Read Cuvok Maŋguzad jene hay kad Zaŋ 6 Bible Online

Maŋguzad jene hay kad Zaŋ 6 - Cuvok bible

Maŋguzad jene hay kad Zaŋ 6

¹Ava dəɓa ana, ya ta wala: Masa Wut ta təmak a hukw tampaŋw mandərha macaaca ana deveŋ tampaŋw hay tasəla sə, ya cəna uway ta gənaw amta deveŋ gənaw hay faɗ sə, ara merev ta yam, gege: «Dekey!»

²Ye njerey, ya ta wala: Pəlez məsle ana. Nda da yaŋ pəlez ana sə, aŋga ava lalaŋ matəhaza dapa ha. Ac ka vana maslalba, ka data ara bigula, ka ta ŋgə bigula saya.

³Masa a hukw tampaŋw meecew ana, ya cəna gənaw meecew ana deveŋ gənaw hay faɗ sə, gege: «Dekey!»

⁴Ara nesey, ya ta wala sə, pəlez gagaza ana ɗawɗaw ara kwakwaw paf! E təhekey. Nda da yaŋ pəlez ana sə, ac ka vana matimaazlaɓ ta mambasana metehey dapa taɓa ta ndana hay dapa vavara, afa aca ra kəɗ vaw dapa taɓa teceŋ ka macəhwandaw, ac ka vana kafaya mazambəla ana pa ha.

⁵Masa a hukw tampaŋw mamahkar ana, ya cəna gənaw mamahkar ana deveŋ gənaw hay faɗ sə, gege: «Dekey!» Ye njerey, ya ta wala: Pəlez magəda ana. Nda da yaŋ pəlez ana sə, aŋga ava kəlew te melev jene dapa ha.

⁶Ya cəna uway ɓa dapa taɓa ta gənaw hay faɗ sə, a gwaɗa, gege: «Kəlew te bəley amta sə, mak ta mapal meyəv ta ndana ta pas amta va kəlew ta martak mahkar sə, mak ta mapal meyəv ta ndana ta pas amta amaa ta mal va wuzam sə, ke te ɓəlec bay.»

⁷Masa a hukw tampaŋw mafaɗ ana sə, ya cəna gənaw mafaɗ ana sə, e gweɗ, gege: «Dekey!»

⁸Ye njerey, ya ta wala: Pəlez mawuzlala lak zəɓak zəɓak. Nda da yaŋ pəlez ana sə, mezel tata «Maməcay», wunam ta ndah maməca a cəpiya fa dar fa dar. Ac ka vana gədaŋ da yaŋ gəva mafaɗ ana ta vavara, ka ta bazl ndana hay ava kafaya, ava mayə, eve mehecey hay mekele mekele va gənaw hay te ley ec de pəɗec avəda.

⁹Masa a hukw tampaŋw mazlam ana sə, ya wala ndah maməca masa ec te kəɗec mafay ta masa ac ka kəs ma ta Zlavay va mafay ta matə yaw teceŋ, ac da dara slam te meŋgeŋgez təbekw.

¹⁰Ndah ana, aca cə lalaw ava gədaŋ, gege: «Bay taciya mavəna va nda metehwe ana, ndah makəɗandaw dapa vavara sə, ke te təɗec ma yaŋ ke te ŋgedec marga sə, ewey?»

¹¹Ava dəɓa ana, ec ke pec rəkwat mazambəla məsle ana fa vaw, ec ke gweɗeceŋ, ece re pə sek kusetke, kasl pa pas masa meŋgef ta malamaŋ tec hay maŋga mezlər ta Zlavay masa ec te kəɗec avəda ara eceŋ sə, ta maɗata.

¹²Ye njerey, ya ta wala: Masa Wut ta təmak ana a hukw tampaŋw mamakwa ana sə, vavara a ɓəla vaw mabay. Pas ka ŋgwadata magəda ana ara rəkwat metekwtekw ana, kiya ka rarəmata gagaza ana ɗawɗaw ara bembez.

¹³Menjewzle hay ece kwekwecekey da baymaləvaŋ kad fa vara, ara memeɗ te gurɓekec wut ta maftay mandərhawak ana hay kad fa vara.

¹⁴Slam da baymaləvaŋ ka maməhata ara ndana ta paɗ livəra, wudam hay fakwanay va vavara hay dapa taɓa ta yam mafayakfayak ana ac ka ŋgəla vaw dapa slam teceŋ.

¹⁵Bay hay dapa vavara, ndah mazlakava hay va mazlakava ta kafaraŋ hay, ndah eve zleley hay va ndah ava gədaŋ, ɓel hay va ndah masa ac mapəla dapa ɓel fakwanay, ec ke reɓeceŋ pa bədam hay va pa maca ta wudam hay.

¹⁶Ndah ana hay ece gweɗec kad wudam hay va gwadakwam hay masa ac maraɓa dapa sə, gege: «Membəɗek kad yaŋ andaw, maraɓdandaw dəreŋ fa yam te ndey ta Nda manjaha fa gwadadakw va dəreŋ fe mezem ta rav ta Wut təmak,

¹⁷afa pas ta maŋguzad mezem ta rav tec mazlakava sə, ka husakata cay, Kwa ndana me te mbəl pəsaŋga ana ŋga aabay.»