Read Cuvok Maŋguzad jene hay kad Zaŋ 14 Bible Online

Maŋguzad jene hay kad Zaŋ 14 - Cuvok bible

Maŋguzad jene hay kad Zaŋ 14

¹Ye njerey, ya ta wala: Wut ta təmak aŋga mazlaca da yaŋ wudam ta Siyawna, ndah bakatar 144.000 masa mezel tata va mezel ta Papaŋ mavinda fa dəŋgaɗ teceŋ sə, ac mazlaca fakwanay da cak tata.

²Ya ta cəna uway e gweɗek da baymaləvaŋ ava gədaŋ ara maɓəsl ma ta yam dapa maajav mazlakava, ara merev ta yam mazlakava ta ɓəsl ma ava gədaŋ, uway masa ya cəna sə, aŋga ara uway ta ganjaval masa ndana hay ta kəɗiya fa slam ana.

³Aca slə law waya, fəma ta gwadadakw, fəma ta gənaw hay faɗ va fəma te mesnendə hay. Kwa ndana mazlafa masasəraka uway ta laway ana aabay, say ndah mahusama 144.000 dapa vavara.

⁴Ndah ana hay ŋgesey, ac ke pə leŋgesl fa manjah teceŋ dapa mazlaɓ vaw ava ŋgwazah, afa aca sən ŋgwazah bay. Aca cəp Wut ta təmak kad pa slam masa e də vəla vəla fakwanay. Eceŋ sə, ac mahusama ana deveŋ ndana hay ara jə te mevə macaaca ana kad Zlavay va kad Wut ta təmak,

⁵ndana ka cəna maŋgal ma dapa ma tec aabay, ec ke ŋgə mebər kwa kusetke aabay.

⁶Ye njerey, ya ta wala sə, maskəla mekele ɓa e tev da wudam da baymaləvaŋ. Aŋga ava labara mambəla ana masa e te ndəv aabay katar ka midakw kad ndah dapa vavara: Kad ndana hay fakwanay dapa vavara, kad tərsam hay, kad ma ta wunam hay mekele mekele va kad miya hay dapa vavara fakwanay.

⁷Ke gweɗ ava gədaŋ, gege: «Melel fa Zlavay, mahahəlan yaŋ, afa pas ta matəɗ ma tata kad yaŋ ndana hay sə, ka husakata cay. Makakəradana nda malama baymaləvaŋ va vavara, yam mafayakfayak ana va ndey ta yam hay.»

⁸Maskəla mekele meecew ana a cəp maskəla macaaca ana, e gweɗ, gege: «Ka pəlahata, ka pəlahata, Baabilaŋw, berne mazlakava, aŋga masa ka sana wuzam ta makəs vaw tata fa zaŋ ana kad ndah dapa vavara hay fakwanay!»

⁹Maskəla mekele, mamahkar ana, ke cəpeceŋ, ke gweɗ ava gədaŋ, gege: «Daha nda masa ke kekəred kad gənaw nesey va meezeŋ tata, daha ka kəs tampaŋw tata fa dəŋgaɗ, daha aabay fa ha sə,

¹⁰aŋga may, a ta sə wuzam te mezem ta rav ta Zlavay, masa e te cəhek dapa kwap te mezem ta rav tata masa aŋga magaɓa aabay, a ta sə marga dapa kwakwaw va wurak ta kwakwaw ana, fəma ta maskəla hay mavəna va fəma ta Wut ta təmak.

¹¹Cacak ta kwakwaw masa e te ŋgedec marga ana ŋgesey, e te ŋgeŋgez kad a wudam katar ka midakw, ndah mekekəred kad gənaw ana va meezeŋ tata va ndah makəsa tampaŋw te mezel tata sə, ac ta ŋgat masasak vaw aabay, hwavavaɗ hwapapas.»

¹²Mafay ana, ta ndah ta Zlavay manaha yaŋ kad pə ma tata majawa va makəsa ma te Yesu eve metehwe ana, aca ra ŋgə gədaŋ dapa mepəsek.

¹³Ava dəɓa ana, ya cəna uway e gweɗek da baymaləvaŋ, gege: «Vindaw: Mapəsma ɓa dəga təlam nesey kad ndah masa aca məc dapa mezlər ta Bay Mazlakava!» Mesfen Mavəna, gege: «Aŋga, aca ra sasakaɓa vaw dapa mezlər tec masa marga dapa, afa mezlər tec masa ac ta ŋgiya mambəla ana sə, e te cəpeceŋ.»

¹⁴Ye njerey, ya ta wala: Zlav ta yam məsle ana ndeɗ ndeɗ, dapa zlav ta yam ana ndana ara wut ta nda aŋga manjaha. Fa yaŋ tata sə, rəkwat ta gənaɓ ta matəkaɗ yaŋ matəkaɗa, aŋga ava matəhway matakaɗa mambəla ana dapa ha.

¹⁵Maskəla mekele ke dekey kad a vəda dapa Way ta kwakwas, ka gwaɗa ava gədaŋ kad nda manjaha dapa zlav ta yam sə, gege: «Wawak matəhway takaa, caw. Kiya te meŋgə jene kad a wunam ka husakata, afa jene hay dapa vavara fakwanay ac ka nəhata cay!»

¹⁶Ara nesey, nda manjaha dapa zlav ta yam sə, ka wawak matəhway tata kad pa vavara, jene hay dapa vavara fakwanay maca.

¹⁷Ava dəɓa ana, ya ka wala maskəla mekele e dek dapa Way ta kwakwas da baymaləvaŋ. Aŋga ava matəhway matakaɗa ana dapa ha saya may.

¹⁸Maskəla mekele ke təhek dapa slam te meŋgeŋgez təbekw. Aŋga ava gədaŋ da yaŋ kwakwaw, a gwaɗa ava gədaŋ kad maskəla matəhaza matəhway matakaɗa sə, gege: Wawak matəhway takaa matakaɗa ŋgesey, tewec ha te wudez te rezeŋ hay dapa vavara, afa wudiya ana hay ka nəhata cay.

¹⁹Maskəla sə, ka wawak matəhway tata kad pa vavara, ke tewec ha te wudez te rezeŋ ana hay dapa vavara, ke kuyeɗec wudiya ana hay sə, pa slam mazlakava ta maɗac mezem ta rav ta Zlavay.

²⁰Ac ka ɗaca rezeŋ ana da dəɓa te berne, dapa slam ta maɗac wudiya ana hay ŋgesey, bembez ke və vəla vəla fa vara, ka pasla slam avəda ka wayam mazləla kasl pə ma te pəlez, zambəla te mevevə tata ana, ke ŋgə kilewmeeter 300.