Read DIEM PROTESTANTA Genesỳ 21 Bible Online

Genesỳ 21 - DIEM PROTESTANTA bible

Genesỳ 21

¹Nitahy an’i Sarà ny TOMPO ka notanterahiny taminy tokoa izay nampanantenainy.

²Dia nitoe-jaza i Sarà na dia efa antitra aza i Abrahama, ary niteraka zazalahy izy tamin’ny fotoana izay efa nambaran’Andriamanitra taminy.

³Nataon’i Abrahama hoe Itsehàka ny anaran’ilay zazalahy naterak’i Sarà ho azy.

⁴Noforan’i Abrahama i Itsehàka zanany lahy, rehefa feno valo andro araka izay efa nandidian’Andriamanitra azy[84].

⁵Ary efa feno zato taona i Abrahama tamin’ny nahaterahan’i Itsehàka zanany lahy.

⁶Dia nilaza i Sarà hoe: — Nanao izay nampihomehy ahy Andriamanitra, ary izay rehetra mandre ny momba an’i Itsehàka dia hihomehy miaraka amiko[85].

⁷Ary hoy koa izy hoe: — Iza moa no afaka hilaza amin’i Abrahama fa hampinono zaza i Sarà? Kanjo niteraka zazalahy ho azy tamin’ny fahanterany aho.

⁸Rehefa lehibe ny zaza, dia nosarahi-nono. Koa nanao fanasana lehibe i Abrahama noho izany.

⁹Indray andro dia hitan’i Sarà nilalao[86] ny zanakalahin’i Hagara ejiptianina, izay naterany ho an’i Abrahama;

¹⁰ka hoy i Sarà tamin’i Abrahama: — Roahy io mpanompovavy io sy ny zanany[87], satria tsy tokony handova miaraka amin’i Itsehàka zanako ny zanany.

¹¹Nampalahelo an’i Abrahama loatra izany teny izany, satria zanany koa i Jismahela.

¹²Nefa hoy Andriamanitra tamin’i Abrahama: — Aza malahelo ny amin’ny zazalahy sy ny mpanompovavinao, fa ekeo izay rehetra nolazain’i Sarà taminao; amin’ny alalan’i Itsehàka manko no hisian’ny taranaka hitondra ny anaranao[88].

¹³Kanefa ilay zanakalahin’ny mpanompovavinao koa dia hataoko tonga firenena, satria taranakao izy.

¹⁴Dia nifoha vao maraina be i Abrahama ka naka mofo sy siny hoditra feno rano; dia nomeny an’i Hagara izany sady napetrany teo an-tsorony, ary natolony azy koa ny zaza. Dia nalefan’i Abrahama izy mianaka ka nandeha nirenireny tao an-taniefitr’i Beera-Seba.

¹⁵Rehefa tapitra ny rano tao amin’ny siny hoditra, dia navelan’i Hagara teo am-pototry ny hazo iray ny zaza;

¹⁶dia lasa izy nipetraka tandrifiny tery lavidavitra tokony ho tratry ny zana-tsipîka, fa hoy izy anakampo hoe: «Aza hitako anie izay hahafatesan’ny zaza.» Fony nipetraka tandrifin’ny zaza izy, dia nanandra-peo nitomany.

¹⁷Nefa henon’Andriamanitra ny kiakiakan’ny zaza; koa niantso an’i Hagara avy any an-danitra ny anjelin’Andriamanitra nanao taminy hoe: — Inona no mahazo anao, ry Hagara? Aza matahotra, fa efa henon’Andriamanitra ny kiakiakan’ny zaza eo amin’ny toerany eo.

¹⁸Mitsangàna, ndeha areno ny zaza ka tantano; fa hataoko tonga firenena lehibe izy.

¹⁹Dia nataon’Andriamanitra nahiratra ny mason’i Hagara, ka nahatazana lavaka fantsakana. Dia lasa izy nameno rano ny siny hoditra ary nampisotro rano ny zaza.

²⁰Ary nombàn’Andriamanitra ny zaza ka nihalehibe, ary nonina tany an-taniefitra ka lasa mpandefa tsipîka mahay.

²¹Nangalan-dreniny vady avy tany Ejipta izy ary nonina tao an-taniefitr’i Paràna.

²²Tamin’izany fotoana izany dia nankany amin’i Abrahama i Abimelèka, niaraka tamin’i Pikôla lehiben’ny tafiny, ka nanao taminy hoe: — Homba anao anie Andriamanitra amin’izay rehetra hataonao.

²³Ankehitriny ianiano amin’Andriamanitra aho fa tsy hamadika ahy na ny zanako na ny taranako ianao. Fa ho tahaka ny soa izay nataoko taminao no hataonao amiko sy amin’ity tany izay ivahinianao ity.

²⁴Dia hoy i Abrahama hoe: — Ianianako izany!

²⁵Ary nitarainan’i Abrahama i Abimelèka noho ilay lavaka fantsakana nalain’ireo mpanompon’i Abimelèka an-keriny.

²⁶Fa namaly azy i Abimelèka hoe: — Tsy fantatro izay nanao izany zavatra izany, ary ianao koa tsy nanambara tamiko sady izao aho vao mandre izany.

²⁷Dia naka ny ondry aman’osy sy omby i Abrahama, ka nomeny an’i Abimelèka; dia nanao fifanekena izy roa lahy.

²⁸Ary nanavaka ondrivavy kely fito i Abrahama

²⁹ka nanontanian’i Abimelèka hoe: — Nahoana no avahanao ireo ondrivavy kely fito ireo?

³⁰Dia namaly i Abrahama hoe: — Mba ekeo avy amin’ny tanako ireo ho vavolombelona amiko fa izaho no nandavaka ilay fantsakana.

³¹Izany no niantsoana io toerana io hoe Beera-Seba, satria teo izy roa lahy no nanao fianianana[89].

³²Nanao fifanekena tao Beera-Seba i Abrahama sy i Abimelèka; avy eo dia niainga i Abimelèka sy i Pikôla, lehiben’ny tafiny, ka lasa niverina nankany amin’ny tanin’ny Filistinina.

³³Ary i Abrahama namboly hazo voamadilo tao Beera-Seba, ka teo no nivavahany tamin’ilay Andriamanitra mandrakizay sy niantsoany Azy hoe TOMPO.

³⁴Naharitra ela ny fivahinian’i Abrahama tao amin’ny tanin’ny Filistinina.