Read Beibl Cymraeg Newydd Diwygiedig yn cynnwys yr Apocryffa 2004 Lefiticus 18 Bible Online

Lefiticus 18 - Beibl Cymraeg Newydd Diwygiedig yn cynnwys yr Apocryffa 2004 bible

Lefiticus 18

¹A llefarodd yr ARGLWYDD wrth Moses, gan ddywedyd,

²Llefara wrth feibion Israel, a dywed wrthynt, Myfi yw yr ARGLWYDD eich DUW.

³Na wnewch yn ôl gweithredoedd gwlad yr Aifft, yr hon y trigasoch ynddi; ac na wnewch yn ôl gweithredoedd gwlad Canaan, yr hon yr ydwyf yn eich dwyn chwi iddi; ac na rodiwch yn eu deddfau hwynt.

⁴Fy marnedigaethau i a wnewch, a'm deddfau a gedwch, i rodio ynddynt: myfi yw yr ARGLWYDD eich DUW.

⁵Ie, cedwch fy neddfau a'm barnedigaethau: a'r dyn a'u cadwo, a fydd byw ynddynt: myfi yw yr ARGLWYDD.

⁶Na nesaed neb at gyfnesaf ei gnawd, i ddinoethi eu noethni: myfi yw yr ARGLWYDD.

⁷Noethni dy dad, neu noethni dy fam, na ddinoetha: dy fam yw hi, na ddinoetha ei noethni.

⁸Na ddinoetha noethni gwraig dy dad: noethni dy dad yw.

⁹Noethni dy chwaer, merch dy dad, neu ferch dy fam, yr hon a anwyd gartref, neu a anwyd allan; na ddinoetha eu noethni hwynt.

¹⁰Noethni merch dy fab, neu ferch dy ferch; na ddinoetha eu noethni hwynt: canys dy noethni di ydyw.

¹¹Noethni merch gwraig dy dad, plentyn dy dad, dy chwaer dithau yw hi; na ddinoetha ei noethni hi.

¹²Na ddinoetha noethni chwaer dy dad: cyfnesaf dy dad yw hi.

¹³Na ddinoetha noethni chwaer dy fam: canys cyfnesaf dy fam yw hi.

¹⁴Na noetha noethni brawd dy dad; sef na nesâ at ei wraig ef: dy fodryb yw hi.

¹⁵Na noetha noethni dy waudd: gwraig dy fab yw hi; na noetha ei noethni hi.

¹⁶Na ddinoetha noethni gwraig dy frawd: noethni dy frawd yw.

¹⁷Na noetha noethni gwraig a'i merch; na chymer ferch ei mab hi, neu ferch ei merch hi, i noethi ei noethni hi: ei chyfnesaf hi yw y rhai hyn: ysgelerder yw hyn.

¹⁸Hefyd na chymer wraig ynghyd â'i chwaer, i'w chystuddio hi, gan noethi noethni honno gyda'r llall, yn ei byw hi.

¹⁹Ac na nesâ at wraig yn neilltuaeth ei haflendid, i noethi ei noethni hi.

²⁰Ac na chydorwedd gyda gwraig dy gymydog, i fod yn aflan o'i phlegid.

²¹Ac na ddod o'th had i fyned trwy dân i Moloch: ac na haloga enw dy DDUW: myfi yw yr ARGLWYDD.

²²Ac na orwedd gyda gwryw, fel gorwedd gyda benyw: ffieidd‐dra yw hynny.

²³Ac na chydorwedd gydag un anifail, i fod yn aflan gydag ef; ac na safed gwraig o flaen un anifail i orwedd dano: cymysgedd yw hynny.

²⁴Nac ymhalogwch yn yr un o'r pethau hyn: canys yn y rhai hyn oll yr halogwyd y cenhedloedd yr ydwyf yn eu gyrru allan o'ch blaen chwi:

²⁵A'r wlad a halogwyd: am hynny yr ydwyf yn ymweled â'i hanwiredd yn ei herbyn, fel y chwydo'r wlad ei thrigolion.

²⁶Ond cedwch chwi fy neddfau a'm barnedigaethau i, ac na wnewch ddim o'r holl ffiaidd bethau hyn; na'r priodor, na'r dieithrddyn sydd yn ymdaith yn eich mysg:

²⁷(Oherwydd yr holl ffiaidd bethau hyn a wnaeth gwŷr y wlad, y rhai a fu o'ch blaen, a'r wlad a halogwyd;)

²⁸Fel na chwydo'r wlad chwithau, pan halogoch hi, megis y chwydodd hi y genedl oedd o'ch blaen.

²⁹Canys pwy bynnag a wnêl ddim o'r holl ffiaidd bethau hyn; torrir ymaith yr eneidiau a'u gwnelo o blith eu pobl.

³⁰Am hynny cedwch fy neddf i, heb wneuthur yr un o'r deddfau ffiaidd a wnaed o'ch blaen chwi, ac nac ymhalogwch ynddynt: myfi yw yr ARGLWYDD eich DUW chwi.