Read DIEM PROTESTANTA Genesỳ 50 Bible Online

Genesỳ 50 - DIEM PROTESTANTA bible

Genesỳ 50

¹Dia nihohoka teo amin’ny tavan’ny rainy i Jôsefa, ary nitomany sady nanoroka azy.

²Ary nomen’i Jôsefa baiko ireo dokotera mpanompony mba hanosotra zava-manitra ny rainy; koa notanterahin’ireo ny fanosorana menaka manitra ny fatin’i Jakôba,

³nandritra ny efapolo andro ngarangidina mba hitahirizana azy. Ary nisaona an’i Jakôba nandritra ny fitopolo andro ny Ejiptianina.

⁴Nony afaka ny andro fisaonana, dia hoy i Jôsefa tamin’ireo olona akaikin’ny Farao: — Raha mba mahita sitraka aminareo aho, dia mba ampitao amin’ny Farao izao teniko izao:

⁵«Alohan’ny nahafatesan-draiko, dia nampianiana ahy izy mba handevina azy any amin’ny fasana izay efa nomaniny any Kanahàna. Koa ankehitriny aoka aho mba hiakatra handevina ny raiko; rehefa izany dia hiverina indray aho[206].»

⁶Nomen’ny Farao lalana i Jôsefa mba handeha handevina ny rainy araka izay efa nianianany.

⁷Dia niainga i Jôsefa handevina ny rainy; niaraka taminy ireo olona ambony tao an-dapan’ny Farao sy ny loholona rehetra tao Ejipta,

⁸ny ankohonan’i Jôsefa manontolo mbamin’ireo rahalahiny ary ireo olon-kafa rehetra tao amin’ny fianakavian-drainy. Tsy nisy najanona tao amin’ny faritr’i Gôsena, afa-tsy ny ankizy sy ny biby fiompy ihany.

⁹Nisy andian-kalesy sy mpitaingin-tsoavaly koa niara-niakatra taminy, ka nafonja tokoa ny andian’olona mpanotrona.

¹⁰Tonga tao Gôrena-Atàda, any am-pitan’i Jôrdàna izy ireo. Tao no nankalazany tamin’ny fomba manetriketrika sy manohina tokoa ny famoizana an’i Jakôba, fa naharitra fito andro ny fisaonan’i Jôsefa an-drainy.

¹¹Nony nahita izany fomba fisaonana tao Gôrena-Atàda izany ny Kanahanita nonina tamin’iny faritra iny, dia loa-bolana hoe: — Fisaonana mangidy ho an’i Ejipta ity! Izany no niantsoana io toerana any am-pitan’i Jôrdàna io hoe Abela-Mitsiraima, izany hoe Fisaonan’i Ejipta.

¹²Avy eo dia notanterahin’ireo zanakalahin’i Jakôba izay nanafaran-drainy azy.

¹³Nentiny nankany amin’ny tany Kanahàna ny fatin-drainy ary naleviny tao amin’ny zohy tao an-tsahan’i Makpelà, teo akaikin’i Mamre. Fa novidîn’i Abrahama tamin’i Hefrôna izay hetita io saha io mba ho tany fandevenana[207].

¹⁴Rehefa avy nandevina ny rainy i Jôsefa, dia niverina tany Ejipta ny tenany sy ireo rahalahiny mbamin’ireo olona rehetra izay niara-niakatra taminy handevina ny rainy.

¹⁵Rehefa hitan’ireo rahalahin’i Jôsefa fa maty ny rainy, dia nifampiresaka izy hoe: «Mety hankahala antsika i Jôsefa ka hamaly faty ireo ratsy nataontsika taminy.»

¹⁶Noho izany, dia nandefa teny nankany amin’i Jôsefa izy hoe: — Ny rainao, talohan’ny nahafatesany, dia nanafatra hoe:

¹⁷«Izao no holazainareo amin’i Jôsefa: Mamindrà fo ka avelao ny heloka amam-pahotàn’ireo rahalahinao fa ratsy no nataony taminao.» Koa ankehitriny mba avelao ny helokay mpanompon’Ilay Andriamanitry ny rainao. Dia nitomany i Jôsefa noho ny teny nalefan’izy ireo taminy.

¹⁸Tonga tany amin’i Jôsefa rahateo koa ireto rahalahiny ka niankohoka teo anatrehany sady nilaza hoe: — Indreto izahay ho mpanomponao.

¹⁹Fa hoy i Jôsefa taminy: — Aza matahotra ianareo, fa tsy haka ny toeran’Andriamanitra aho.

²⁰Nikendry hanisy ratsy ahy ianareo fa Andriamanitra kosa nanova izany ratsy izany ho soa mba hamonjeny vahoaka marobe araka izao hitanareo ankehitriny izao.

²¹Koa aza matahotra ianareo, fa izaho no hiahy ny sakafo ho anareo sy ny ankohonanareo. Ary nampahery azy i Jôsefa sady nanao teny nanohina ny fony.

²²Nipetraka tany Ejipta i Jôsefa sy ny ankohonan-drainy. Folo amby zato taona no andro niainan’i Jôsefa,

²³ka nahita ny zafiafin’i Efraîma zanany lahy izy ary nanangana ireo zanak’i Makira izay zafikeliny sady zanakalahin’i Manase.

²⁴Indray andro dia hoy i Jôsefa tamin’ireo rahalahiny: — Ho faty aho, nefa hamangy anareo tokoa Andriamanitra ka hampiala anareo amin’ity tany ity ho any amin’ny tany izay efa nianianany homena an’i Abrahama sy i Itsehàka ary i Jakôba.

²⁵Koa mianiàna amiko fa rehefa hamangy anareo tokoa Andriamanitra, dia hoentinareo miakatra avy atỳ ny taolam-baloko[208].

²⁶Maty i Jôsefa, rehefa feno 110 taona. Nohosorana zava-manitra ny fatiny; ary tao anaty vata vato no nametrahana azy tany Ejipta.