Read DIEM PROTESTANTA 2 Samoela 10 Bible Online

2 Samoela 10 - DIEM PROTESTANTA bible

2 Samoela 10

¹Taorian’izany, dia maty ny mpanjakan’ny Hamônita, ka i Hanòna zanany lahy no nanjaka nandimby azy.

²Ary hoy i Davida anakampony: «Hanao soa amin’i Hanòna zanakalahin’i Nahasy aho, tahaka izay nataon-drainy tamiko.» Dia naniraka minisitra i Davida mba hitsapa alahelo an’i Hanòna noho ny nahafatesan-drainy. Rehefa tonga tany amin’ny tanin’ny Hamônita ireo minisitr’i Davida,

³dia hoy kosa ireo andrianan’ny Hamônita tamin’i Hanòna tompony: — Ataonao ve fa ho fanomezan’i Davida voninahitra an-drainao ihany no anirahany olona hitsapa alahelo anao? Moa ve tsy hizaha ny tanàna[55] sy hitsikilo azy mba hahazoany mandrava azy no anirahan’i Davida minisitra hankatỳ aminao?

⁴Dia nampisamborin’i Hanòna ireo minisitr’i Davida, ka noharatana ny ila-volombavany sady notapahina manasa-pe ny akanjony, ary noroahina nody.

⁵Nisy nampandre izany tamin’i Davida; dia naniraka olona izy mba hitsena azy, satria afa-baràka loatra ireo lehilahy ireo; ka hoy ny hafatry ny mpanjaka hoe: «Mijanòna any Jerikao aloha mandra-panirin’ny volombavanareo; izay ianareo vao mody.»

⁶Tsapan’i Hamônita fa tonga halan’i Davida izy. Koa naniraka olona ireo mba hanarama Sirianina avy any Bety-Rehôba sy avy any Tsôbà, dia miaramila an-tongotra miisa antokony roapolo; nokaramainy koa ny lehilahy antokony iray avy amin’ny mpanjakan’i Mahekà ary ny lehilahy antokony 12 avy any Tôba[56].

⁷Nony ren’i Davida izany, dia nirahiny ho any an-toerana i Jôaba sy ny miaramila mahery fo rehetra izy.

⁸Dia niainga ny Hamônita ka nilahatra hiady teo akaikin’ny vavahadin-drenivohiny, fa ny Sirianina avy any Tsôbà sy avy any Rehôba mbamin’ny miaramila avy any Tôba sy avy any Mahekà kosa naka toerana teny an-tsaha.

⁹Rehefa hitan’i Jôaba fa sady teo anoloany no teo ivohony ny vava ady, dia nifantina izay miaramila israelita mendrika indrindra izy ka nandahatra azy teo anoloan’ny Sirianina.

¹⁰Ny miaramila sisa kosa nankininy tamin’i Abisay rahalahiny ka nalahany teo anoloan’ny Hamônita.

¹¹Dia hoy i Jôaba tamin’ity rahalahiny: — Raha mahery noho izaho ny Sirianina, dia aoka ianao hamonjy ahy; fa raha ny Hamônita kosa no mahery noho ianao, dia izaho no ho avy hamonjy anao.

¹²Mahereza ianao, ary aoka isika hahery miady ho an’ny firenentsika sy ireo tanànan’Andriamanitsika. Ary aoka ny TOMPO hanao izay heveriny ho tsara.

¹³Nandroso hiady amin’ny Sirianina i Jôaba sy ny tafiny ka vaky nandositra teo anoloan’ny Israelita ireo.

¹⁴Rehefa hitan’ny Hamônita fa nandositra ny Sirianina, dia mba nandositra teo anoloan’i Abisay koa ry zareo ka nitsofoka tao an-tanàna. Ary nitsahatra nanafika ny Hamônita i Jôaba ka niverina ho any Jerosalema.

¹⁵Fa rehefa nahatsapa ny fahareseny teo anoloan’ny Israelita ireto Sirianina ireto, dia nivory nitambatra.

¹⁶Naniraka olona i Hadadehezera mba hanetsika ny Sirianina izay tany am-pitan’ny ony Eofrata. Dia tonga tao Helama ireo; ary i Sôbàka filohan’ny tafik’i Hadadehezera[57] no nitarika azy.

¹⁷Nambara tamin’i Davida izany; koa namory ny tafika israelita manontolo izy, dia nita an’i Jôrdàna ary tonga tany Helama. Nitandahatra teo anoloan’i Davida ny Sirianina ka nandrafitra ady taminy.

¹⁸Vaky nandositra teo anoloan’ny Israelita ireo Sirianina, ka nahafatesan-dry i Davida olona tao an-kalesy fitonjato sy mpitaingin-tsoavaly 40 000. Naratrany koa i Sôbàka filohan-tafika, ka maty teo.

¹⁹Rehefa nahatsapa ny fahareseny teo anoloan’ny Israelita ireo mpanjaka rehetra mpanoa an’i Hadadehezera, dia nandrindra fihavanana tamin’i Israelita ka nanoa azy. Ary tsy sahy namonjy ny Hamônita intsony ny Sirianina.