Read Cuvok Maŋguzad jene hay kad Zaŋ 21 Bible Online

Maŋguzad jene hay kad Zaŋ 21 - Cuvok bible

Maŋguzad jene hay kad Zaŋ 21

¹Ava dəɓa ana, ya ka wala baymaləvaŋ waya va vavara waya, afa baymaləvaŋ macaaca ana va vavara macaaca ana sə, ec ke meməheceŋ, yam mafayakfayak ana ka maməhata may.

²Berne ta Zlavay, Zeruzelem waya, ya ka wala e bəreŋgek da baymaləvaŋ da cak ta Zlavay, ara madəm masa majasla e tehey kad maŋgusliya.

³Ya ka cəna uway ɓa e gweɗek ava gədaŋ dapa gwadadakw sə, gege: «Mawala slam ta manjah ta Zlavay dapa taɓa ta ndana hay. A ta njah eve eceŋ. Eceŋ may, ac ta njah ka ndah tata, Zlavay ana ava yaŋ tata, a ta njah eve eceŋ, a ta njah Zlav teceŋ.

⁴E te təkweɗecen makuɗa fe ndey tec avəda fakwanay, maməc e te ŋgə ɓasabay. Makuɗa, macə lalaw va masə marga hay ec te ŋgə ɓasabay, afa vavara macaaca ana sə, ka maməhata.»

⁵Nda manjaha fa gwadadakw sə, ke gweɗ, gege: «Mawala, ya ŋgə jene hay fakwanay waya.» Ke gweɗiyey, gege: «Vindaw, afa ma ana nesey sə, ma masa metehwe ana, maŋgal ma dapa aabay.»

⁶Ke gweɗiyey saya, gege: «Təlam nesey, maŋga cay. Yey sə, ya Alfa, ya Awmiga, nda macaaca ana, nda metekweɗ ana. Kad nda masa yam a kəɗa, ya ta vana ndey ta yam te mesfeney taambəla.

⁷Bigula sə, a ta ŋgat macam jeŋ ana hay, ya ta njah ka Zlav tata, aŋga may, a ta njah ka wat aɗaw.

⁸Amaa ta masla zidaw hay, ndah masa rav masasala, ndah mazləɓa, ndah makəɗa nda, ndah makəsa vaw fa zaŋ ana, meslemedə hay, ndah mekekəred kad mbat hay va ndah maŋgəla ma hay fakwanay sə, slam ta manjah teceŋ sə, dapa kwakwaw megemgem ana va ləhwaɓ ta kwakwaw ana. Ŋgesey, maməc meecew ana.»

⁹Ava dəɓa ana, maskəla amta deveŋ maskəla hay tasəla matəhaza kwap hay tasəla manəha ava makaslafay hay mamaɗ yaŋ ana tasəla dapa sə, ke dekey, ke gweɗiyey, gege: «Dekey, ya ta ŋguzdakaɗ maŋgwasl, madəm ta Wut ta təmak.»

¹⁰Jaka pe Mesfen Mavəna ke hwedeɗiyey a yaŋ wudam mazlakava mazambəla ana, ka ŋguzdawa Zeruzelem, berne ta Zlavay, masa e bəreŋgek da baymaləvaŋ da cak ta Zlavay.

¹¹Berne ana, e zlezlə pezl pezl eve mehehəm ta Zlavay. Mezlezlə tata ana sə, ara te kekeŋ ndeleze, ara celgeŋ masa e kes ndey.

¹²Berne ana matulaka teleleŋ eve meɗezl mazlakava masa majəɓa yap. Berne ana aŋga ava ma ta way hay kuraw dapa yaŋ ana ecew Maskəla hay kuraw dapa yaŋ ana ecew aca jəɗ ma ta way ana, mezel hay mavinda fə ma ta way ana hay: Mezel ta hwaɗ ta way hay kuraw dapa yaŋ ana ecew te wudeh te Isreyel.

