa ma ana makəɗa ecew ecew sə, e təhek dapa ma tata. Ndey tata e weɗ ara pas masa e weɗ ta yaŋ pas.

¹⁷Masa ya wala ara nesey sə, pəɗe! Ye təɗ kad fəma tata ara ya nda maməca, amaa ke pefiyey ha ta zam tata, ke gweɗiyey, gege: «Ke lel bay, yey sə, ya nda macaaca ana, ya nda metekweɗ ana.

¹⁸Yey sə, ye eve ndey. Ya ka məcata, amaa təlam nesey, ye eve ndey katar ka midakw, Ya ava gədaŋ ɓa da yaŋ maməcay va vavara ta ndah maməca.

¹⁹Vinda jə masa ka ka wala, jə masa e ŋgə pəsna va masa e te ŋgə maayaŋ kad fəma.

²⁰Aha, cəna ma maraɓa da yaŋ menjewzle hay tasəla dapa ha ta zam aɗaw va petərla hay ta gənaɓ ava ha ana hay tasəla: Menjewzle hay tasəla sə, ac maskəla hay ta Macam yaŋ hay ta ndah ta Zlavay tasəla. Petərla hay tasəla sə, ac Macam yaŋ hay ta ndah ta Zlavay tasəla.»