Read Cuvok Maŋguzad jene hay kad Zaŋ 9 Bible Online

Maŋguzad jene hay kad Zaŋ 9 - Cuvok bible

Maŋguzad jene hay kad Zaŋ 9

¹Maskəla mazlam ana, ka fət dərem tata. Ya ta wala sə, bat e kezlek da baymaləvaŋ kad fa vara. Ac ka vana kəle ta mawun ma te veɗ mekweleeleŋ ana kad pa dar.

²Ka wuna ma te veɗ ana, cacak ke ŋgeŋgəzek dapa veɗ ana kwal kwal ara ndana te ndel melemey dapa wurak mazlakava. Cacak ana ka sərata pas va slam dapa memeɗ avəda.

³Yakw hay ec ke təhek dapa cacak ana, ac ka vəna yaŋ kad pa vavara. Ac ka ŋgat gədaŋ ara ta rac hay ta vavara.

⁴Ac ka ŋgat cəv ta mandə kəzeŋ, kwa wudez hay va jene hay masa ece pəcek meepəcey sə, aabay, amaa ac ta ndə sə, ndah masa tampaŋw ta Zlav fa dəŋgaɗ tec aabay.

⁵Ac ka ŋgat cəv ta makəɗ ndana hay ka macəhwandaw sə, aabay, amaa ece re ŋgedec marga da hwaɗ ta kiya zlam. Mehec ta yakw ana hay sə, e hec ara ta rac.

⁶Dapa pas ana hay ŋgesey, ndana hay ac ta yah maməcay, ac ta ŋgatiya aabay. Ac ta hwar maməcay, amaa maməc a ta hway feceŋ.

⁷Yakw ana hay sə, ac ara pəlez hay majasla kad pa vəram, jene ara maslalba ta gənaɓ mapa fa yaŋ tec ɓa, ndey teceŋ sə, ara ndey ta ndana hay.

⁸Ŋgwec ta yaŋ teceŋ sə, zambəla ana kəsamkəsam ara ŋgwec ta yaŋ ta ŋgwaza hay, zleŋ tec hay sə, ara zleŋ hay ta mabar.

⁹Rav tec masərata ava rəkwat ta ɓəray, maɓasl ma ta pərkwasla tec hay sə, ac ara maɓasl ma ta mawta hay te pəlez hay masa aca hway dapa vəram.

¹⁰Yakw ana hay ŋgesey ac ava hwadar hay ta manjə nda ceɓ ceɓ ara ta rac, ac ka ŋgat gədaŋ ta manjə ndana hay ava hwadar teceŋ ana ŋgesey dapa kiya zlam.

¹¹Ac ava bay tec ɓa, maskəla maŋga bay da yaŋ veɗ ana, mezel Abadaŋw ava ma te Ebəre hay, Apawliyaŋw ava ma te Gərek hay.

¹²Marga hay macaaca ana sə, ec ke dec cay. Mawala marga hay mekele ecew ɓa ec te dek ava dəɓa ana saya.

¹³Maskəla mamakwa ana, ka fət dərem tata. Ya ka cəna uway e gweɗek da macakiya ana hay faɗ ta slam te meŋgeŋgez təbekw ta gənaɓ masa aŋga fəma ta Zlavay.

¹⁴Uway ana, ka gwaɗa maskəla mamakwa ana masa aŋga eve dərem dapa ha sə, gege: «Pəlekec maskəla hay faɗ majawa da wayam mazlakava mezel Efəratis.»

¹⁵Ec ke pəlec maskəla ana hay faɗanay masa ac maləmada ke te kəɗec ndah dapa gəva mamahkar ana ta vavara da hwaɗ te ler ana ŋgesey, da hwaɗ ta manahay ana ŋgesey, da hwaɗ ta kiya ana ŋgesey va da hwaɗ ta mavay ana ŋgesey.

¹⁶Ya ta cəna sə, meŋgef ta kafaraŋ hay matapa fe pəlez hay, ece ŋgə miliyaŋw temere ecew.

¹⁷Dapa jene hay masa ya ta wala sə, ya ka wala pəlez hay va kafaraŋ hay matapa da yaŋ eceŋ, ac ava rəkwat ta ɓəray hay fa vaw, yam ta rəkwat ana gagaza ana, pasləharaya va kuray ta wat. Yaŋ te pəlez ana hay ara ta mabar hay, ma tec hay sə, ece vənehek kwakwaw, cacak va wurak ta kwakwaw.

¹⁸Jaka pa makaslafay hay mahkar nesey: Kwakwaw, cacak va wurak ta kwakwaw masa ma tec hay te vənehekeceŋ sə, ke bezlec ndah da gəva amta ta ndana hay dapa mahkar sə, avəda.

¹⁹Matimaazlaɓ te pəlez ana hay sə, ac dapa ma tec hay va dapa hwadar tec hay. Hwadar teceŋ ana hay, ac ara zezekw hay, ac ava yaŋ hay, aca zlafa mahac ndana hay ava aŋga.

²⁰Ta ndah dərziya masa ac ka məc fa makaslafay ana ŋga aabay sə, ac ka ŋgwada rav dapa mezlər hay masa ac ta ŋgiya ava ha teceŋ sə, aabay jaŋgata, ece dey fəma fəma te mekekəred kad damkwaw hay, kad mbat hay ta gənaɓ, kad səlay hay, kad ɓəray hay gagaza, kad kekeŋ hay va kad hap hay masa kwa aca wala ndey bay, kwa aca cəna bay va masa kwa ece də aabay.

²¹Aca gwam ka ŋgwada rav tec dapa makəɗa nda ka macəhwandaw bay, kwa dapa meslemedə tec hay, dapa makəs vaw tec fa zaŋ ana, kwa dapa makar tec hay bay.