¹³Dapa zlalav ana amta sə, ma ta way ana hay mahkar mahkar. Mahkar jaka sakatay, mahkar jaka hwahwaɓay, mahkar jaka bəlam va mahkar jaka ma ta wudam.

¹⁴Dar te meɗəzley ana sə, matatəha eve kekeŋ hay mazlakava mazlakava kuraw dapa yaŋ ana ecew. Mezel ta maslaŋ hay kuraw dapa yaŋ ecew ta Wut ta təmak sə, mavinda fətiya.

¹⁵Maskəla megweɗiyey sə, aŋga ava gada ta malav jene dapa ha, gada ana sə, ara gada te ɓəlev makwara ava gənaɓ. A ta lav berne ana, ma ta way ana hay va meɗəzley ana.

¹⁶Berne ana sə, gəva ana hay faɗanay mendemende. A ləviya ava gada te zəleŋ ana, a ŋgəfiya kilewmeeter 2 400. Gəva ta zambəla, te mewuney va te megəley ana sə, ac amta.

¹⁷A lav megəley ana, ece ŋgə ha 144[9] ara masa ndana hay ta ləviya cəɗem cəɗem.

¹⁸Meɗəzley ana sə, maɗəzla eve kekeŋ celgeŋ hay, mezel «Yaspa»[10], berne ana, malama ava gənaɓ masa magaɓa aabay, e zlezlə pezl pezl ara mahwarhwar.

¹⁹Sek te meɗəzl te berne ana sə, macacasla eve kekeŋ hay mekele mekele masa ece husem bay. Sek te meɗəzley ana macaaca ana sə, macacasla eve celgeŋ mezel «Yaspa», meecew ana macacasla eve kekeŋ mezel «Safir», mamahkar ana, macacasla eve kekeŋ mezel «Agat», mafaɗ ana, macacasla eve kekeŋ mezel «Amirat.»

²⁰Mazlam ana, macacasla eve kekeŋ mezel «Sarduwan», mamakwa ana, macacasla eve kekeŋ mezel «Kawrnalin», matasəla ana, macacasla eve kekeŋ mezel «Kərizawlit», macahkar ana, macacasla eve kekeŋ mezel «Beril», mecuɗ ana, macacasla eve kekeŋ mezel «Tawpaz», makuraw ana, macacasla eve kekeŋ mezel «Kərisawpəraz», makuraw dapa yaŋ amta ana, macacasla eve kekeŋ mezel «Hiyasiŋ», makuraw dapa yaŋ ana ecew ana, macacasla eve kekeŋ mezel Ametista.

²¹Ma ta way ana hay 12 nesey sə, ac gavda hay 12. Ma ta way pal amta sə, gavda amta may. Zaŋ te berne ana maləmada ava gənaɓ masa magaɓa aabay, aŋga njeeŋge ara kwalaba.

²²Ya ka wala Way ta kwakwas dapa berne ana aabay, afa Way ta kwakwas tata sə, Bay Mazlakava, Zlavay masa aŋga ava gədaŋ da yaŋ jene hay va ta Wut ta təmak[11].

²³Berne ana ka hwar meweɗ ta pas va ta kiya sə, aabay, afa meweɗ ta Zlavay a waɗafa, kwakwaw tata sə, Wut ta təmak.

²⁴Vavara hay fakwanay ec te dey dapa meweɗ tata, bay hay ta vavara ec te hwedek mehehəm teceŋ kad pe berne ana.

²⁵Ma ta way tata ana hay ec te ɓezl aabay pas tap, afa dərŋga sə, vaɗ aabay.

²⁶Vavara fakwanay ec te hwedek membeɗ teceŋ hay va mahahal yaŋ teceŋ kad pe berne ana.

²⁷Kwa jene masa maləza masa e te sehw pe berne ana sə, aabay, kwa ndah mazləɓa va ndah maŋgəla ma hay, amaa ma ta ŋgat mesehw pe berne ana sə, ndah masa mezel tec hay mavinda dapa livəra te mesfeney ta Wut ta təmak.