Read DIEM PROTESTANTA 2 Samoela 16 Bible Online

2 Samoela 16 - DIEM PROTESTANTA bible

2 Samoela 16

¹Raha vao nihoatra ny tampon-tendrombohitra i Davida, dia tonga nitsena azy i Tsibà mpanompon’i Mefibôseta[76], mitarika boriky roa voaisy lasely sady novesarana mofo roanjato sy voaloboka maina zato sampaho ary koa voankazo masaka iray harona sy divay eran’ny siny hoditra.

²Ka hoy ny mpanjaka tamin’i Tsibà: — Hataonao inona ireo? Dia hoy ny navalin’i Tsibà: — Ny boriky, ry andriamanjaka, dia hitaingenan’ny ankohonanao; ny mofo sy ny voankazo hohanin’ireo miaramilanao; ny divay kosa hosotroin’izay reraka any an-taniefitra.

³Ary nanontany azy indray ny mpanjaka hoe: — Fa mba aiza i Mefibôseta, zafin’i Saoly tomponao? Dia hoy ny navalin’i Tsibà ny mpanjaka: — Nijanona any Jerosalema izy, satria noheveriny fa ankehitriny no hampodian’ny Israelita ny fanjakan-draibeny aminy.

⁴Ary hoy ny mpanjaka tamin’i Tsibà: — Indro fa omeko anao avokoa izay fananan’i Mefibôseta. Dia niankohoka ho fanajana ny mpanjaka i Tsibà sady nanao hoe: — Aoka aho, ry andriamanjaka, mba hahita fitia hatrany eo imasonao!

⁵Rehefa tonga teo akaikin’i Bahorima[77] i Davida mpanjaka, dia nisy lehilahy iray natao hoe Simehỳ zanakalahin’i Gerà sy anisan’ny havan’i Saoly; nivoaka ny tanàna izy sady nanozona an’i Davida.

⁶Nitora-bato an’i Davida mpanjaka sy ny minisitra rehetra koa izy, na dia teo avokoa aza ny vahoaka sy ny miaramila izay tankavanan’ny mpanjaka sy tankaviany.

⁷Ary toy izao no nolazain’i Simehỳ rehefa nanozona: — Mandehana any, mandehana any, ry ilay lehilahy mpandatsa-dra sady ratsy fanahy!

⁸Havalin’ny TOMPO aminao anie ny namonoanao ho faty ny taranak’i Saoly! Nangalarinao ny fanjakan’i Saoly ka natolotry ny TOMPO ho eo an-tanan’i Absalôma zanakalahinao; ary indro fa idiran-doza izao ianao satria lehilahy mpandatsa-dra.

⁹Hoy kosa i Abisay zanakalahin’i Tseroià tamin’i Davida mpanjaka: — Ahoana io alika maty io no manozona anao, ry andriamanjaka? Avelao hotapahiko ny lohan’io.

¹⁰Fa novalian’ny mpanjaka hoe: — Inona no iraharahanao izany, ry zanakalahin’i Tseroià? Matoa manozona ahy izy, dia satria ny TOMPO no nibaiko azy hanozona ahy; koa iza no sahy hanome tsiny azy amin’izany?

¹¹Ary hoy koa i Davida tamin’i Abisay sy ny minisitra rehetra: — Raha ny zanakalahy naterako aza no mitady ny aiko, ka mainka fa io Benjaminita io[78]! Aoka izy hanozona ahy, raha ny TOMPO no nibaiko azy hanao izany.

¹²Angamba ho hitan’ny TOMPO ny fahantrako[79], ka hampodiny ho fanambinana ny fanozonany ahy androany.

¹³Fa raha mbola nanohy ny diany i Davida sy ny olony, dia nandroso tsy lavitra azy ireo tamin’ny tehezan-tendrombohitra kosa i Simehỳ, sady mbola nanozona sy nitora-bato ary namafy vovoka.

¹⁴Reraka mafy ny mpanjaka sy ny olona rehetra tafaraka taminy raha tonga teo amoron’i Jôrdàna[80], koa dia naka aina teo.

¹⁵Tonga tao Jerosalema i Absalôma sy ny vahoaka Israelita isan-karazany; ary tafaraka taminy koa i Ahitôfela.

¹⁶Rehefa mby teo amin’i Absalôma i Hosay, ilay Arkita sakaizan’i Davida, dia niantsoantso hoe: — Ho ela velona anie ny mpanjaka! Ho ela velona anie ny mpanjaka!

¹⁷Fa hoy i Absalôma tamin’i Hosay: — Izao va no fitiavanao an’i Davida sakaizanao? Nahoana ianao no tsy mba nandeha niaraka taminy?

¹⁸Ary hoy i Hosay tamin’i Absalôma: — Tsy niaraka taminy aho, satria ny tiako hiarahana dia ianao ilay nofidin’ny TOMPO sy nofidin’ireto vahoaka ireto izany hoe ny Israelita isan-karazany; ka ao aminao no hitoerako.

¹⁹Faharoa manaraka izany, iza ianao hotompoiko izao, moa tsy ny zanakalahin’ilay sakaizako ihany va? Tahaka izay efa nanompoako an-drainao no hanompoako anao koa.

²⁰Hoy i Absalôma tamin’i Ahitôfela: — Mifampidiniha ianareo ny amin’izay tokony hataontsika:

²¹Dia hoy kosa i Ahitôfela tamin’i Absalôma: — Mandehana mandry amin’ny vadikelin-drainao izay nasainy niandry ny trano[81]. Ho fantatry ny Israelita rehetra fa nanao izay nahafa-baràka an-drainao ianao, ka dia hahery ny tanan’izay rehetra mpomba anao.

²²Nananganan’ny olona lay teo an-tampon-trano i Absalôma, ka nandry tamin’ny vadikelin-drainy tao teo imason’ny Israelita rehetra izy[82].

²³Tamin’izay ny torohevitr’i Ahitôfela dia natao ho tahaka ny tenin’Andriamanitra; ary toy izany avokoa ny torohevitra nataony na tamin’i Davida na tamin’i Absalôma.