Read Cuvok Maŋguzad jene hay kad Zaŋ 13 Bible Online

Maŋguzad jene hay kad Zaŋ 13 - Cuvok bible

Maŋguzad jene hay kad Zaŋ 13

¹Ava dəɓa ana, ya ka wala gənaw ɓa e təhek dapa yam mafayakfayak ana, aŋga ava yaŋ hay tasəla, dərem hay fə yaŋ kuraw. Fe dərem amta amta fakwanay sə, maslalba ta matəkaɗ yaŋ matəkaɗa fətiya. Mezel ta malaf Zlavay mavinda fə yaŋ ana amta amta fakwanay.

²Gənaw ana masa ya wala sə, aŋga ara mambalam, sek tata hay ac ara sek ta dambarzla, ma tata aŋga ara ma ta mabar. Gədam sə, ka van gədaŋ tata mazlakava, gwadadakw tata va matimaazlaɓ tata mazlakava kad gənaw ana.

³Yaŋ ta gənaw ana amta deveŋ yaŋ hay tasəla sə, aŋga ara ac ka tawa avəda ka ta məcay, amaa mbəlek tata ana ka pəkwata. Ndah dapa vavara fakwanay ec ke rəzleceŋ, ac ka cəp gənaw ana.

⁴Ndana hay fakwanay ac ka kakəradana gədam, afa ka vana matimaazlaɓ kad gənaw ana, ac ka kakəradana gənaw ana, ec ke gweɗ, gege: «Ndana wa masa aŋga ara gənaw ana nesey va masa a zlafa maŋgə vəram ava aŋga?»

⁵Gənaw ana, ka ŋgat cəv ta magwaɗ ma ta həɓa va malaf Zlavay, ka ŋgat gədaŋ te meŋgə mezlər ava matimaazlaɓ ana kiya kwakwar faɗ dapa yaŋ ana ecew.

⁶Ka wuna ma tata ka ta laf Zlavay, ka ta laf mezel tata, meker tata[6] va ndana hay fakwanay masa ac da baymaləvaŋ.

⁷Ka ŋgat matimaazlaɓ te meŋgə vəram ava ndah ta Zlavay va meseserefec dapa vəram ana, ka ŋgat matimaazlaɓ da yaŋ ndah dapa wunam hay fakwanay, dapa tərsam hay fakwanay, ma ta wunam hay fakwanay va vavara hay fakwanay.

⁸Ndana hay dapa vavara fakwanay ec te kekəred sə, kad aŋga, a wal megweɗey, ndah masa mezel tec mavinda aabay dəga mezler ta vavara dapa livəra te mesfeney ta Wut ta təmak masa ac ka zlaha avəda.

⁹A lada nda masa aŋga ava zləmay hay ɓa sə, da cəna:

¹⁰Nda masa aŋga mapa kad pa daŋgay sə, ac ta paɗ pa daŋgay ana. Nda masa aŋga mapa ke te kəɗ ava kafaya sə, ac ta kəɗiya ava kafaya ana. Mafay ana, a lada ndah ta Zlavay aca ra ŋgə gədaŋ dapa mepəsek va makəsparav.

¹¹Ava dəɓa ana, ya ka wala gənaw mekele ɓa ke təhek dapa veɗ. Aŋga eve dərem ecew ara ta wut ta təmak, amaa e gweɗ ara gədam.

¹²E ŋgə jene hay fakwanay ava matimaazlaɓ ta gənaw macaaca ana, a ŋgiya fa yam te ndey tata. Ke tetəkec ndah dapa vavara fakwanay ece re kekəred kad gənaw macaaca ana masa mbəlek tata ka pəkwata.

¹³Ke ŋgə cah hay mazlakava mazlakava ta marəzl ndana hay. Ke kezlek kwakwaw da baymaləvaŋ kad fa vara meendey ta ndana hay fakwanay.

¹⁴Ke fəcec ndana hay dapa vavara fakwanay ava meŋgə cah hay mazlakava masa ac ta vana fa yam te ndey ta gənaw macaaca ana. Ke heheɗecen dar ta ndana hay aca ra lam meezeŋ ta gənaw macaaca ana masa aŋga ava vevek te mbəlek te metew ava kafaya, amaa ka mbəlata, aŋga eve ndey.

¹⁵Gənaw meecew ana sə, ka ŋgat gədaŋ ta mafətana mesfen kad pe meezeŋ ta gənaw macaaca ana, e de gweɗey va e de kəɗec ndah masa aca gwam ke kekəred kad aŋga bay sə, fakwanay.

¹⁶Gənaw ana, ke tetəkec ndana hay fakwanay, wude hey va mazlakava hay, ndah eve zleley va maslamarga hay, ndah masa ac mapəla dapa ɓeley va ɓel hay sə, aca ra ŋgat lamba fa dəŋgaɗ, daha aabay fa ha ta zam teceŋ.

¹⁷Ndana mazlafa mahusam jene, daha aabay mahusamda jene tata sə, aabay, say aŋga ava tampaŋw fətiya, mezel ta gənaw ana, daha aabay lamba masa e ŋguzdek mezel tata.

¹⁸Nesey ana sə, a lada ndana a ŋgat leŋgesl te meven jene hay. A lada nda masa aŋga eve leŋgesl sə, a da masla lamba ta gənaw ana, afa lamba ana sə, mapa pa slam te mezel ta ndana. Lamba ana sə, 666.