Read DIEM PROTESTANTA 2 Samoela 15 Bible Online

2 Samoela 15 - DIEM PROTESTANTA bible

2 Samoela 15

¹Taorian’izany i Absalôma dia nanomana kalesy iray sy soavaly, ary koa vatan-dehilahy dimampolo hihazakazaka eo alohany.

²Vao maraina i Absalôma, dia mijoro eo amoron-dalana akaikin’ny vavahady. Ary isaky ny misy olona mandalo ka mankao amin’ny mpanjaka hitondra raharaha hotsaraina, dia nantsoin’i Absalôma ka nanontaniany hoe: — Avy aiza moa ianao? Rehefa mamaly izy fa avy amin’ny fokon’i Israely anankiray,

³dia hoy i Absalôma taminy: — Tsara sady marina ny raharahanao, saingy tsy misy olona voatendrin’ny mpanjaka mba hihaino anao.

⁴Ary hoy koa i Absalôma: — Raha izaho manko no mba voatendry ho mpitsara amin’ity tany ity, dia hankatỳ amiko avokoa ny olona rehetra manana ady sy raharaha hotsaraina, ka hotsaraiko ara-drariny.

⁵Ary rehefa misy manatona azy mba hiankohoka ho fanajana azy, dia atolony azy ny tanany; ary tazoniny sy orohany avy eo ilay olona.

⁶Toy izany no nataon’i Absalôma tamin’ny Israelita rehetra izay nankao amin’ny mpanjaka mba hangata-pitsarana, ka dia babony ny fon’ireo Israelita.

⁷Nony afaka efa-taona[69], dia hoy i Absalôma tamin’ny mpanjaka: — Avelao aho mba hankany Hebrôna hanefa ny voady efa nataoko tamin’ny TOMPO.

⁸Fa raha mbola nipetraka tany Gesora[70] any Siria aho, dia nanao izao voady izao: «Raha hampodin’ny TOMPO any Jerosalema indray aho, dia hanompo AZY.»

⁹Ary hoy ny mpanjaka taminy: — Mandehana ombàm-piadanana. Ary niainga nankany Hebrôna izy.

¹⁰Naniraka olona tany amin’ny foko israelita rehetra izy hilaza hoe: «Raha vao renareo ny feon’ny anjomara, dia miantsoantsoa hoe: ‹Manjaka ao Hebrôna i Absalôma.› »

¹¹Lehilahy roanjato, nasain’i Absalôma no tonga niaraka taminy avy tany Jerosalema. Nefa nandeha tamim-pahatsorana ireo, fa tsy nahalala na inona na inona.

¹²Raha teo am-panaterana sorona i Absalôma dia nampaka an’i Ahitôfèla mpanolotsain’i Davida, tao amin’ny tanànany any Gilao[71]. Nihamafy hatrany ny fiokoana, ka nitombo ny isan’ireo mpomba an’i Absalôma.

¹³Nisy iraka nitatitra tamin’i Davida nanao hoe: «Efa babon’i Absalôma hanaraka azy ny fon’ny lehilahy amin’ny Israely»

¹⁴Hoy i Davida tamin’ireo minisitra rehetra izay nomba azy tao Jerosalema: — Mitsangàna, aoka isika handositra fa tsy misy fomba hafa hialantsika amin’i Absalôma. Andao hiala faingana fandrao ho tratrany eto isika, ka hidiran-doza; ary hasiany amin’ny lelan-tsabatra ny mponina iray tanàna.

¹⁵Ary hoy ireo minisitra taminy: — Na inona na inona safidinao, ry andriamanjaka, dia vonona mandrakariva izahay.

¹⁶Dia nivoaka nandeha an-tongotra ny mpanjaka, narahin’ny fianakaviany manontolo. Vehivavy folo tamin’ny vaditsindranony no sisa navelany hiandry trano.

¹⁷Vao niala ny tanàna ny mpanjaka sy ny olona rehetra mpanaraka azy, dia nijanona teo akaikin’ny trano farany.

¹⁸Nilahatra teo anoloan’i Davida avokoa ny mpiambina azy, dia ny Keretita rehetra sy ny Peletita rehetra ary koa ny miaramila eninjato lahy izay nanaraka azy avy any Gata[72]. Izy rehetra ireo no nilahatra teo anoloan’ny mpanjaka.

¹⁹Ary hoy ny mpanjaka tamin’i Itàhy filohan’ireo miaramila avy any Gata: — Nahoana ianao no hiaraka aminay koa? Miverena ka mitoera any amin’ny mpanjaka vaovao, satria vahiny ianao sady mpitsoa-ponenana.

