Read DIEM PROTESTANTA 2 Samoela 9 Bible Online

2 Samoela 9 - DIEM PROTESTANTA bible

2 Samoela 9

¹Hoy i Davida indray andro: — Mbola misy olona sisa velona ve amin’ny fianakavian’i Saoly? Mba tiako ny hanisy soa azy noho ny amin’i Jônatàna[51].

²Fa nanana mpanompo iray nantsoina hoe Tsibà ny fianakavian’i Saoly; ary nampanantsoina hankeo amin’i Davida izy, ka nanontanian’ity mpanjaka hoe: — Ianao va no Tsibà? Ary hoy izy namaly: — Izaho, tompoko, no izy.

³Dia nanontany indray ny mpanjaka hoe: — Mbola misy olona sisa velona ve amin’ny fianakavian’i Saoly mba hasiako soa araka ny fanaon’Andriamanitra? Ka novalian’i Tsibà hoe: — Mbola misy zanakalahin’i Jônatàna iray izay, nefa malemy tongotra izy[52].

⁴Ary hoy ny mpanjaka taminy: — Aiza izy? Dia hoy i Tsibà namaly ny mpanjaka: — Ao an-tranon’i Makira[53] zanakalahin’i Hamiela ao Lô-Debàra izy[54].

⁵Ary naniraka olona haka azy any an-tranon’i Makira zanakalahin’i Hamiela ao Lô-Debàra i Davida mpanjaka.

⁶Rehefa tonga teo amin’i Davida i Mefibôseta zanakalahin’i Jônatàna sady zafikelin’i Saoly, dia niankohoka tamin’ny tany ho fanajana azy. Ary hoy i Davida taminy: — Mefibôseta! Ka novaliany hoe: — Inty aho, tompoko.

⁷Dia hoy indray i Davida taminy: — Aza matahotra fa te hanisy soa anao noho ny amin’i Jônatàna rainao aho, ka hamerina aminao ny tany rehetra izay an’i Saoly raibenao; ary ianao dia hisakafo isan’andro eo amin’ny latabatro.

⁸Dia niankohoka izy sady namaly hoe: — Zinona moa aho izay toa fatin’amboa ity no mba itodihanao, tompoko?

⁹Nantsoin’ny mpanjaka i Tsibà mpanompon’i Saoly, ka nilazany hoe: — Nomeko an’i Mefibôseta, zafikelin’ny tomponao avokoa izay rehetra nananan’i Saoly sy ny fianakaviany.

¹⁰Koa ianao sy ireo zanakalahinao ary ireo mpanomponao no hiasa ny tany ho azy ka hanatitra izay hiveloman’ny fianakaviany. Fa i Mefibôseta zafikelin’ny tomponao kosa dia hisakafo isan’andro eo amin’ny latabatro. Nanana zanakalahy 15 sy mpanompo 20 i Tsibà,

¹¹ka niteny tamin’ny mpanjaka hoe: — Tompoko, araka izay rehetra nandidianao mpanjaka no hataoko. Kanefa i Mefibôseta dia hisakafo eo amin’ny latabatro toy ny anankiray amin’ireo zanakalahin’i Saoly mpanjaka.

¹²Nanan-janakalahy tanora nantsoina hoe Mikà i Mefibôseta, ary ny olona rehetra tao an-tranon’i Tsibà dia nanompo an’i Mefibôseta avokoa.

¹³Fa na dia nalemy aza ny tongony roa, dia nonina tany Jerosalema i Mefibôseta satria nisakafo isan’andro teo amin’ny latabatry ny mpanjaka izy.