Read DIEM PROTESTANTA Genesỳ 34 Bible Online

Genesỳ 34 - DIEM PROTESTANTA bible

Genesỳ 34

¹Indray andro dia nivoaka ny tanàna i Dinà, zanakavavin’i Leà tamin’i Jakôba, mba hitsidika zazavavy tao amin’ny faritany.

²Nahita an’i Dinà i Sekema zanakalahin’i Hamôra izay hivita[147] lehiben’ny faritany, ka naka azy an-keriny sy nandry taminy.

³Nifikitra tamin’i Dinà zanakavavin’i Jakôba izy fa tia azy, ka nanao teny nambabo ny fony.

⁴Dia hoy izy tamin’i Hamôra rainy: — Alaovy ho ahy iny zazavavy iny mba ho vadiko.

⁵Ren’i Jakôba fa nolotoin’i Sekema i Dinà zanany vavy, kanefa tany an-tsaha niandry ny biby fiompy ireo zanany lahy, koa tsy nanao na inona na inona izy ambara-pahatongan’ireo.

⁶Niainga ho any amin’i Jakôba i Hamôra rain’i Sekema mba hiresaka aminy.

⁷Nony tonga avy tany an-tsaha ireo zanakalahin’i Jakôba ka nandre ny vaovao, dia nahatsiaro ny tenany ho afa-baràka sady nirehi-pahatezerana mafy, satria zava-pady ny nandrian’i Sekema an-keriny tamin’ny zanakavavin’i Jakôba; fa zavatra tsy fanao izany tao Israely.

⁸I Hamôra anefa dia nilaza tamin’izy ireo hoe: — Raiki-pitia amin-drazazavavy i Sekema zanako lahy. Koa mba omeo ho vadiny re izy!

⁹Hifanaraka isika ka ny zanakareo vavy homenareo ho anay ary ny zanakay vavy kosa halainareo ho anareo.

¹⁰Hiara-monina aminay ianareo, ka hanjary ho anareo ny faritany eo anoloanareo; koa mitoera sy mivarota, ary manàna zaratany eto.

¹¹I Sekema mihitsy no tonga niteny tamin’ny rain’i Dinà sy ny anadahiny hoe: — Mba amindrao fo aho fa homeko anareo izay takînareo amiko.

¹²Na dia harena be sy zavatra betsaka aza no takînareo amiko, dia homeko ihany, raha omenareo ho vadiko razazavavy.

¹³Dia namaly an’i Sekema sy i Hamôra rainy tamin’ny hafetsena ireo zanakalahin’i Jakôba, satria nandoto an’i Dinà anabaviny izy.

¹⁴Ka hoy ireto taminy: — Tsy azonay atao ny hanome ny anabavinay ho vadin’ny lehilahy tsy voafora, fa manala baràka anay izany.

¹⁵Izao anefa: ekenay ny hevitrareo, raha hoforana mitovy aminay ny lehilahy rehetra eo aminareo.

¹⁶Amin’izay dia homenay ho vadinareo ny tovovavinay, ary ny anareo kosa halainay ho vadinay; dia hiara-monina isika, ary hanjary firenena iray ihany.

¹⁷Fa raha tsy manaiky hoforàna kosa ianareo, dia halainay ny anabavinay ary handeha izahay.

¹⁸Sitrak’i Hamôra sy i Sekema zanany lahy ny soso-kevitra.

¹⁹Koa tsy nitaredretra akory ilay tovolahy nanatanteraka izany zavatra izany, satria raiki-pitia tamin’ny zanakavavin’i Jakôba izy; ary izy no to teny indrindra tao amin’ny fianakaviany.

²⁰Koa nankeo amin’ny toerana teo am-bavahadin’ny tanàna i Hamôra sy i Sekema, ary nikabary tamin’ireo olona tao an-tanànany nanao hoe:

²¹— Mampiseho fihavanana amintsika ireo olona ireo, koa avelao izy honina eto amin’ny faritany sady hivarotra; fa mivoha malalaka ho azy ireo ny tany eo anoloany. Amin’izay dia hahazo manambady ireo tovovaviny isika, ary ny antsika kosa ho vadiny.

²²Manaiky hiara-monina amintsika ireo olona ireo, raha tàhiny ny lehilahy rehetra ato amintsika hoforana tahaka ny azy.

²³Raha manaiky ny teniny isika, dia hiara-mipetraka amintsika izy ireo, ka ho lasantsika miandalana koa ny biby fiompiny sy ny fananany ary ny biby rehetra mpitondra ny entany.

²⁴Samy nanaiky ny soso-kevitr’i Hamôra sy i Sekema ny olona rehetra teo am-bavahady, koa noforàna avokoa ny lehilahy rehetra tao an-tanàna.

²⁵Tamin’ny andro fahatelo taorian’izany, raha mbola nararim-pery mafy iny ireo lehilahy ireo, dia nandray sabatra ny zanakalahin’i Jakôba, dia i Simehôna sy i Levỳ anadahin’i Dinà, ka niditra an-tsokosoko tao an-tanàna, ary nandringana ny lehilahy rehetra tao;

²⁶ka anisan’izany koa ry i Hamôra sy i Sekema zanany lahy. Dia naka an’i Dinà tao an-tranon’i Sekema izy roa lahy, ka lasa nandeha.

²⁷Ireo zanakalahin’i Jakôba hafa kosa nanendaka ireo faty sy nandroba ny tanàna noho ny nandotoana ny anabaviny.

²⁸Nalainy avokoa ny ondry aman’osiny ary ny ombiny sy ny borikiny, dia ny tao an-tanàna sy tany an-tsaha.

²⁹Nobaboiny ny hareny rehetra mbamin’ny zaza amam-behivavy, ka nofaohiny avokoa ny zavatra tao an-trano.

³⁰Dia hoy i Jakôba tamin’i Simehôna sy i Levỳ: — Nampidi-doza ahy ianareo fa nahatonga ahy ho mangidy hoditra amin’ny mponina tompon-tany, dia ny Kanahanita sy ny Perizita[148]. Hitambatra hamely ahy ireo, dia handresy ahy satria olom-bitsy no eto amiko; ka ho fongotra ny tenako sy ny fianakaviako.

³¹Fa namaly ireo hoe: — Nahoana no ho toy ny vehivavy mpivaro-tena no anaovany ny anabavinay?