Read Cuvok Maŋguzad jene hay kad Zaŋ 7 Bible Online

Maŋguzad jene hay kad Zaŋ 7 - Cuvok bible

Maŋguzad jene hay kad Zaŋ 7

¹Ava dəɓa ana, ya ka wala maskəla hay faɗ ac mazlaca amta amta da ma ta kwakumakw hay faɗ ta vavara, aca təhaz memeɗ hay dapa vavara afa kwa memeɗ de ŋgə dapa vavara, da yaŋ yam mafayakfayak ana, kwa fe wudez wula wula bay.

²Ya ta wala sə, maskəla mekele amta e dek jaka bəlam. Aŋga ava tampaŋw ta Zlav masa aŋga eve ndey. Ka cə lalaw ava gədaŋ, ke gweɗec kad maskəla hay faɗ masa Zlav te vec gədaŋ ta manas vavara va yam mafayakfayak ana, gege:

³«Magərda manas jene dapa vavara, dapa yam mafayakfayak ana va wudez hay heley, say andə ta njəɓaɗ tampaŋw fa dəŋgaɗ ta ndah maŋga mezler ta Zlav tandakwa avəda ɗagay.»

⁴Ava dəɓa ana, ya ka cəna meŋgef ta ndah masa tampaŋw ta Zlavay mandərha fa dəŋgaɗ teceŋ fakwanay: Ndah ana ac bakatar 144.000 masa tampaŋw ana mandərha feceŋ, ece dek da hwaɗ ta way hay fakwanay te wudeh te Isreyel.

⁵Da hwaɗ ta way ta Zuda, ndah 12.000 masa tampaŋw mandərha feceŋ, hwaɗ ta way ta Ruben, ndah 12.000, hwaɗ ta way ta Gat, ndah 12.000,

⁶hwaɗ ta way ta Aser, ndah 12.000 hwaɗ ta way ta Naftali, ndah 12.000, hwaɗ ta way ta Manasey, ndah 12.000,

⁷hwaɗ ta way ta Simeyaŋw, ndah 12.000, hwaɗ ta way te Levi, ndah 12.000, hwaɗ ta way ta Isakar, ndah 12.000,

⁸hwaɗ ta way ta Zabulaŋw, ndah 12.000, hwaɗ ta way te Zezef, ndah 12.000 va hwaɗ ta way te Benjemeŋ, ndah 12.000.

⁹Ava dəɓa ana, ya ka wala, miya ta ndana hay mabay, masa ndana a zlafa maŋgəfiya bay, ece dek dapa vavara hay mekele mekele, dapa tərsam hay, macam yaŋ hay va ma ta wunam hay mekele mekele. Ac mazlaca fəma ta gwadadakw va fəma ta Wut ta təmak, ac ava rəkwat mazambəla məsle ana fa vaw va ha ta təɓa hay dapa ha dapa ha.

¹⁰Ndah ana ece gweɗ ava gədaŋ, gege: «Membəl sə, e dek da vara Zlav tandakwa masa aŋga manjaha fa gwadadakw ta bay va da vara Wut ta təmak.»

¹¹Maskəla hay fakwanay ac ka tulaka gwadadakw, mesnendə hay va gənaw hay faɗ sə, ece kekəredey fəma ta gwadadakw, dəŋgaɗ dac fa vara, aca hahəm Zlavay,

¹²ece gweɗ, gege: «E de ŋgey! Mehehəmey, membeɗey, leŋgesl te mevən jene hay, wasay va mahahəl yaŋ, gədaŋ mazlakava va gədaŋ hay, de ŋgə kad Zlavay katar ka midakw. E de ŋgey!»

¹³Ara nesey, nda amta deveŋ mesnendə hay sə, ke nəkefiyey, gege: «Ndah ava rəkwat mazambəla məsle ana hay nesey sə, ac wa hay wa? Ece dek dama?»

¹⁴Ya ka vahan, gege: «Bay aɗaw, kaa sə, ka səniya.» Ke gweɗiyey, gege: Ndah ana nesey sə, ece dek dapa meɓəsek mecek hay mazlakava. Ac ka pana rəkwat tec hay mazambəla sə, avəda, ac ka cəhwaɓaɗ pe bembez ta Wut ta təmak e de tər ke məsle ana.

¹⁵Mafay ana, ac mazlaca fəma ta gwadadakw ta Zlavay, aca kəɗana ha kad Zlavay hwapapas hwavavaɗ dapa Way ta kwakwas tata. Nda manjaha fa gwadadakw sə, e pefec ndey ava yaŋ tata ana.

¹⁶May e te kəɗec ɓasabay, yam e te kəɗec ɓasabay, kwa pas ava kwakwaw tata hay e te ndelec ɓasabay,

¹⁷afa Wut ta təmak masa aŋga manjaha dapa taɓa ta gwadadakw sə, a ta njah ka gwala jene teceŋ, e te hwedec kad pe ndey ta yam mavana mesfeney. Ara nesey, Zlav e te təkweɗecen makuɗa dapa ndey tec fakwanay.