²⁰Vao omaly ve no nahatongavanao, ka anio ianao dia hoentiko hirenireny hiaraka aminay sahady, nefa izaho aza tsy mbola mahalala izay tany halehako! Koa miverena ihany any an-tanàna ary ento manaraka anao ireo mpiray firenena aminao. Homba anao anie ny fitiavana amam-pahamarinan’ny Tompo.

²¹Fa hoy i Itàhy namaly ny mpanjaka: — Velona ny TOMPO ka mianiana aminao aho fa na aiza na aiza hisy anao, ry andriamanjaka, na ho faty na ho velona, dia any koa no hitoerako.

²²Ary hoy i Davida tamin’i Itàhy: — Ndeha àry mandroso. Dia nandroso i Itàhy niaraka tamin’ny miaramilany sy ny vady aman-janak’ireo.

²³Nigogogogo nitomany mafy ny besinimaro raha nandalo ny miaramila. Niampita ny riakan’i Kidrôna[73] ny mpanjaka sy ny olona rehetra mpanaraka azy, ka nandroso tamin’ny lalana mankany an-taniefitra.

²⁴Tafaraka tamin’i Davida koa i Tsadôka sy ireo Levita rehetra nitondra ny Vatamasina mirakitra ny fanekempihavanan’Andriamanitra. Napetrak’ireo ilay Vatamasina, ary nanolotra sorona kosa i Abiatara mandra-pahatafavoaka ny olon-drehetra tao an-tanana.

²⁵Dia hoy ny mpanjaka tamin’i Tsadôka: — Ento miverina any an-tanàna ny Vatamasin’Andriamanitra. Raha mahita fitia eo imason’ny TOMPO aho, dia mbola hoentiny miverina ihany, ka hampahitany indray ny Vatamasina sy ny fonena-masiny.

²⁶Raha lazainy kosa fa tsy sitrany intsony aho, dia aoka Izy hanao izay tiany hatao amiko!

²⁷Ary hoy indray ny mpanjaka tamin’i Tsadôka mpisorona: — Tandrinao ve izao? Miverena ombàm-piadanana any an-tanàna miaraka amin’izy roalahy, dia i Ahimahàtsa zanakalahinao sy i Jônatàna zanakalahin’i Abiatara.

²⁸Jereo fa hiandriandry eny amin’ny taniefitra akaikin’ny fitana an’i Jôrdàna aho mandra-pahazoako izay vaovao avy atỳ aminareo.

²⁹Dia nitondra ny Vatamasin’Andriamanitra niverina tany Jerosalema i Tsadôka sy i Abiatara, ka nitoetra tany.

³⁰Nananika ny tendrombohitra Analanôliva[74] tamin-dranomaso be i Davida, ka sady nisaron-doha izy no nandeha tsy nikiraro. Ny olona rehetra izay tafaraka taminy dia nisaron-doha avokoa, ka sady nananika ny tendrombohitra no nitomany.

³¹Nisy nanambara tamin’i Davida fa anisan’ireo mpiara-mioko tamin’i Absalôma koa i Ahitôfela; ka dia hoy i Davida hoe: «Mitalaho aminao aho, TOMPO ô, ataovy adala ny torohevitr’i Ahitôfela[75]!»

³²Rahefa tonga teny an-tampon-tendrombohitra teo amin’ilay ivavahan’ny olona amin’Andriamanitra iny i Davida, dia inty tamy nanatona azy i Hosay izay Arkita; voatriatra ny fitafiany sady nihosim-bovoka ny lohany.

³³Ary hoy i Davida taminy: — Raha miara-dia amiko ianao, dia ho vesatra ho ahy.

³⁴Fa raha miverina any an-tanàna kosa ianao ka hanao amin’i Absalôma hoe: «Hanompo anao aho, ry mpanjaka. Efa mpanompon-drainao ihany aho taloha, fa ankehitriny kosa dia ianao no hotompoiko.» Izany no hahafahanao mamadika ho tombontsoako ny torohevitr’i Ahitôfela.

³⁵Ho eo anilanao any koa i Tsadôka sy i Abiatara mpisorona. Koa izay zavatra rehetra renao avy ao an-tranon’ny mpanjaka, dia ambarao amin’i Tsadôka sy Abiatara.

³⁶Eo anilan’izy ireo any koa ireo zanany roa lahy, dia i Ahimahatsa zanakalahin’i Tsadôka sy i Jônatàna zanakalahin’i Abiatara; izy roa lahy ireto no hampitanareo amiko izay rehetra renareo.

³⁷Ary tonga tao an-tanàna i Hosay sakaizan’i Davida tamin’ny fotoana nidiran’i Absalôma tao Jerosalema.