Read DIEM PROTESTANTA 1 Mpanjaka 16 Bible Online

1 Mpanjaka 16 - DIEM PROTESTANTA bible

1 Mpanjaka 16

¹Ary nisy tenin’ny TOMPO tamin’i Jehò mpaminany zanakalahin’i Hananỳ, dia hafatra ny amin’i Bahasà manao hoe:

²— Nasandratro avy amin’ny vovoka ianao ka nataoko ho filohan’i Israely vahoakako, kanefa dia ny fitondrantenan’i Jerôbohama no nizoranao ary ilay Israely vahoakako nampanotanao ka nampahatezitra Ahy tamin’ny fahotany.

³Noho izany, hofongorako ny tenanao sy ny fianakavianao ka hataoko tahaka ny fianakavian’i Jerôbohama zanakalahin’i Nebata.

⁴Koa ny taminganao izay maty ao an-tanàna dia hohanin’ny alika; ary izay maty any an-tsaha kosa dia hohanin’ny voro-manidina.

⁵Ny sisa amin’ny tantaran’i Bahasà ary koa ny zavatra hafa nataony sy ny herimpo nasehony dia voasoratra ao amin’ny boky milohateny hoe Asan’ireo mpanjakan’i Israely.

⁶Rehefa lasa nodimandry any amin’ny razany izy, dia nalevina tao Tiritsà; ary i Elà zanany lahy no nanjaka nandimby azy.

⁷Ny nitenenan’ny TOMPO an’i Bahasà sy ny fianakaviany, tamin’ny alalan’i Jehò mpaminany zanakalahin’i Hananỳ, dia noho ireto antony roa ireto: voalohany satria nanao izay ratsy eo imason’ny TOMPO i Bahasà sy ny fianakaviany, ka nampahatezitra Azy tamin’ny asan’ny tanany sady tonga tahaka an’i Jerôbohama sy ny fianakaviany; ary faharoa satria naringan’i Bahasà ny taranak’i Jerôbohama.

⁸Tamin’ny taona faha-26 nanjakàn’i Asà mpanjakan’i Joda no tonga mpanjaka tamin’i Israely i Elà zanakalahin’i Bahasà; ary naharitra roa taona no nanjakàny tao Tiritsà.

⁹Fa nioko hamely azy i Zimrỳ manamboninahiny sady komandin’ny antsasaky ny mpitondra kalesy. Koa fony i Elà nisotro sy nimamo tao Tiritsà tao an-tranon’i Aretsà filohan’ny tandapa,

¹⁰dia niditra i Zimrỳ ka namono nahafaty azy tamin’ny taona faha-27 nanjakàn’i Asà mpanjakan’i Joda; ary izy no nanjaka nandimby an’i Elà.

¹¹Ary vantany vao nanjaka i Zimrỳ ka nipetraka teo amin’ny sezafiandrianany, dia naringany avokoa ny fianakavian’i Bahasà, ka tsy nasiany niangana rehefa mety ho lehilahy, na tamin’ny havany izany na tamin’ny sakaizany;

¹²naringan’i Zimrỳ avokoa ny fianakavian’i Bahasà araka ny teny nolazain’ny TOMPO tamin’ny alalan’i Jehò mpaminany.

¹³Izany no vokatry ny fahotana vitan’i Bahasà sy i Elà zanany, dia izay nataon’izy mianaka sady nampanaoviny an’i Israely ka nampahatezitra ny TOMPO Andriamanitr’i Israely tamin’ny sampiny.

¹⁴Ny sisa amin’ny tantaran’i Elà ary koa ny zavatra hafa rehetra nataony dia voasoratra ao amin’ny boky milohateny hoe Asan’ireo mpanjakan’i Israely.

¹⁵Tamin’ny taona faha-27 nanjakàn’i Asà mpanjakan’i Joda no tonga mpanjakan’i Israely i Zimrỳ ary fito andro ihany no nanjakàny tao Tiritsà. Tamin’izay ny tafik’i Israely dia nanao fahirano an’i Gibetôna izay voatanan’ny Filistinina.

¹⁶Ren’ny miaramila mpanao fahirano fa nikomy tamin’ny mpanjaka i Zimrỳ sady efa nahafaty azy aza; koa androtriny ihany teo an-tobiny teo ny tafik’i Israely manontolo[121] dia nanangana an’i Hômrỳ filohany ho mpanjakan’i Israely.

