Read Cuvok Maŋguzad jene hay kad Zaŋ 20 Bible Online

Maŋguzad jene hay kad Zaŋ 20 - Cuvok bible

Maŋguzad jene hay kad Zaŋ 20

¹Ava dəɓa ana, ya ka wala maskəla e bəreŋgek da baymaləvaŋ. Aŋga ava kəle ta mawun ma te veɗ mekweleeleŋ ana va jajarɓay macacahw ana dapa ha.

²Ke dey, ka təhaz gədam, zezekw mezleezle ana, masa aŋga bay ta haalay daha aabay Saadan, ka jawa ava jajarɓay sə, de ŋgə mavay bakatar.

³Ka zadaɗ pe veɗ mekweleeleŋ ana, ka ɓəzlaɗ pa, ka faala, afa da fəc ndah dapa vavara hay sabay kasl pe mendəv ta mavay bakatar. Ava dəɓa ana, ac ta pəla ta manjah kusetke.

⁴Ye njerey, ya ta wala sə, gwadadakw hay. Ndah masa ac manjaha fətiya sə, Zlav ke vec gədaŋ te metəɗec ma yaŋ ndana hay. Ya ka wala mesfen ta ndah maməca masa ec ke ŋgəlecen yaŋ avəda mafay ta matə yaw da yaŋ Yesu va mafay ta ma ta Zlavay. Ndah ana ŋgesey, ndah masa ac ke kekəred kad gənaw va meezeŋ tata sə, aabay, masa ac ka kəs tampaŋw tata fa dəŋgaɗ, daha aabay, fa ha teceŋ sə, aabay. Ac ka pərakata dapa maməcay, ac ka ŋgə bay ava Kəristi da hwaɗ ta mavay bakatar.

⁵Ndah maməca dərziya ec ke pərekek dapa maməc ana aabay heley, say mavay bakatar sə, ta ndəvata ɗagay. Ŋgesey, mepərek macaaca ana ta ndah dapa maməcay.

⁶Mapəsma ɓa kad ndah masa ac ka ŋgat mepərekek macaaca ana dapa maməcay, afa eceŋ sə, ac ndah ta Zlavay. Ta ndah ana ŋgesey sə, maməc meecew ana aŋga ava gədaŋ da yaŋ ec ɓasabay, ac ta njah ka ndaakwas hay ta Zlavay va te Kəristi. Ac ta ŋgə bay ava Kəristi da hwaɗ ta mavay bakatar.

⁷Daha mavay bakatar ka ndəvata cay sə, ac ta pəla Saadan dapa daŋgay tata,

⁸e te dek kad a vəda ka ta fəc ndah dapa vavara hay masa ac da dərgazlav hay faɗanay ta vavara, ara megweɗey: Gug va Magug. E te kwesec ka ta ŋgə vəram, meŋgef teceŋ ana aŋga ara wurɓaɓay ta yam mafayakfayak ana.

⁹Ac ta vəna vaw vəla vəla kad pa vavara fakwanay, ac ta tulak slam masa ndah ta Zlavay dapa va berne masa Zlav a waya elehey. Amaa kwakwaw ke təmek da baymaləvaŋ, ke ndelec avəda helmemeɗ.

¹⁰Bay ta haalay, nda mafəca ndah dapa vavara sə, ac ka təhaza avəda, ac ka kazlaɗ pe dəlev ta kwakwaw va ləhwaɓ ta kwakwaw ana, a cak ta gənaw va ta nda mapana yaŋ tata ka nda mehwedek ma. Ac ta sə marga hwavavaɗ, hwapapas katar ka midakw.

¹¹Ava dəɓa ana, ya ka wala gwadadakw mazlakava ana, aŋga məsle ana va ndana manjaha da yaŋ ana. Slam da baymaləvaŋ va dapa vavara ka maməhata mamah mamah fəma ta nda ana, kwa ac ke wel ɓasabay.

¹²Ye njerey, ya ta wala sə, ndah maməca, mazlakava hay va wude hey, ac mazlaca fəma ta gwadadakw ana, Livəra hay ɓa ec ke wuney. Livəra mekele ɓa saya may ke wuney: Bibel te mesfeney, ara nesey, Zlav ke təɗec ma a yaŋ ndah maməca təɗe fe mezlər tec hay ara masa mavinda dapa livəra ana hay.

¹³Yam mafayakfayak ana ke kwiyekec macəhwandə tata hay avəda kad a vəda. Maməcay va vavara ta ndah maməca, ece kwiyekec macəhwandə tec hay kad a vəda may. Ac fakwanay, Zlav ke təɗec ma a yaŋ təɗe fe mezlər tec hay.

¹⁴Ara nesey, ec ke kezleɗec maməcay va vavara ta ndah maməca sə, pe dəlev ta kwakwaw. Dəlev ta kwakwaw ana sə, maməc meecew ana.

¹⁵Kwa waawa masa mezel tata mavinda dapa livəra te mesfen aabay sə, ac ka kazlaɗ pe dəlev ta kwakwaw ana.