Read Cuvok Maŋguzad jene hay kad Zaŋ 17 Bible Online

Maŋguzad jene hay kad Zaŋ 17 - Cuvok bible

Maŋguzad jene hay kad Zaŋ 17

¹Maskəla amta deveŋ maskəla hay tasəla matəhaza kwap hay tasəla sə, ke dekey, ke gweɗiyey, gege: «Dekey, ya ta ŋguzdakaɗ matəɗ ma a yaŋ ŋgwaz mazlakava makəsa vaw fa zaŋ ana, masa aŋga zef da ma ta wayam mazlakava.

²Bay hay dapa vavara ac ka kəs vaw ava aŋga, ndah dapa vavara ac ec ke kweceŋ ava wuzam ta makəs vaw teceŋ ava aŋga.»

³Ara nesey, Maskəla ana jaka pe Mesfen Mavəna ke hwedeɗiyey pə yaŋ ta səɓak. Ye njerey, ya ta wala sə, ŋgwaz ɓa manjaha da yaŋ gənaw gagaza ana, gənaw ana aŋga ava yaŋ hay tasəla, dərem hay kuraw fə yaŋ ana hay. Mezel hay ta malaf Zlavay mavinda fa vaw.

⁴Ŋgwaz ana aŋga ava rəkwat mekəferkəfer ana va gagaza ana fa vaw, mawuzlala ava gənaɓ, eve kekeŋ hay masa ece zlezlə kazl kazl va gavda hay. Aŋga ava kwap ta gənaɓ matəhaza dapa ha manəha ava jə maləza hay: Jə maləza nda hay ta makəs vaw tata fa zaŋ ana.

⁵Fa dəŋgaɗ tata, mezel mavinda masa ndana a sən ma da yaŋ bay: «Baabilaŋw berne mazlakava, mamaŋ ta ŋgwazah makəsa vaw fa zaŋ ana va jə maləza nda hay dapa vavara.»

⁶Ye njerey, ya ta wala sə, ŋgwaz ana aŋga makwa eve bembez ta ndah ta Zlavay va bembez ta ndah matana yaw da yaŋ Yesu. Dapa masa ya wala ana sə, ya ka rəzlata mabay.

⁷Ara nesey, maskəla ana ke gweɗiyey, gege: «Ke rəzl sə, mafay te mey? Ya ta ŋguzdakaɗ ma da yaŋ ŋgwaz va gənaw masa aŋga matapa fətiya, masa aŋga ava yaŋ hay tasəla va dərem hay kuraw.

⁸Gənaw masa ka ta wala nesey sə, ka njah eve ndey, amaa təlam nesey, aŋga ɓasabay. A ta dakata dapa veɗ mekweleeleŋ ana a da njah kusetke wagaa e de də kad pa mazay. Ndah dapa vavara masa mezel tec mavinda aabay dəga mezler ta vavara dapa livəra te mesfeney sə, ac ta wala gənaw ana, ec te rəzl fətiya, afa zleezle ka njah eve ndey, təlam nesey, aŋga ɓasabay, amaa a ta vahakata.»

⁹Nesey ana sə, a nak mesen jene va leŋgesl te meven jene hay. Yaŋ hay tasəla sə, e ŋguzdek wudam hay tasəla masa ŋgwaz ana manjaha da yaŋ ana va bay hay tasəla may.

¹⁰Bay hay zlam deveŋ eceŋ, ac ɓasabay, bay mamakwa ana sə, a ŋgə bay heley, bay matasəla ana sə, ke husek bay heley, amaa pas masa ka ta husakata sə, a ta njah gaa aabay.

¹¹Gənaw masa zleezle aŋga eve ndey, təlam nesey, aŋga ɓasabay sə, ma ta njah ka bay macahkar ana sə, aŋga. Aŋga sə, aŋga deveŋ bay hay tasəla, a ta zata.

¹²«Dərem hay kuraw masa ka ta wala fə yaŋ ta gənaw ana sə, ece ŋguzdek bay hay kuraw masa ac ka zlar meŋgə bay tec aabay heley, amaa ac ta vən matimaazlaɓ te meŋgə bay ana da hwaɗ te ler amta ava gənaw ana.

¹³Bay ana hay leŋgesl tec amta, ac ka paɗ gədaŋ mazlakava va matimaazlaɓ teceŋ kad pe mezlər ta gənaw ana.

¹⁴Ac ta ŋgə vəram ava Wut ta təmak, amaa Wut ta təmak ana a ta ŋgə bigula da yaŋ eceŋ, afa aŋga Bay Mazlakava ta bay mazlakava hay va Bay ta bay hay, e te ŋgə bigula ana sə, ava ndah masa aŋga te zelekeceŋ, aŋga te peleceŋ va ndah manaha yaŋ kad aŋga.»

¹⁵Maskəla sə, ke gweɗiyey saya, gege: Yam hay masa ka ta wala, ŋgwaz makəsa vaw fa zaŋ ana manjaha da yaŋ ana sə, e ŋguzdek tərsam hay, miya hay, vavara hay mekele mekele va ma ta wunam hay mekele mekele.

¹⁶Dərem hay kuraw masa ka ta wala va gənaw ana ŋgesey sə, ac ta wala ŋgwaz ana fe ndey bay. Ac ta həlan jene hay tata avəda fakwanay, ac ta gərda meetersey. Ac ta ndana slaw ta vaw tata avəda, ac ta ndala dərziya ana avəda ava kwakwaw,

¹⁷afa Zlav ka paɗ jə masa a wal ma ta maŋgiya sə, pa rav teceŋ, aca ra ŋgaw. Ac ta paɗ meŋgə bay teceŋ pe mezlər ta gənaw ana kasl pa pas masa ma hay ta Zlav te gweɗ zleezle sə, ta ŋgata.

¹⁸«Ŋgwaz ana masa ka ta wala ŋgesey sə, aŋga berne mazlakava maŋga bay da yaŋ bay hay dapa vavara.»