¹⁷Dia niala tao Gibetôna i Hômrỳ sy ny tafiny manontolo ka nanao fahirano an’i Tiritsà.

¹⁸Rehefa hitan’i Zimrỳ fa azo ny tanàna, dia lasa izy niditra tao amin’ny tilikambo nisy ny efitranon’ny mpanjaka[122]; nodorany io efitrano io, ka dia niara-devona taminy tao izy.

¹⁹Izany no vokatry ny fahotana vitan’i Zimrỳ, fony izy nanao izay ratsy eo imason’ny TOMPO satria nizorany ny fitondrantenan’i Jerôbohama sy ny fahotana izay nataony sady nampanaoviny an’i Israely.

²⁰Ny sisa amin’ny tantaran’i Zimrỳ ary koa ny fikomiana nataony dia voasoratra ao amin’ny boky milohateny hoe Asan’ireo mpanjakan’i Israely.

²¹Taorian’ny nahafatesan’i Zimrỳ, dia nizara roa ny vahoakan’i Israely: ny antsasany nomba an’i Tibnỳ zanakalahin’i Ginata ka te hampanjaka azy, ary ny antsasany kosa nanaraka an’i Hômrỳ.

²²Farany anefa dia resin’ny mpomba an’i Hômrỳ ny mpomba an’i Tibnỳ zanakalahin’i Ginata. Dia maty i Tibnỳ, ary i Hômrỳ no tonga mpanjaka.

²³Tamin’ny taona faha-31 nanjakàn’i Asà mpanjakan’i Joda no tonga mpanjakan’i Israely i Hômrỳ; ary naharitra 12 taona no nanjakàny ka ny enina tamin’izany dia tao Tiritsà.

²⁴Dia novidiny volafotsy fito kilao tamin’i Semera ny havoanan’i Samaria ka nanorenany tanàna teo an-tampony; ary nataony koa hoe Samaria ny anaran’izany tanàna izany araka ny anaran’i Semera tompon’ilay havoana.

²⁵Fa nanao izay ratsy eo imason’ny TOMPO i Hômrỳ, eny, nanao ratsy mihoatra noho izay rehetra teo alohany aza;

²⁶satria nizorany avokoa ny fitondrantenan’i Jerôbohama zanakalahin’i Nebata sy ny fahotana izay nampanaoviny an’i Israely ka nampahatezitra ny TOMPO Andriamanitr’i Israely tamin’ny sampiny.

²⁷Ny sisa amin’ny tantaran’i Hômrỳ ary koa ny zavatra hafa nataony sy ny herimpo nasehony dia voasoratra ao amin’ny boky milohateny hoe Asan’ireo mpanjakan’i Israely.

²⁸Rehefa lasa nodimandry any amin’ny razany izy, dia nalevina tao Samaria; ary i Ahaba zanany lahy no nanjaka nandimby azy.

²⁹Tamin’ny faha-38 taona nanjakàn’i Asà mpanjakan’i Joda no tonga mpanjaka tamin’i Israely i Ahaba zanakalahin’i Hômrỳ; ary naharitra 22 taona no nanjakàny tamin’i Israely tao Samaria.

³⁰Ary izy io dia nanao izay ratsy eo imason’ny TOMPO mihoatra noho izay rehetra teo alohany.

³¹Tsy vitan’ny hoe nizotra tamin’ny fahotan’i Jerôbohama zanakalahin’i Nebata[123] izy, fa mbola nanambady an’i Jezebela zanakavavin’i Etbahala mpanjakan’ny Tsidônianina sy nanompo an’i Bahala ary niankohoka teo anatrehany.

³²Tany Samaria aza dia manao tempoly ho an’i Bahala izy ka nanangana alitara

³³sy nametraka tsatokazo fanajana an’i Aserà tao; koa nampahatezitra ny TOMPO Andriamanitr’i Israely izy mihoatra noho ny mpanjakan’i Israely rehetra talohany.

³⁴Tamin’ny andro nanjakàn’i Ahaba no nanorenan’i Hiela avy any Betela an’i Jerikao; ka ny ain’i Abirama lahimatoany no sandan’ny nametrahany ny fototra, ary ny ain’i Segoba faralahiny no sandan’ny nametrahany ny vavahady, araka ny teny izay nolazain’ny TOMPO tamin’ny alalan’i Josoa zanakalahin’i Nona[124].