Read DIEM PROTESTANTA 2 Samoela 21 Bible Online

2 Samoela 21 - DIEM PROTESTANTA bible

2 Samoela 21

¹Nisy mosary naharitra telo taona misesy tamin’ny andron’i Davida. Nanontany ny TOMPO momba izany i Davida ka novaliany hoe: — Avy amin’i Saoly sy ny fianakaviany lian-dra izao, satria i Saoly no namono nahafaty ny Gibehônita[102].

²Nampiantso ny Gibehônita ny mpanjaka mba hiresahany. Ny Gibehônita moa tsy mba isan’ny Israelita, fa sisa tsy maty tamin’ny Amôrita. Efa nianiana taminy manko ny Israelita fa tsy haninona azy; nefa i Saoly, noho ny fitiavany an’i Israely sy i Joda, dia nitady hamongotra azy[103].

³Ka hoy i Davida tamin’ny Gibehônita: — Inona no hataoko ho anareo! Ahoana no hanonerako ny ratsy izay nihatra taminareo, mba hitsofanareo rano ny vahoakan’ny TOMPO?

⁴Dia hoy ny Gibehônita taminy: — Tsy vitana volafotsy na volamena, na koa fahafatesan’ny Israelita iray ny adinay amin’i Saoly sy ny fianakaviany. Ka hoy i Davida: — Koa lazao àry izay tianareo hataoko, fa hotanterahiko.

⁵Dia hoy ireo tamin’ny mpanjaka: — I Saoly no nikasa handripaka anay sy hamongotra anay tsy hisy tavela eo amin’ny tanin’i Israely manontolo;

⁶ka avelao hisy fito lahy amin’ny taranany hatolotra anay mba hahantonay eo anatrehan’ny TOMPO ao Gibehà[104] tanànan’i Saoly ilay mpanjaka voafidin’ny TOMPO. Ka hoy ny mpanjaka: — Hatolotro ireo.

⁷Notsimbinin’ny mpanjaka manokana i Mefibôseta, zanakalahin’i Jônatàna sady zafikelin’i Saoly, noho ny fianianana nataon’i Davida sy i Jônatàna tamin’ny anaran’ny TOMPO[105].

⁸Fa nalain’ny mpanjaka i Armônỳ sy i Mefibôseta zanakalahin’i Ritsepà izay zanakavavin’i Aià, ka izy roa lahy ireo dia naterany tamin’i Saoly; ary nalainy koa izy dimy lahy zanak’i Mikàla izay zanakavavin’i Saoly, ka ireo dia naterany tamin’i Adriela zanakalahin’i Barzilay avy any Mehôlà[106].

⁹Natolotr’i Davida teo an-tanan’ny Gibehônita izy fito lahy ka nahanton’ireo teo an-kavoana iray teo anatrehan’ny TOMPO. Niara-maty avokoa izy fito lahy, satria samy novonoina ho faty tamin’ny fiandohan’ny vaninandro fijinjana ôrza[107].

¹⁰Naka ny lamba gony fisaonana i Ritsepà zanakavavin’i Aià, ka novelariny teo ambony vatolampy; dia nitoetra teo izy nanomboka tamin’ny fiandoham-pijinjana ka mandra-pilatsaky ny orana avy any an-danitra tamin’ireo faty ireo. Tsy navelany hipetrahan’ny voromanidina teo aminy tamin’ny antoandro; ny bibidia kosa no tsy navelany hankeo tamin’ny alina.

¹¹Nisy nanambara tamin’i Davida izay nataon’i Ritsepà zanakavavin’i Aià sady vaditsindranon’i Saoly.

¹²Koa dia nalain’i Davida ny taolambalon’i Saoly sy i Jônatàna zanany tamin’ny mponin’i Jabesa any Gilehada; ireo manko no nangalatra azy tao an-kianjan’i Bety-Seàna, toerana nanantonan’ny Filistinina azy tamin’ny andro namonoan’ny Filistinina an’i Saoly tao Gilbôa[108].

¹³Dia nentin’i Davida avy tany ny taolambalon’i Saoly sy i Jônatàna zanany, ary nangoniny koa ny taolan’ireto fito lahy voahantona.

¹⁴Nalevin’ny olona tany amin’ny tanin’i Benjamîna, tao Tsela, tao amin’ny fasan’i Kisy rain’i Saoly ireo taolambalo rehetra ireo; ary vitany avokoa izay nandidian’ny mpanjaka. Rehefa izany, vao nanambina ny tany Andriamanitra.

¹⁵Nipoaka indray ny ady teo amin’ny Filistinina sy ny Israelita. Dia nidina nanafika ny Filistinina i Davida sy ireo miaramila niaraka taminy; ary nahatsiaro reraka i Davida.

¹⁶Koa nihevitra ny hahafaty an’i Davida i Jisby-Benôba isan’ny taranak’i Harafà[109], izay nanana lohan-defona halimo milanja telo kilao mahery sy fiadiana vaovao.

¹⁷Fa tonga nanampy azy i Abisay zanakalahin’i Tseroià ka namely ary nahafaty an’ilay Filistinina. Tamin’izay ireo olon’i Davida dia nianiana taminy hoe: «Tsy hiara-miainga aminay intsony ianao ho amin’ny ady, mba tsy hamonoanao ho faty ny fahazavan’i Israely[110].»

¹⁸Rehefa izany dia mbola nisy ady indray tamin’ny Filistinina tao Gôba; tamin’izay i Sibekay avy any Hosà no namono ho faty an’i Safa isan’ny taranak’i Harafà.

¹⁹Mbola nisy ady hafa tao Gôba, ary tamin’izay i Elehanàna zanakalahin’i Jahiry-Ôregima sady avy any Betlehema, no namono ho faty an’i Gôliata avy any Gata[111], izay nanana zaran-defona vaventy tahaka ny voditenon’ny mpanenona.

²⁰Dia mbola nisy ady koa tany Gata; ary tao dia nisy olona raindahiny nanana rantsan-tanana enina sy rantsan-tongotra enina, izany hoe efatra amby roapolo no fitambarany. Ilehio koa dia taranak’i Harafà.

²¹Nihaika ny Israelita izy ka matin’i Jônatàna zanakalahin’i Simehà izay rahalahin’i Davida.

²²Ireo miaramila filistinina efa-dahy ireo, izay samy taranak’i Harafà sady tao Gata, dia lavo noho ny famelezan’i Davida sy ny miaramilany azy.